شاراينا
فيدجي رەسپۋبليكاسى ءوزىنىڭ ۇلىبريتانيادان تاۋەلسىزدىك الۋىنىڭ 45 جىلدىعىن اتاپ وتكەن كەزدە مەملەكەتتىك تۋىن وزگەرتەتىن بولادى, دەپ مالىمدەگەن ەل ۇكىمەتىنىڭ باسشىسى ۆورەنگە مباينيماراما.
جاڭا تۋ ءفيدجيدىڭ قازىرگى زامانعى جانە ناعىز تاۋەلسىز مەملەكەت رەتىندەگى الەمدەگى بۇگىنگى ورنىن كورسەتۋى ءتيىس. بىزگە قازىرگى تۋداعى ەسكىرگەن, لايىقسىز جانە ءبىزدىڭ بۇرىنعى وتارلىق كەزىمىزدى بەينەلەيتىن سيمۆولداردى الىپ تاستاۋ قاجەت, دەپ اتاپ وتكەن ول. ونىڭ ايتۋىنشا, جاڭا تۋدى تاڭداۋ ءۇشىن فيدجيدە جالپىۇلتتىق بايقاۋ وتكىزىلەتىن بولادى.
ساۋدا ورتالىعىنداعى جارىلىس
اۆستراليانىڭ وڭتۇستىك-باتىسىنداعى پەرت قالاسىنداعى ساۋدا ورتالىعىندا بولعان جارىلىستان ءبىر ادام قازا تاۋىپ, بىرنەشە ادام زارداپ شەككەن.
وقيعا 3 اقپان كۇنى تاڭەرتەڭگىلىك ورىن العان كورىنەدى. اۆس News اگەنتتىگىنىڭ حابارلاۋىنشا, بارلىعى 10 ادام زارداپ شەگىپ, ولاردىڭ 6-ۋىنا سول جەردە مەديتسينالىق جاردەم كورسەتىلگەن. دەنەلەرىن ەلەۋلى كۇيىك شالعان تاعى 3-ەۋى اۋرۋحاناعا جەتكىزىلگەن. كەيبىر مالىمەتتەرگە قاراعاندا, اۋرۋحاناداعى ادامداردىڭ جاعدايلارى وتە اۋىر كۇيدە. ساۋدا ورتالىعىندا كۇشتىك ترانسفورماتور جارىلىپ, سونىڭ سالدارىنان ءورت پايدا بولعان. اۋرۋحاناعا تۇسكەن ادامنىڭ ءبىرىنىڭ دەنەسىندەگى كۇيىك 80 پايىزدى قۇرايدى ەكەن.
مينيستر جول اپاتىنا ۇشىرادى
فينليانديا ىشكى ىستەر ءمينيسترى پيايۆي رياسيانەن رەسەيمەن شەكارالاس ۆااليماا شەكارا قوسىنىنا رەسمي ءىس-شاراعا بارا جاتقاندا جول-كولىك اپاتىنا ۇشىراعان.
ەكى اۆتوكولىكتىڭ ءبىر-بىرىمەن سوعىسۋى سالدارىنان ءمينيستردى قوسا العاندا 3 ادام زارداپ شەككەن. ءىس-شارا جوسپارىنا سايكەس شەنەۋنىك ايەل ەل پرەمەر-ءمينيسترى الەكساندەر ستۋببپەن بىرگە شەكارا وتپەسىنىڭ جۇمىسىن تەكسەرۋگە ءتيىس بولعان. بىراق, بەلگىلەنگەن جەرگە 10 شاقىرىم قالعاندا جول-كولىك اپاتى ورىن العان. جەرگىلىكتى باسىلىمنىڭ حابارلاۋىنا قاراعاندا, جولدىڭ ءۇستى لاي-باتپاق بولعان كورىنەدى. رياسيانەندى كوتكا قالاسىنداعى ورتالىق اۋرۋحاناعا جەتكىزگەن. قازىرگى ۋاقىتتا ءمينيستردىڭ ءوزىن جاقسى سەزىنەتىنى, ومىرىنە قاتەر توندىرەتىندەي جاراقاتى جوق ەكەندىگى بەلگىلى بولىپ وتىر.
رەۆوليۋتسيا كوسەمىنىڭ جاعدايى قالاي؟
كۋبادا ەلدىڭ بۇرىنعى باسشىسى فيدەل كاسترو قايتىس بولدى دەگەن جاڭا سىبىستىڭ اياسىندا, ارادا بىرنەشە اي وتكەندە رەۆوليۋتسيا كوسەمىنىڭ جاڭا فوتوسۋرەتتەرى جاريالانعان.
