بۇگىن پرەزيدەنت قاسىم-جومارت توقاەۆتىڭ جەتىسۋ وبلىسىنا ساپارى قاراتال اۋدانىندا جالعاستى, دەپ جازادى Egemen.kz.
مەملەكەت باسشىسى ەسكەلدى بي اۋىلىندا بيىل پايدالانۋعا بەرىلگەن مادەنيەت ءۇيى مەن سپورت كەشەنىنىڭ عيماراتتارىن ارالاپ كوردى.
جەرگىلىكتى بيۋدجەت ەسەبىنەن بوي كوتەرگەن 150 ورىندىق مادەنيەت ۇيىندە كىتاپحانا, اجەلەر مەن دومبىراشىلار انسامبلدەرى, بي ۇيىرمەسى سەكىلدى ۇجىمدار ورنالاسقان. قاسىم-جومارت توقاەۆ اۋىل كىتاپحاناسىمەن تانىستى. سونداي-اق ونەرپاز بالالارمەن جۇزدەسىپ, ەلىمىزدىڭ لايىقتى ازاماتى بولىپ وسۋىنە تىلەكتەستىك ءبىلدىردى.
پرەزيدەنت اۋىل بالالارىمەن اڭگىمەلەسىپ, مەملەكەت تاراپىنان وسكەلەڭ ۇرپاقتىڭ الاڭسىز ءبىلىم الۋىنا, سپورتپەن اينالىسۋىنا قولايلى جاعداي جاسالاتىنىن جەتكىزدى.
پرەزيدەنت مادەنيەت ۇيىنە مۋزىكالىق جابدىقتار مەن سۋرەتشى ءا.ءبايانديننىڭ كارتيناسىن تارتۋ ەتتى.
بيىل وبلىستىڭ شالعاي اۋىلدارىنداعى بەس مادەنيەت ءۇيى كۇردەلى جوندەۋدەن ءوتىپ, سەگىز كلۋب جاڭادان سالىنعان.
سونىمەن قاتار بۇقارالىق سپورتتى دامىتۋ ماقساتىندا ەلدى مەكەندەردە 15 شاعىن سپورت نىسانى اشىلدى. سونىڭ ءبىرى – ەسكەلدى بي اۋىلىنداعى سپورت كەشەنى. اۋىل تۇرعىندارى مۇندا توعىزقۇمالاق, شاحمات, دويبى ۇيىرمەلەرىنە, بوكس, كۇرەس, ۆولەيبول, باسكەتبول سەكتسيالارىنا قاتىسادى.