بۇگىن اقتوبە وبلىستىق قان ورتالىعىندا اقتاۋدا اۋە اپاتىنان زارداپ شەككەندەرگە قان تاپسىرعىسى كەلەتىن قالا تۇرعىندارى جينالدى, دەپ حابارلايدى Egemen.kz.
قان ورتالىعىنىڭ ديرەكتورى التاي ورازباعامبەتوۆتىڭ ايتۋىنشا, تۇرعىنداردىڭ بەلسەندىلىگى وتە جوعارى.
«تۇرعىندار قايعىلى وقيعاعا الاڭداۋلى. ءبىز شۇعىل تۇردە قان ساقتاۋعا ارنالعان ارنايى ستەريلدى كونتەينەرلەردى ساتىپ الۋىمىز كەرەك بولدى. ونى بۇگىن اقتاۋعا مۇزداتىلعان كۇيىندە ۇشاقپەن جىبەرەدى. كەشە ءبىز 20 بوتەلكە امبۋلين مەن شوكقا قارسى پرەپاراتتاردى جونەلتتىك», دەدى باس دارىگەر.
قان تاپسىرۋعا كەلگەندەردىڭ اراسىندا ءازىربايجاندار قاۋىمداستىعىنىڭ وكىلدەرى دە بار.
ء«بىزدى بۇل تراگەديا ەسەڭگىرەتىپ تاستادى. ادامدار قايتىس بولدى. ءبىزدىڭ قاۋىمداستىق قازا تاپقانداردىڭ بارلىق وتباسىلارىنا كوڭىل ايتادى. ءبىز اقساقالدارمەن جانە جاستارمەن بىرگە زارداپ شەككەندەردى قولداۋعا كەلدىك. بارلىعى قان تاپسىرادى. زارداپ شەككەندەر ساۋىعىپ, وتباسىلارىنا ورالسىن», دەيدى ءازىربايجاندار قاۋىمداستىعى توراعاسىنىڭ ورىنباسارى ۆيدادي فارزاليەۆ.
قان تاپسىرۋشىلاردىڭ قاتارىندا ءارتۇرلى ەتنوس وكىلدەرى, زەينەتكەرلەر, پەداگوگتار, جاستار, قالا تۇرعىندارى بار. نيەت بىلدىرۋشىلەر اقپاراتتىق ساۋالنامالاردى تولتىرىپ, دارىگەردىڭ قابىلداۋىندا بولىپ, سودان كەيىن ىرىكتەلگەندەر جالپى زالعا جىبەرىلدى. كۇنى بويى جالپى 100-دەن استام ادام قان تاپسىردى.
اقتوبەلىكتەر تاپسىرعان قان بۇگىن اقتاۋعا جىبەرىلەدى.