كەشە ينۆەستيتسيالار جانە دامۋ ءمينيسترى اسەت يسەكەشەۆ پەن ەكونوميكا ءمينيسترى ەربولات دوساەۆتىڭ قاتىسۋىمەن «بايتەرەك» ۇلتتىق باسقارۋشى حولدينگى» اق-تىڭ العاشقى وتىرىسى ءوتتى. وندا حولدينگتىڭ ورتا بيزنەستى دامىتۋعا ارنالعان جاڭا باعدارلاماسى تانىستىرىلدى.
وتىرىسقا ۇكىمەت مۇشەلەرى مەن ۇلتتىق كاسىپكەرلەر پالاتاسى, سونداي-اق ەكىنشى دەڭگەيلى بانكتەردىڭ باسشىلارى مەن بيزنەس وكىلدەرى دە قاتىستى. «قۇرمەتتى ارىپتەستەر بۇگىنگى جيىننىڭ ماقساتى بەلگىلى. سەبەبى, بيىلعى جىلى بىرقاتار ماڭىزدى باعدارلامالار جۇزەگە اسىرىلا باستايدى. ءبىرىنشى كەزەكتە, ارينە, ەلباسىنىڭ «نۇرلى جول» باعدارلاماسى ەكەنى ايان. سونداي-اق, يندۋستريالاندىرۋدىڭ ەكىنشى بەسجىلدىعىنا وراي جاسالعان باعدارلامالار ىسكە قوسىلادى. سولاردىڭ ىشىندە شاعىن جانە ورتا بيزنەسكە ەلباسىمىز ۇلكەن ءمان بەرىپ وتىرعانىن ءبارىڭىز بىلەسىزدەر. وسى تۇرعىدان قاراعاندا بۇگىن تالقىلاۋعا تۇسكەلى وتىرعان جاڭا باعدارلامانىڭ دۇرىس جاسالۋى وتە ماڭىزدى. قازىر ۇكىمەتتە كاسىپكەرلىكتى قولداۋ شارالارى كۇن تارتىبىندە دەۋگە بولادى. ونداعى ماقسات, بيزنەستىڭ تيىمدىلىگىن ارتتىرىپ, ەل ەكونوميكاسىن كوتەرۋ ەكەنى تۇسىنىكتى», دەدى ءا.يسەكەشەۆ.
ورتا بيزنەستى قولداۋعا ارنالعان «بايتەرەك» حولدينگى ۇسىنىپ وتىرعان جاڭا باعدارلاما, ەلىمىزدىڭ شيكىزاتتىق ەمەس سەكتورىندا باسەكەگە قابىلەتتى, ەكسپورتقا باعىتتالعان ايماقتىق جانە الەمدىك دەڭگەيدەگى كاسىپورىندار شوعىرىن قالىپتاستىرۋدى كوزدەيدى. جوسپارعا ساي, باعدارلامانىڭ العاشقى كەزەڭى سىناق تۇرىندە جۇزەگە اسىرىلادى ەكەن. «ءبىز كومپانيالاردى دامىتۋعا, شيكىزاتتىق ەمەس ەكسپورتتى وسىرۋگە, ونەركاسىپتىك ءوندىرىستى ارتتىرىپ, كاسىپورىندارعا جوعارى تابىستى جۇمىس ورىندارىن قۇرۋعا كومەكتەسۋدى كوزدەيمىز. العاشقى كەزەڭدە نەگىزىنەن ءۇش سالاعا باسىمدىق بەرىلەدى. ولار اگروونەركاسىپ كەشەنى, ماشينا جاساۋ جانە قۇرىلىس ماتەريالدارىنىڭ ءوندىرىسى. ال ەندى باعدارلاماعا قانداي كومپانيالار قاتىسا الادى؟ ناقتى كورسەتەر بولساق, اكتيۆتەرى 2 ملرد. تەڭگەدەن اساتىن, سوڭعى ءۇش جىلدا تۇراقتى دامىعان, وسى ۋاقىتتا ءبىر رەت بولسىن ءونىمىن ەكسپورتقا شىعارعان جانە كەمىندە 200 جۇمىس ورنى بار كاسىپورىندار قاتىسۋ مۇمكىندىگىنە يە بولادى.
ال ساپالىق تالاپتارعا كەلسەك, مەنەدجمەنت, ستراتەگيا, بيزنەس ۇلگىنىڭ الەۋەتى باعالانادى. بۇيىرتسا, العاشقى جىلداردىڭ ءناتيجەسىنە قاراي باعدارلامانىڭ اۋقىمى كەڭەيىپ, وعان ءبىرقاتار وزگەرىس ەنگىزۋ جوسپاردا بار», دەدى باعدارلامانى تانىستىرعان ق.بيشىمباەۆ.
ءسوز بولعان باعدارلاما اياسىندا قاراستىرىلعان قولداۋ شارالارى ءۇش باعىتتان تۇرادى. ءبىرىنشى باعىت بويىنشا, «بايتەرەك» حولدينگى كومپانيالار توبىنىڭ قۇرالدارىن پايدالانۋ ارقىلى قارجىلىق قولداۋ كورسەتۋ – تىكەلەي نەسيەلەندىرۋ, بانكارالىق نەسيەلەۋ, ليزينگتىك ءماملەلەردى قارجىلاندىرۋ, پايىزدىق ۇستەمەلەردى سۋبسيديالاۋ, نەسيەلەردى كەپىلدەندىرۋ, ەكسپورتتىق ساقتاندىرۋ, ەكسپورتقا شىعارار الدىنداعى قارجىلاندىرۋ مەن ساۋدا وپەراتسيالارىن قارجىلاندىرۋ, يننوۆاتسياعا گرانتتار ءبولۋ كوزدەلگەن. ەكىنشى باعىت بويىنشا كونسالتينگتىك كومەك كورسەتىلەدى. باعدارلاماعا قاتىسۋشى كومپانيالار باسقارۋ سالاسى بويىنشا الەمدىك وزىق تاجىريبەلەرمەن تانىسىپ, ناقتى كومەكتەر الۋ ءمۇمكىندىگىنە يە بولادى. قاجەت بولعان جاعدايدا مامانداردى ارنايى وقىتۋ دا قولعا الىنادى. ال, ءۇشىنشى باعىت – مەملەكەتتىك ورگاندارمەن اراداعى جۇمىستى جولعا قويۋ. باعدارلاما اياسىندا كومپانيالاردىڭ جۇمىسىنا قاتىستى ماسەلەلەردى شەشىپ, اكىمشىلىك كەدەرگىلەرگە جول بەرمەۋ ءۇشىن مەملەكەتتىك ورگاندارمەن تىعىز قارىم-قاتىناس ورناتۋ كوزدەلىپتى.
وتىرىستا تاراتىلعان ءباسپاسوز مالىمەتىنە قاراعاندا, جىل باسىنان بەرى «بايتەرەك» حولدينگى مەن ۇلتتىق كاسىپكەرلەر پالاتاسى, اكىمشىلىك وكىلدەرى ەلىمىزدىڭ توعىز وڭىرىندە بولىپ, باعدارلامانى ءتۇسىندىرۋ ءۇشىن 1,5 مىڭ كاسىپكەرمەن كەزدەسۋلەر وتكىزىپتى. قازىرگى تاڭدا باعدارلاماعا قاتىسۋعا 200-دەن استام كاسىپكەر ءوتىنىش بەرىپتى.
نۇرباي ەلمۇراتوۆ,
«ەگەمەن قازاقستان».