فوتوسۋرەتتەر كۋبانىڭ ەڭ باستى باسىلىمى «گرانما» گازەتىندە جاريالانىپ وتىر. وندا گاۆانا ۋنيۆەرسيتەتى ستۋدەنتتەر فەدەراتسياسىنىڭ باسشىسى رەندي گارسيانىڭ كوماندانتەدە قوناقتا بولا وتىرىپ, فيدەل كاسترومەن بەتپە-بەت كەزدەسكەنى تۋرالى رەپورتاج بەرىلگەن. جاس جىگىتتىڭ ايتۋىنشا, وعان الدىمەن كاسترونىڭ ءوزى قوڭىراۋ شالىپ, رەۆوليۋتسيا كوسەمىنىڭ وسى وقۋ ورنىنا تۇسكەنىنە 70 جىل تولۋىنا وراي سالتاناتتى شارا ۇيىمداستىرۋ جونىندەگى باستاماسى ءۇشىن العىس ايتقان كورىنەدى. ول كوماندانتەمەن 50 مينۋتقا جۋىق اڭگىمەلەسكەن.
كايردە قاۋىپسىزدىك شارالارى كۇشەيتىلدى
ەگيپەت استاناسى كاير قالاسىنىڭ ورتالىعىنداعى حالىق كوپ جۇرەتىن الاڭداردىڭ بىرىندە جارىلىس بولعان. الدىن الا بولجام بويىنشا, قولدان جاسالعان جارىلعىش قۇرىلعى جارىلعان كورىنەدى.
قۇربان بولعاندار مەن ۇستالعاندار تۋرالى ازىرگە ەشقانداي مالىمەت جوق. ونىڭ سىرتىندا كاير اۋەجايى قاۋىپسىزدىك قىزمەتىنىڭ قىزمەتكەرلەرى ەلەكتروندى قۇرىلعىلار كومەگىمەن اۋەجاي تەرمينالدارىنان تاعى دا ەكى بومبانى تاپقان. قازىرگى ۋاقىتتا بەينەباقىلاۋ كامەرالارىنداعى جازبالاردى زەرتتەۋدە. اۋەجايداعى قاۋىپسىزدىك شارالارى بارىنشا كۇشەيتىلىپ وتىر.
كيمنىڭ وتباسىن كەتىرۋدى ۇسىندى
بۇۇ-نىڭ سولتۇستىك كورەياداعى ادام قۇقىقتارى جونىندەگى ارناۋلى بايانداماشىسى مارزۋكي دارۋسمان بارلىق تۇتقىنداردى بوساتۋ ءۇشىن كحدر ليدەرى
كيم چەن ىندى عانا ەمەس, سونىمەن بىرگە, بۇكىل
ونىڭ وتباسىن ساياسي ساحنادان كەتىرۋ كەرەك دەپ مالىمدەگەن.
مەنىڭ ويىمشا, 80, بالكىم, ءتىپتى, 100 مىڭ بولاتىن تۇتقىنداردى شۇعىل تۇردە بوساتىپ, لاگەرلەردىڭ كوزىن جويۋ ءبىرىنشى كەزەكتى ماڭىزدى ماسەلە بولىپ تابىلادى, دەپ اتاپ وتكەن ول Associated Press اگەنتتىگىنە بەرگەن سۇحباتىندا. بىراق, ول جەكە باسقا تابىنۋعا نەگىزدەلگەن جۇيە تولىقتاي جويىلعان كەزدە عانا مۇمكىن بولماق. ونىڭ ايتۋىنشا, ولاي جاساۋدىڭ بىردەن-ءبىر جولى – كيمدى قىزمەتىنەن تايدىرىپ, ونىڭ وتباسىن ساياسات ساحناسىنان كەتىرۋ.
پرەزيدەنت جولىندا جاساندى بومبالار تابىلدى
تۇركيا پرەزيدەنتى رەدجەپ ەردوعاننىڭ كورتەجى جۇرەتىن انكارانىڭ ماڭايىنداعى جول بويىندا ەكى بىردەي قولدان جاسالعان جارىلعىش قۇرىلعى تابىلعان. بۇل تۋرالى تۇرىكتىڭ Zaman اتتى ينتەرنەت-سايتى حابارلاعان.
باسىلىمنىڭ مالىمەتتەرىنە قاراعاندا, ءبىر بومبانى پرەزيدەنت كورتەجى وتەردەن جارتى ساعات بۇرىن انىقتاسا, ەكىنشىسىن كورتەج وتكەننەن كەيىن 15 مينۋتتان سوڭ تاۋىپ العان. وقيعا ورنىنا كەلگەن ماماندار جارىلعىش قۇرالداردىڭ پلاستيك شولمەكتەر ىشىنە ورناتىلعانىن انىقتاعان. ءبىر بومبا تابىلعان كەزدە ءالى ىسكە قوسىلماعان كورىنەدى. ساراپشىلار جارىلعىش قۇرىلعىنىڭ زاقىمداعىش كۇشىنىڭ ونشا ۇلكەن ەمەس ەكەنىن اتاپ كورسەتىپ وتىر.
ينتەرنەت ماتەريالدارى نەگىزىندە ازىرلەندى.