الماتى قالاسىنداعى دوستىق ۇيىندە «بولاشاقتىڭ قۋاتى: يننوۆاتسيالىق ستسەناري جانە ونى تاراتۋ ءتارتىبى» اتتى بۇكىلالەمدىك تۇجىرىمداما جوباسى تالقىلاندى.
اتالمىش تالقىلاۋعا ەنەرگەتيكا مينيسترلىگىنەن, پارلامەنتتەن, ەلدەگى ءىرى كاسىپورىندار مەن ەنەرگەتيكالىق, زەرتتەۋ جانە جوبالاۋ ينستيتۋتتارىنان وكىلدەر مەن ەل عىلىمىنا تولايىم ۇلەس قوسقان بەلگىلى عالىمدار قاتىستى. جيىندا عالىمدار 2050 جىلعا جوبالانىپ وتىرعان الەمدىك ەنەرگيا قۋاتىن ارتتىرۋ باعدارلاماسىنا قازاقستاننىڭ قاتىسۋى مەن وزىندىك تىڭ ۇسىنىستار ەنگىزۋى تۋرالى عىلىمي تۇجىرىمدارى مەن پىكىرلەرىن ورتاعا سالدى.
– حالىقارالىق ەكسپو-2017 كورمەسى قازاقستاننىڭ كەلبەتىن كۇللى الەمگە قالىپتاستىرىپ, جوعارى دارەجەدە وتكىزىلۋى ءتيىس. بۇل شارانى قالاي وتكىزسەك, الەم ءبىزدى سولاي قابىلدايتىن بولادى. مەملەكەت باسشىسى نۇرسۇلتان نازارباەۆتىڭ وسى كورمەنى وتكىزۋدە ۇستانىپ وتىرعان بەرىك بايلامىن ءساتتى جۇزەگە اسىرۋعا شاقىرامىن. ەلباسى ۇستانىمى اتالمىش كورمە ارقىلى ەلىمىزدى بارشا دۇنيەگە تانىتىپ قانا قويماي, الەمدىك قاۋىمداستىق تاراپىنان تەحنولوگيالىق, ينتەللەكتۋالدىق جانە يننوۆاتسيالىق قولداۋ تابۋ مۇمكىندىگىنە قول جەتكىزۋ. بۇل يدەيا اسىرەسە, قازىرگىدەي الەمدە ءتۇرلى كەرەعارلىقتار بەلەڭ الىپ, گەوساياسات پەن ەكونوميكالىق ۇستانىم بويىنشا سالقىنقاباقتىق سەزىلىپ تۇرعان تۇستا اسا قاجەت, – دەدى ۇلتتىق ينجەنەرلىك اكادەميانىڭ باسشىسى باقىتجان جۇماعۇلوۆ عالىمدار الدىندا.
سونداي-اق, ب.جۇماعۇلوۆ اتالمىش فورۋمنىڭ ءساتتى وتۋىنە قولداۋ كورسەتۋ رەتىندە قازاقستاننىڭ قولدانبالى عىلىم اكادەمياسى پرەزيدەنتى نۇرتاي ابىقاەۆتىڭ, ەنەرگەتيكا ءمينيسترى ۆلاديمير شكولنيكتىڭ جانە ءبىلىم جانە عىلىم ءمينيسترى اسلان ءسارىنجىپوۆتىڭ جولداعان قۇتتىقتاۋ حاتتارىن وقىپ بەردى.
ۇلتتىق ينجەنەرلىك اكادەميانىڭ كوررەسپوندەنت مۇشەسى ءارى «BAY Systems» اق پرەزيدەنتى التاي قادىرجانوۆ قازىرگى تاڭدا قازاقستاننىڭ الىس قاشىقتىققا ەلەكتر قۋاتىن تاسىمالداۋ مۇمكىندىگىن ايتا كەلىپ, مۇنىڭ رەسەي-ەۋروپا ەنەرگەتيكا نارىعىندا بەلسەندىلىك تانىتۋعا جانە اۋعانستان, يران, پاكىستان سەكىلدى وڭتۇستىك ايماقتا ورنالاسقان ەلدەردىڭ دە نارىعىنا دەندەپ ەنۋگە جول اشىق ەكەندىگىن جەتكىزدى. وسى ورايدا ول الدا ەلىمىزدىڭ باس قالاسى استانادا وتەتىن حالىقارالىق ەكسپو-2017 كورمەسىنە دايىندىق قارساڭىندا اتالمىش ەكى اكادەميانىڭ جانىنان مامانداندىرىلعان توپ قۇرىپ, كورمەنى ۇيىمداستىرۋشى جانە وتكىزۋگە جاۋاپتى رەتىندە ءتيىستى باسقارۋ تەتىگىنە يە ءارى مەملەكەت تاراپىنان قارجىلىق قولداۋ جاسالۋىن ۇسىندى.
دوڭگەلەك ۇستەل اياسىندا ۇلتتىق ينجەنەرلىك اكادەميا پرەزيدەنتى ب.جۇماعۇلوۆ عالىمدار تاراپىنان ايتىلعان پىكىرلەر مەن ۇسىنىستاردىڭ بارلىعى رەسمي تىركەلىپ, ۇستىمىزدەگى جىلدىڭ كوكتەمىندە استانا قالاسىندا وتكىزىلەتىن باسقوسۋدا بۇكىلالەمدىك تۇجىرىمداما جوباسىن قابىلدار كەزدە ەسكەرىلەتىندىگىن جەتكىزدى.
قانات ەسكەندىر,
«ەگەمەن قازاقستان».
الماتى.