قازاقستاننىڭ ەڭبەك سىڭىرگەن مۇعالىمى, كسرو مەملەكەتتىك سىيلىعىنىڭ لاۋرەاتى قانيپا بىتىباەۆا وتكەن جىلدىڭ قىركۇيەگىندە ماڭگىلىك ساپارعا اتتانعان ەدى. بۇگىن ونىڭ تۋعانىنا 70 جىل تولىپ وتىر. سول اتاۋلى مەرەيتويى قارساڭىندا ۇلت ۇستازى ەڭبەك ەتكەن مەكتەپتە جەكە مۇراجاي اشىلدى. جامبىل اتىنداعى ءبىلىم ۇياسىندا اتى اڭىزعا اينالعان ۇلاعاتتى ۇستاز عۇمىرىنىڭ تەڭ جارتىسىن وتكىزىپ, مىڭداعان شاكىرتىنىڭ جۇرەگىنە ءبىلىم شامشىراعىن جاقتى. وقۋشىلارى سان قىرلى ونەرىمەن تاڭعالدىراتىن بۇل قارا شاڭىراق سوناۋ كەڭەستىك ۋاقىتتا وزگە ۇلتى كوپ قالادا ۇلتتىق رۋحتىڭ وشاعى بولدى. سونىڭ باستاۋىندا قانيپا ومارعاليقىزى تۇرىپ, وزگەلەردى جۇمىلدىرىپ اباي, شاكارىم, مۇحتار تاعىلىمى ارقىلى كەلەشەك ۇرپاقتىڭ ساناسىن وياتۋعا قىزمەت ەتكەنى ايتارلىقتاي ەرلىك. ەل ازاماتتارى, شاكىرتتەرى, تۋىستارى قانيپا اپانىڭ ءوزى تۇرعان ۇيىنە مەموريال-تاقتا ورناتتى. س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە عىلىم سالاسىندا جۇرگەن ءىزباسارلارىنىڭ ۇيىمداستىرۋىمەن ۇستازدىڭ اتىندا ءدارىسحانا اشىلىپ, ەستەلىكتەر كىتابىنىڭ تۇساۋى كەسىلدى, ەسكە الۋ كەشى ءوتتى. سونداي-اق, قانيپا بىتىباەۆا اتىنداعى قازاق ءتىلى مەن ادەبيەتىنەن وتكەن رەسپۋبليكالىق وليمپياداعا ەلىمىزدىڭ تۇكپىر-تۇكپىرىنەن 150-گە جۋىق وقۋشىنىڭ كەلۋى دە ۇستاز ەسىمىن ۇلىقتاۋدا اتقارىلىپ جاتقان يگى شارالاردىڭ ءبىرى بولدى.
سالتاناتتى جيىنعا مەكتەپ ۇجىمىمەن بىرگە قالاداعى باسقا ءبىلىم وردالارى دا اتسالىستى. ماسەلەن, №16 مەكتەپتىڭ «مۇراگەر» وركەسترىنىڭ ونەرپازدارى كۇمبىرلەتە كۇي ويناسا, ەكسپو-2017 نەگىزىندە ۇيىمداستىرىلعان وقۋشىلار جوبالارىنىڭ كورمەسى ءوتتى. سونداي-اق, سالتاناتتى شاراعا قاتىسۋشىلار قازاق ءتىلى مەن ادەبيەتىن وقىتۋدىڭ ءتيىمدى ءادىس-تاسىلدەرىن پەداگوگيكا ءتاجىريبەسىنە ەنگىزۋ بولىپ تابىلاتىن ق.بىتىباەۆانىڭ زەرتحاناسىندا وقۋشىلاردىڭ عىلىمي جوبالارى تانىستىرىلدى. ءارينە, ءىس-شارانىڭ باستى كەزەڭى – ق.بىتىباەۆا مۇراجايىنىڭ سالتاناتتى اشىلۋى بولدى. وبلىس اكىمىنىڭ ورىنباسارى جاقسىلىق ومار ۇلت ۇستازىنىڭ ەلىمىزدىڭ ءبىلىم سالاسىن دامىتۋعا قوسقان ەلەۋلى ەڭبەگىن ايرىقشا اتاپ ءوتتى. اتالعان شاراعا استانادان ارنايى كەلگەن پۋبليتسيست-جازۋشى, «ەگەمەن قازاقستان» گازەتىنىڭ شولۋشىسى سۇلەيمەن مامەت قانيپا بىتىباەۆانىڭ كلاسسيكالىق جانە قازىرگى كەزەڭ ادەبيەتىنىڭ ەستەتيكالىق سىرىن, اباي, مۇحتار ءومىرى مەن شىعارماشىلىعى نەگىزىندە قازاق حالقىنىڭ رۋحاني مادەنيەتىن تەرەڭ ۇعىنۋداعى ەڭبەگىن ەرەكشە اتاپ ءوتتى.
سالتاناتتى شارا سوڭى ۇلاعاتتى ۇستازدىڭ رۋحىنا ارنالعان اس بەرۋگە ۇلاستى.
جيىنعا ۇستازدىڭ زامانداستارى, ارىپتەستەرى مەن شاكىرتتەرى, س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى, «ورلەۋ» باۇو» اق وبلىستىق فيليالى جەتەكشىلەرى مەن وكىلدەرى جانە وڭىردەگى مەكتەپ ۇستازدارى, ارداگەر-پەداگوگتار قاتىستى.
مۇعالىم مۇراجايىنىڭ اشىلۋىنا بارلىق قامقورلىقتى جاساعان وبلىس اكىمدىگىنىڭ ءبىلىم باسقارماسىنىڭ, ونى ۇتىمدى ۇيىمداستىرعان جامبىل اتىنداعى دارىندى بالالارعا ارنالعان مەكتەپ-گيمنازيا-ينتەرناتى ۇجىمىنىڭ ەڭبەگىن اتاپ ءوتۋدى پارىز سانايمىز.
دۋمان اناش,
«ەگەمەن قازاقستان».
وسكەمەن.