مەملەكەتتىك كەڭەسشى ەرلان قاريننىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.
جيىن بارىسىندا 271 ازاماتقا «بولاشاق» حالىقارالىق ستيپەندياسىن تاعايىنداۋ تۋرالى شەشىم قابىلداندى. ستيپەنديا يەگەرلەرىنىڭ 136-سى – ماگيستراتۋرا, 8-ءى دوكتورانتۋرادا وقيدى. سونداي-اق 127 ازامات الەمنىڭ ەڭ ۇزدىك ۋنيۆەرسيتەتتەرى مەن ورتالىقتارىندا تاعىلىمدامادان وتەدى.
كوميسسيا مۇشەلەرى باسىمدىق بەرىلىپ وتىرعان ماماندىقتارعا ەرەكشە نازار اۋداردى. ياعني ستيپەنديا يەگەرلەرىنىڭ 65 پايىزى – جاراتىلىستانۋ-تەحنيكالىق, ال 35 پايىزى الەۋمەتتىك-گۋمانيتارلىق باعىتتار بويىنشا ءبىلىمىن جەتىلدىرەدى.
سونىمەن قاتار 170 ازامات شەتەلدىڭ جەتەكشى عىلىمي-زەرتتەۋ ورتالىقتارىندا عىلىمي تاعىلىمدامادان وتۋگە ستيپەنديا الدى.
ەرلان قارين بيىل بىلتىرعىعا قاراعاندا تاعىلىمدامادان وتۋگە ەكى ەسە, ينجەنەرلىك-تەحنيكالىق ماماندىقتار باعىتىنا التى ەسە كوپ ءوتىنىش تۇسكەنىن اتاپ ءوتتى. بۇل مەملەكەت باسشىسىنىڭ ينجەنەرلىك-تەحنيكالىق ءبىلىم بەرۋدى دامىتۋعا جانە قولداۋعا باعىتتالعان باستاماسىنىڭ وزەكتى ءارى زامان تالابىنا ساي ەكەنىن كورسەتەدى.