رەكورد جاڭارسا دا, جۇلدە بۇيىرمادى

جالپى, جەرلەستەرىمىز اتالعان جارىستا جامان ونەر كور­سەتكەن جوق. ماسەلەن, سوفيا سپودارەنكو 50 مەترلىك, ادىلبەك مۋسين 100 مەترلىك قاشىقتىقتى باتتەرفلياي ادىسىمەن جاپ-جاقسى ءجۇزدى. قۇرامىندا ادەلايدا پچەلينتسەۆا, ادىلبەك مۋسين, گلەب كوۆالەنيا, كسەنيا يگناتوۆا سىندى سپورتشىلارى بار كوماندامىز 4ح50 مەترلىك ارالاس ەستافەتادا, ەرلەر قۇراماسى 4ح100 مەترلىك ەركىن ستيلدەگى باسەكەدە كوڭىل كونشىتەرلىك كورسەتكىشكە قول جەتكىزدى. ءسويتىپ, بۋداپەشتە ەلىمىزدىڭ ءتورت بىردەي رەكوردى جاڭاردى. بىراق سونىڭ ءوزى جەرلەستەرىمىزدىڭ جەڭىس تۇعىرىنا كوتەرىلۋىنە جەتكىلىكسىز بولدى. سەبەبى وزگە ەلدەردە سپورتتىڭ بۇل ءتۇرى الدەقاشان قارىشتاپ دامىپ, تىم جوعارى دەڭگەيگە جەتكەن. بۇگىندە اقش, اۋستراليا, نيدەرلاند, قىتاي, شۆەيتساريا, جاپونيا, يتاليا, شۆەتسيا, برازيليا سىندى ەلدەرمەن تەڭ دارەجەدە ايقاسا المايمىز.

وكىنىشكە قاراي, ەلىمىزدە ءجۇزۋ سپور­تى كەنجە قالعان. وسىدان بىرەر جىل بۇرىن دميتري ءبالانديننىڭ باق جۇلدىزى جارقىراي جاندى. ول ريو وليم­پياداسىندا ايدى اسپانعا ءبىر-اق شىعارىپ, 200 مەترگە براسس تاسىلىمەن مالتۋدا باس جۇلدەنى ولجالادى. سول كەزدە ەلىمىزدىڭ بارشا جانكۇيەرى ەرەكشە شاتتانعان ەدى. شەتەلدىكتەر باستارىن شايقاپ, ونى «سەنساتسياعا» بالادى. ونىڭ الدىندا ۆلا­ديسلاۆ پولياكوۆ حالىقارالىق ارەنادا ەلەۋلى تابىستارعا قول جەتكىزدى. ال قازىرگى كەزدە وتانداستارىمىزدىڭ كەيبىرەۋى ازيا قۇر­لىعىندا ۇزدىكتەر ساناتىنا قوسىلعانىمەن, الەمدىك دەڭگەيدەگى دودالاردا دارالانا الماي ءجۇر.

بۋداپەشت باسسەينىندەگى باسەكەدە اقش-تىڭ الدىنا تۇسەتىن كوماندا تابىلمادى. ولار 39 (18 التىن+13 كۇمىس+8 قولا) جۇلدە ولجالادى. بەيتاراپ كوماندا رەتىندە قاتىسقان رەسەيگە 10 (6+4+0) مەدال بۇيىردى. 15 (4+5+6) جۇلدەسى بار كانادا ۇزدىك ۇشتىكتى تۇيىندەدى. بيىك تۇعىردان قول بۇلعاعاندار قاتارىندا قىتاي (3+1+1), شۆەيتساريا (3+0+0), اۋستراليا (2+5+5), ماجارستان (2+2+0), يتاليا (1+5+3), گەرمانيا (1+3+0), كايمان ارالدارى (1+0+1), تۋنيس (1+0+1), گونكونگ (1+0+0), يسپانيا (1+0+0), ليتۆانىڭ (1+0+0) جۇزۋشىلەر بار. تاعى 11 مەملەكەتتىڭ سپورتشىلارى جۇلدەلى ورىنداردى يەلەندى.

جەكەلەگەن جۇزۋشىلەر اراسىنان گرەتچەن ۋولش تەڭدەسسىز ونەرىمەن ءتانتى ەتتى. وليمپيادانىڭ ەكى دۇركىن چەمپيونى, ەكى دۇركىن كۇمىس جۇلدەگەرى دەگەن دارداي اتاعى بار 21 جاستاعى اقش-تىڭ ارۋى جەتى رەت (7+0+0) التىننان القا تاعىندى. گرەتچەننىڭ ەكى جاس ۇلكەن تۋعان اپكەسى, توكيو وليمپياداسىنىڭ كۇمىس جۇلدەگەرى, الەمنىڭ ءۇش دۇركىن چەمپيونى الەكساندرا ۋولش «دۋناي-ارەنادا» بەس رەت (2+1+2) جەڭىس تۇعىرىنا كوتەرىلدى. ولجاعا مولىنان كەنەلگەندەر قاتارىندا امەريكالىق رەگان سميت (4+2+1) پەن كەيت دۋگلاس (4+2+1), كانادالىق سامەر ماكينتوش (3+1+1) سىندى سۇلۋلار بار.

