25 جەلتوقسان كۇنى شامامەن ساعات 11:00-دە اقتاۋ قالاسىنىڭ اۋماعىنا باكۋدان گروزنىيعا ۇشىپ بارا جاتقان ۇشاقتىڭ قۇلاعانىنا بايلانىستى ايماق باسشىسى نۇرداۋلەت قيلىباي وقيعا ورنىنا بارىپ, وبلىس اكىمىنىڭ توراعالىعىمەن جەدەل شتاب قۇرىلدى. اپات ورنىندا تجد, دۆد, جەرگىلىكتى اكىمدىك قۇتقارۋ جۇمىستارىنا قاجەتتى جاعدايدىڭ بارلىعىن جاساپ جاتىر.
قر تجم-ءنىڭ 52 قىزمەتكەرى مەن 11 تەحنيكاسى جۇمىس ىستەپ جاتىر. وقيعا ورنىنا كەلگەن قۇتقارۋشىلار اۋە كەمەسىنىڭ ورتەنىپ جاتقانىن انىقتاپ, ءورتتى ءسوندىرۋ جۇمىستارىن باستادى.
دەنساۋلىق ساقتاۋ باسقارماسى باسشىسى بەكبولات ءىزباساروۆتىڭ ايتۋىنشا, 29 ادام امان قالعان. ونىڭ 26-سى وبلىستىق اۋرۋحاناعا جەتكىزىلدى, 2 بالا بالالار اۋرۋحاناسىنا جاتقىزىلدى.
ايتا كەتەيىك, اپاتقا ۇشىراعان بورتتا 62 ادام جانە 5 ەكيپاج بولعان.
ماڭعىستاۋ وبلىسى