ەلوردا جاستارى مەملەكەتتىك قىزمەتتىڭ جاڭا مۇمكىندىكتەرىن تالقىلادى

كەزدەسۋ جاستاردىڭ مەملەكەتتىك قىزمەتكە كەلۋىنە جاسالعان مۇمكىندىكتەردى ءتۇسىندىرۋ, ولارعا ادىلەتتىلىك پەن ادالدىق, ازاماتتىق سانا قۇندىلىقتارىن, وتانسۇيگىشتىك قاسيەتتەردى ناسيحاتتاۋ ماقساتىندا ۇيىمداستىرىلدى.

ءىس-شاراعا وڭىرلەردەگى جاستار بەينەكونفەرەنتسبايلانىس ارقىلى اكادەميا فيليالدارىنان قوسىلدى جانە مەكتەپ وقۋشىلارى مەن جوعارى وقۋ ورىندارىنىڭ ستۋدەنتتەرى, «جاس مەملەكەتتىك قىزمەتشىلەر مەكتەبىنىڭ» تىڭداۋشىلارى قاتىستى.

دارحان جازىقباي مەملەكەتتىك قىزمەت سالاسىن دامىتۋ جۇمىستارى شەڭبەرىندە «ادىلەتتى قازاقستان – ادال ازامات» قاعيداتتارىنا سايكەس اشىقتىق, ادىلدىك,  وتانسۇيگىشتىك قاسيەتتەرگە باسا كوڭىل ءبولىنىپ وتىرعانىنا توقتالدى.

«مەملەكەت باسشىسى «قازاقستان – جاس ءارى جاستاردىڭ مەملەكەتى! جاستارىمىز – دامۋدىڭ قوزعاۋشى كۇشى. بارلىق مەملەكەتتىك ورگانداردىڭ مىندەتى – جاستاردىڭ ءوزىن-ءوزى جاقسى تانىتۋىنا جاعداي جاساۋ جانە ولاردىڭ وڭ باستامالارىنا قولداۋ كورسەتۋ» دەگەن بولاتىن. ەڭبەكقور, وتانعا قىزمەت ەتۋدى پارىز سانايتىن جاستار – ەل دامۋىنىڭ قوزعاۋشى كۇشى. حالقىمىز قاشان دا جاستارعا ۇلكەن ءۇمىت ارتقان. اگەنتتىك دارىندى, ءبىلىمدى, باستاماشىل جاستاردى مەملەكەتتىك قىزمەتكە تارتۋدى تۇراقتى جولعا قويىپ وتىر. سول ارقىلى مەملەكەتتىك قىزمەتشىلەردىڭ جاڭا بۋىنىن قالىپتاستىرۋدامىز. جاستاردىڭ بويىنداعى كۇش-قۋات پەن قابىلەتتى ەلگە قىزمەت ەتۋگە باعىتتاۋ ءبىزدىڭ باستى ماقساتىمىز. بولاشاقتا مەملەكەتتىك قىزمەتكە قىزىعۋشىلىق تانىتىپ, وسى جولدى تاڭداساڭدار تۋعان وتانىمىز قازاقستاندى كوركەيتۋگە تىكەلەي ۇلەس قوسا الاسىڭدار», دەدى اگەنتتىك توراعاسى دارحان جازىقباي. 

اگەنتتىك زامان تالابىنا ساي تسيفرلاندىرۋ ارقىلى كادرلاردى ىرىكتەۋدىڭ اشىق جانە ءادىل جۇيەسىن قالىپتاستىرۋ ماقساتىندا «eQyzmet.gov.kz» سايتىندا مەملەكەتتىك قىزمەتكە قابىلداۋدىڭ ونلاين جۇيەسىن ەنگىزگەن.

سوڭعى وزگەرىستەرگە سايكەس جوعارى وقۋ ورىندارىن جاقسى كورسەتكىشپەن (GPA 3,33-تەن جوعارى) بىتىرگەن 430-دان استام تۇلەك اۋداندىق جانە اۋىلدىق جەرلەردەگى تومەنگى لاۋازىمدارعا كونكۋرسسىز قابىلداندى. ايماقتاردا مەملەكەتتىك قىزمەتشى بولۋعا ىنتالى جاستاردى انىقتاۋ, ولارعا مەملەكەتتىك قىزمەتتىڭ ەرەكشەلىكتەرىن ءتۇسىندىرۋ جانە قىزىعۋشىلىعىن ارتتىرۋ جۇمىستارىن جۇرگىزەتىن جاس مەملەكەتتىك قىزمەتشىلەردىڭ مەكتەپتەرى جۇمىس جاساپ جاتىر.

مەملەكەتتىك اپپاراتقا قاجەتتى دارىندى جاستاردى ىرىكتەۋ ءۇشىن پرەزيدەنتتىك جاستار كادر رەزەرۆى جانە وڭىرلىك كادر رەزەرۆى قالىپتاستىرىلدى.  

ءىس-شارا بارىسىندا جاستار 2024-2029 جىلدارعا ارنالعان مەملەكەتتىك قىزمەتتى دامىتۋدىڭ جاڭا تۇجىرىمداماسى شەڭبەرىندە سالاعا قاجەتتى جاس تالانتتاردى ىنتالاندىرۋدى كوزدەيتىن, مەكتەپ جانە ۋنيۆەرسيتەت دەڭگەيىندە ەرتە كاسىپتىك باعدارلاۋ ينستيتۋتىن قۇرۋ باستاماسىنا قىزىعۋشىلىق تانىتتى.

جاستار اگەنتتىك توراعاسىنا وزدەرىن قىزىقتىرعان سۇراقتارىن قويىپ, پىكىر الماستى. دارحان جازىقباي «ادال ازامات» يدەالىنا ءتان قاسيەتتەردىڭ جاستارىمىز ءۇشىن ماڭىزدىلىعىنا توقتالىپ, ولارعا مەملەكەتشىل بولۋدىڭ, وتان الدىنداعى جاۋاپكەرشىلىك پەن پارىزدىڭ قاشاندا بيىك تۇرۋ قاجەتتىلىگىن ايتتى.

ءىس-شارا بارىسىندا جاستارعا اكادەميادا ەكسكۋرسيا جۇرگىزىلىپ, مەملەكەتتىك قىزمەتشىلەردىڭ بىلىكتىلىگىن ارتتىرۋعا ارنالعان تسيفرلىق كوۆوركينگ زالى, مەديا-ستۋديا, اقپاراتتى 3D-گولوگرامما, مۇراجاي جانە كىتاپحانا جۇمىسى تانىستىرىلدى.