بۇل وقيعا ەلدىڭ جادىنان ءالى شىققان جوق. ەلەڭ-الاڭدا كىسى جوعىن پايدالانىپ بەتپەردە كيىپ دۇكەنگە كىرگەن قاراقشى ەسىكتى ىشتەن ءىلىپ, ساتۋشى ايشاگۇل يباشەۆاعا قارۋ كەزەگەن.
كوبىرەك ولجا قامتىعىسى كەلگەن ول وزىنە قارسى تۇرعان كەلىنشەكتى سۇيرەي-مۇيرەي كەلەسى بولمەگە وتەدى. اۋىلدىڭ قارا شارۋاعا پىسكەن قايراتتى ايەلى تاپانشا ۇستاعان قولدان قوس قولداپ ۇستاپ, ورايى كەلگەندە وقپانىن قىلمىسكەرگە قاراتىپ شۇرىپپەنى باسىپ قالادى. قانعا بوككەن قىلمىسكەر دە قاراپ قالماي, ايەلدى ءبىر قويىپ جالپ ەتكىزەدى دە اتىپ سالادى.
ءارى قاراي جۇرت قۇلاقتانىپ, وڭباسىن بىلگەن ول دەرەۋ سىرتقا اتىلىپ, ماشيناسىنا ءمىنىپ ءۇلگەرەدى.
قىلمىسكەرمەن ارپالىسىپ قانىنا قارايعان ايشاگۇل جاراقاتىنا قاراماي ونىڭ كولىگىن بايقاستايدى.
وق يىعىنان تيگەن ەكەن. جانى كوزىنە كورىنىپ تۇرسا دا ايشاگۇل وتىرار اۋداندىق ىشكى ىستەر بولىمىنە تەلەفون شالىپ, بولعان جايدى مالىمدەيدى. جەدەل جەتكەن ءتارتىپ ساقشىلارىنا قىلمىسكەردىڭ ءتۇر-ءتۇسى, دەنە ءبىتىمى, ءمىنگەن ماشيناسىنا دەيىن سيپاتتاپ بەرەدى.
قىلمىسكەر ارادا ءبىر اي ءوتكەننەن كەيىن ۇستالعان. الىستان كەلگەن جاۋ ەمەس, سول وتىرار اۋدانىنىڭ تۇرعىنى ەكەن. بۇرىن تاراز قالاسىندا ادام ءولتىرىپ سوتتى بولعان. مەرزىمىن وتەگەننەن كەيىنگى تىرلىگى وسى. تۇرمە, باس بوستاندىعى ساباق بولماعان سابازدىڭ ۇستىنەن قر قك-ءنىڭ 179-بابىنا سايكەس قىلمىستىق ءىس قوزعالىپ, تەرگەۋ امالدارى ءجۇرۋدە. ال اۋىر قىلمىستى اشۋعا جاردەمدەسكەن ايشاگۇل يباشەۆا جاقىندا ءىىم-ءنىڭ قۇرمەت گراموتاسىمەن ماراپاتتالدى. ىشكى ىستەر مينيسترىنىڭ ورىنباسارى, پوليتسيا گەنەرالى راشيد جاقىپوۆتىڭ قولىنان گراموتا الدى.
ايشاگۇلدى جەرلەستەرى باتىرعا تەڭەيدى. قىسىلتاياڭ شاقتا قىلمىسكەردىڭ ىرقىندا كەتپەي, ەرلەرگە لايىق ەرلىك كورسەتكەن كەلىنشەك قاۋىپتى ويلاپ ۇلگەرمەگەنىن ايتادى. باتىرلىق قانىندا بار-اۋ, ءسىرا!
باقتيار تايجان,
«ەگەمەن قازاقستان».
شىمكەنت.