استانادا اۋەسقوي سپورتشىلار اراسىندا بەلگىلى اقىن, مەملەكەتتىك سىيلىقتىڭ لاۋرەاتى نەسىپبەك ايت ۇلىن ەسكە الۋعا ارنالعان بيلياردتان رەسپۋبليكالىق تۋرنير ءوتتى. جارىسقا بەلگىلى قالامگەرلەر, زيالى قاۋىم وكىلدەرى, جالپى سانى قىرىققا جۋىق ادام قاتىستى.
استانا قالاسى اكىمىنىڭ ورىنباسارى ەسەت بايكەن ءتۋرنيردىڭ اشىلۋىمەن قۇتتىقتاپ, قاتىسۋشىلارعا ساتتىلىك تىلەدى. ۇزەڭگىلەس دوستارى, قالامگەرلەر قاۋىمى اقيىق اقىن تۋرالى ەستەلىكتەر ايتتى. اتالعان ءىس-شاراعا باستاماشى بولعان سەناتور, قانىش ساتباەۆ اتىنداعى حالىقارالىق قوردىڭ قامقورشىلىق كەڭەسىنىڭ توراعاسى التىنبەك نۋح ۇلى اتاپ وتكەندەي, اقىننىڭ ارتىندا قالعان مول مۇراسىن كوپشىلىككە ناسيحاتتاۋ اسا ماڭىزدى.
– قازاقتىڭ عۇلاماسى, اكادەميك قانىش ساتباەۆتىڭ 125 جىلدىعى اياسىندا وسى تۇلعانىڭ الىپ بولمىسىن تاماشا سومداعان «قانىش» پوەماسىنىڭ اۆتورى, اقىن نەسىپبەك ايت ۇلىن ەسكە الۋ كەشىن ۇيىمداستىرۋدى ءجون كوردىك, – دەدى التىنبەك نۋح ۇلى.
ارىپتەسىمىز, «Egemen Qazaqstan» گازەتىنىڭ ءفوتوتىلشىسى ەرلان وماروۆ تۋرنير جەڭىمپازى اتانىپ, ءبىرىنشى ورىنعا, نەسىپبەك ايت ۇلى اتىنداعى جۇلدەگە يە بولدى. ەكىنشى ورىندى, مۇقاعالي ماقاتاەۆ اتىنداعى جۇلدەنى سەنات دەپۋتاتى امانگەلدى تولاميسوۆكە بۇيىردى, ءۇشىنشى جۇلدەلى ورىن, مۇزافار الىمباەۆ اتىنداعى جۇلدە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ فوتوگرافى ەربول سەيىتحان ۇلىنا بۇيىردى.
قانىش ساتباەۆ اتىنداعى جۇلدەنى ەڭبەك ارداگەرى وڭداسىن مەيىرباەۆ, مەدەۋ سارسەكە اتىنداعى جۇلدەنى قازاقستاننىڭ ەڭبەك سىڭىرگەن قايراتكەرى اياعان ساندىباي, كاكىمبەك سالىقوۆ اتىنداعى جۇلدەنى ارداگەر جۋرناليست ءالىمجان سابىرجان ۇلى, نۇرتاس وڭداسىنوۆ اتىنداعى جۇلدەنى قازاقستاننىڭ ەڭبەك سىڭىرگەن قايراتكەرى, بەلگىلى اكتەر نارتاي ساۋدانبەك ۇلى يەلەندى. بۇعان قوسا بەس جۇلدە – «العاشقى شار», «مەرگەن ويىنشى», «شەبەر ويىنشى», «مادەنيەتتى ويىنشى», «ۇزدىك دۋپلەت» اتالىمدارىنىڭ يەگەرلەرى دە انىقتالدى. جارىس جەڭىمپازدارى مەن جۇلدەگەرلەرىنە ارنايى سىي-سياپات تابىستالدى. ءتۋرنيردىڭ باس تورەشىسى ۇلتتىق دارەجەدەگى تورەشى, بەلگىلى سپورت ءجۋرناليسى نەسىپ ءجۇنىسباي ۇلى بولدى.