«نۇر وتان» پارتياسى وبلىستىق فيليالىنىڭ «كەدەرگىسىز كەلەشەك» جوباسى اياسىندا ۇيىمداستىرعان مۇمكىندىگى شەكتەۋلى جانداردىڭ قولونەر كورمەسى تالانتتىڭ سىرقاتقا باس يمەيتىندىگىن دالەلدەگەندەي بولدى. كورمەگە تەك قوستاناي قالاسىنداعى عانا ەمەس, اۋداندارداعى, الىس اۋىلدارداعى مۇمكىندىگى شەكتەۋلى جاندار بەلسەنە قاتىستى. كورمەدەگى كوزدىڭ جاۋىن الاتىن سۋرەتتەر, توقىما بۇيىمدارى, اعاشتان, شىنىدان, قاعازدان جاسالعان ونەر تۋىندىلارى, مونشاقتان تەرگەن سۋرەتتەر مەن اشەكەي بۇيىمدار كوزدىڭ جاۋىن الادى. ولاردى سىرقات, مۇمكىندىگى شەكتەۋلى جانداردىڭ قولىنان شىققان دەپ كورەرمەندى سەندىرۋ دە وڭاي ەمەس ەدى.
مىسالى, اعايىندى سۋرەتشى اڭقاۋوۆتاردىڭ جۇننەن بوياپ سالعان سۋرەتتەرى جاڭا تەحنولوگياسىمەن ەرەكشەلەنەدى, كاسىبي سۋرەتشىلەر تاراپىنان جوعارى باعاعا يە بولعان. سونىمەن قاتار, «ءۇمىت-نادەجدا» قوعامدىق قورىنىڭ ۇيىرمەسىنەن كەلگەن زاتتار دا كوپشىلىكتىڭ كوزايىمى بولدى. وسى بىرلەستىكتەگى شەبەر الينا لامپارتەر جاساعان كادەسىي, ەرىنبەيتىن, توزىمدىلىكتى قاجەت ەتەتىن ەڭبەكتىڭ ناتيجەسى ەدى. الينا وتكەن جىلدىڭ اياعىندا «جان شۋاق» رەسپۋبليكالىق قوعامدىق سىيلىعىن العان بولاتىن. سونىمەن قاتار, تاعدىردىڭ سالعان جۇگىن ارقالاپ, اۋرۋمەن الىسىپ جۇرگەن جانداردىڭ قولىنان شىققان كۇندەلىكتى تۇرمىستا قولداناتىن كورپە, كورپەشە, اعاش بۇيىمدار اسقان رۋحتىڭ مىقتىلىعىنان دا حابار بەرگەندەي. كورمەدە «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى ءاليا ساپاروۆا «تالانت سىرقاتتان كۇشتى» كورمەسى ەلباسى تاپسىرماسىمەن پارتيا جۇرگىزىپ وتىرعان كوپ جۇمىستىڭ جالعاسى ەكەنىن, بۇل جۇمىس الداعى ۋاقىتتا دا جالعاسا بەرەتىنىن ايتتى.
– قازىر نارىق سينتەتيكادان جاسالعان تاۋارعا تولى. ال تازا ەكولوگيالىق ماتەريالدان جاسالعان, ونىڭ ۇستىنە ادامنىڭ جان تەبىرەنىسى ايقىن كورىنىپ تۇراتىن قولونەر بۇيىمدارى اركەزدە دە جوعارى باعالانعان. مۇمكىندىگى شەكتەۋلى جانداردىڭ قولونەر بۇيىمدارى سونىسىمەن دە باعالى, قۇرمەتكە يە. ونى كورمەگە كەلۋشىلەر ساتىپ الادى. بۇل كورمە مۇمكىندىگى شەكتەۋلى جانداردىڭ قاراجات تابۋىنا جاقسى مۇمكىندىك, – دەدى وبلىستىق ءماسليحات دەپۋتاتى ەكاتەرينا سمىشلياەۆا.
كورمەگە بۇل جولى 50 ادامنىڭ قولونەر بۇيىمدارى قويىلدى. وبلىس اكىمىنىڭ مۇگەدەكتەر ءىسى جونىندەگى كەڭەسشىسى اسلان دابىلوۆتىڭ ايتۋىنشا, وبلىس وڭىرىندە ۇيدە وتىرىپ قولونەرمەن, تاعى باسقا دا كوڭىلى سۇيگەن ىسپەن اينالىساتىن مۇمكىندىگى شەكتەۋلى جاندار وتە كوپ. ەڭبەك ەتكەن جاننىڭ مۇمكىندىگى ەشقاشان شەكتەلمەيدى.
ءنازيرا جارىمبەتوۆا,
«ەگەمەن قازاقستان».
قوستاناي.