ەرلەردىڭ جارىسىندا ميرون ليفينتسەۆ جاسىنداي جارقىلدادى. رەسەيدىڭ وكىلى باس جۇلدەنىڭ بەسەۋىن (5+0+0) ولجالادى. ونىڭ وتانداسى كيريلل پريگودا (3+3+0), شۆەيتساريالىق نوە پونتي (3+2+1), امە­ريكالىق ليۋك حوبسون (3+0+0) ءوز ەلدەرىنىڭ ءانۇراندارىن ءۇش مارتە شىرقاتتى. ماجارستاندىق حۋبەرت كوش (2+2+1), قىتايلىق تسين حايان (2+1+1), امەريكالىق دجەك الەكسي (2+2+1), ترەنتون دجۋليان (2+0+0), فيبي بەكون (2+0+0) ەكى رەتتەن ءدال سونداي قۇرمەتكە بولەندى.

چەمپيونات بارىسىندا الەمدىك رەكوردتار بىرنەشە مارتە جاڭاردى. گرەتچەن ۋولش (50 مەتر ەركىن تاسىلمەن ءجۇزۋ, 100 مەتر باتتەرفلياي, 50 مەتر كەشەن­دى ءجۇزۋ) پەن سامەر ماكينتوش (200 مەتر باتتەرفلياي, 400 مەتر ەركىن ءتاسىل, 400 مەتر كەشەندى ءجۇزۋ) ءۇش, رەگان سميت (اقش, 50, 200 مەتر شالقالاي ءجۇزۋ), اقش قۇراماسى (4ح100, 4ح200 مەتر ەركىن ءتاسىل) ەكى رەتتەن بۇرىن-سوڭدى بولماعان كورسەتكىشكە قول جەتكىزدى. نوە پونتي (100 مەتر باتتەرفلياي) مەن ليۋك حوبسونعا (200 مەتر ەركىن ءتاسىل) ءبىر-ءبىر رەكوردتان تيەسىلى. تاعى ءبىر ايتا كەتەرلىگى, جارىستىڭ جۇلدە قورى بيىل 2,16 ميلليون اقش دوللا­رىن قۇرادى. سول قاراجاتتى جەڭىس تۇعى­رىنا كوتەرىلگەن سپورتشىلار ءوزارا ءبولىستى. سونداي-اق ءاربىر الەمدىك رەكوردتى جاڭارتقان سپورتشىلارعا 25 مىڭ دوللاردان تابىس ەتىلدى.

قىسقا قاشىقتىققا جۇزۋدەن الەم چەمپيوناتىنىڭ تاريحى 1993 جىلدان باستاۋ الادى. سول كەزدەن بەر 17 مارتە جالاۋى جەلبىرەگەن جارىستا ەلىمىزدىڭ وكىلدەرى اراسىنان ۆلاديسلاۆ پولياكوۆ پەن ەۆگەني رىجكوۆتىڭ عانا جۇلدىزى جاندى. ۆ.پولياكوۆ 2022 جىلى يندياناپوليستە ۇيىمداستىرىلعان بايراقتى باسەكەدە براسس ادىسىمەن 100, 200 مەترگە جۇزۋدە قولا مەدال يەلەنسە, 2006 جىلى شانحايدا باس جۇلدەنى قانجىعاسىنا بايلادى. ءدال سول قىتايدا ە.رىجكوۆ قولا مەدالدى موينىن­دا جارقىراتتى. سودان بەرى باقانداي 18 جىل وتسە دە, ءالى بىردە-ءبىر جەرلەسىمىز اتال­عان جارىستا جەڭىس تۇعىرىنا كوتەرىلە العان جوق. تىپتەن اتاقتى دميتري ءبالان­ديننىڭ وزىنە بۇل بەلەس باعىنبادى.

جوعارىدا اتالعان 17 الەم چەمپيونا­تىنىڭ جالپىكوماندالىق ەسەبىندە اقش قۇراماسى 9 رەت (2000, 2004, 2008, 2010, 2012, 2016, 2018, 2021, 2022, 2024 جىلدارى) الدىنا جان سالمادى. اۋستراليانىڭ 5 مارتە (1995, 1997, 1999, 2002, 2006) مەرەيى ۇستەم بولدى. قىتاي (1993) مەن برازيليا (2014) ءبىر-ءبىر رەتتەن كوش باستادى. بۇل مەملەكەت وكىلدەرىنىڭ ەكىنشى جانە ءۇشىنشى ورىندى يەلەنگەن كەزدەرى دە از ەمەس. شۆەتسيا (1997, 2002), جاپونيا (1999), ۇلىبريتانيا (1999, 2004), گەرمانيا (2000), نيدەرلاند (2008, 2014), رەسەي (2010, 2016, 2018, 2024), يسپانيا (2010), ماجارستان (2012, 2016, 2018), كانادا (2021, 2024), يتا­ليا (2021, 2022) قۇرامالارى ءار جىلدارى جال­پى ەسەپتە ۇزدىك ۇشتىكتىڭ قاتارىنا ەندى.