بۇگىن سەنات وتىرىسىندا دەپۋتاتتار ەسىرتكىنىڭ زاڭسىز اينالىمىنا قاتىستى تۇزەتۋلەردى ماقۇلدادى, دەپ جازادى Egemen.kz.
ەسىرتكىنىڭ زاڭسىز اينالىمىنا قارسى كۇرەس زاڭ جوباسىنا «كۇشتى زات» (تابيعي, سينتەتيكالىق جانە بيوسينتەتيكالىق شىعۋ تەگى) جاڭا ۇعىمى ەنگىزىلدى.
ەندى ەسىرتكى بيزنەسىن ۇيىمداستىرۋشىلار مەن ەسىرتكى وندىرۋشىلەرگە جازا قاتايتىلادى. سوعان ساي وسى قىلمىسپەن اينالىسقاندارعا 15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ جازاسى كوزدەلگەن.
ال بىلمەي العاش رەت ەسىرتكى تاسىمالداعانداردىڭ جازاسى جەڭىلدەتىلمەك. سەنات دەپۋتاتتارى بۇل توپقا جاتاتىن ادامداردىڭ كوبىنە «ناركوباروندارعا» ەشقانداي قاتىسى بولمايتىنىن العا تارتىپ وتىر.
قىلمىستىق توپپەن نەمەسە قىزمەتتىك وكىلەتتىگىن پايدالانىپ جاسالعان ەسىرتكى, پسيحوتروپتىق نەمەسە سول تەكتەس زاتتاردى وتكىزۋ ماقساتىندا زاڭسىز وندىرۋگە بۇرىنعىدان قاتاڭ جازا تاعايىندالدى. بۇل ءۇشىن 15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ جانە مۇلكىن تاركىلەۋ جازاسى قاراستىرىلعان.
قىلمىستىق توپپەن قۇرامىندا ەسىرتكى بار وسىمدىكتەردى اسا ءىرى كولەمدە زاڭسىز وسىرگەنى ءۇشىن 7 جىلدان 12 جىلعا دەيىن باس بوستاندىعىنان ايىرۋ جازاسى ەنگىزىلەدى. زاڭدا سونىمەن قاتار كۇشى قاتتى اسەر ەتەتىن زاتتاردى زاڭسىز اينالىمعا ەنگىزگەنى ءۇشىن 5 جىلعا دەيىن باس بوستاندىعىنان ايىرۋ جازاسى بەلگىلەندى.