«قازاق گازەتتەرى» جشس مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى باسشىلىعى اراسىنداعى كەلىسىم ناتيجەسىندە بولاشاق جۋرناليستەردىڭ تەوريالىق ءبىلىمىن وندىرىستە, تاجىريبە جۇزىندە ۇشتاستىرۋعا مۇمكىندىك جاسالىپ وتىر. اتالعان وقۋ ورنىنىڭ جۋرناليستيكا جانە الەۋمەتتىك عىلىمدار فاكۋلتەتىندە ءبىلىم الىپ جاتقان ستۋدەنتتەردىڭ تاجىريبەلىك ساباقتارى بىلتىردان بەرى «Egemen Qazaqstan» گازەتىنىڭ رەداكتسياسىندا ءوتىپ كەلەدى.
جالپى, ەۋرازيا ۇلتتىق ۋنيۆەرسيتەتىندە پراكتيك مامانداردى وقىتۋشىلىق قىزمەتكە شاقىرۋ تاجىريبەسى بۇرىننان بار. ءبىلىم ورداسى مەن ەڭبەك ۇجىمدارى, جۇمىس بەرۋشى مەكەمەلەر اراسىنداعى ۋاعدالاستىق نەگىزىندە ستۋدەنتتەردىڭ وندىرىستىك تاجىريبەدەن ءوتۋى دە جۇيەلى جولعا قويىلعان. رەداكتسيادا جۇمىس ۇدەرىسىمەن تانىسا وتىرىپ, بىلىكتى مامانداردىڭ ءدارىسىن تىڭداپ, تاجىريبەلىك ساباقتان ءتالىم الۋى – بولاشاق جاس جۋرناليستەرگە تاپتىرماس ازىق.
جۋرناليستيكا جانە الەۋمەتتىك عىلىمدار فاكۋلتەتىنىڭ دەكانى قايرات ساق ۇلتتىق ۋنيۆەرسيتەت پەن ەلىمىزدەگى ءىرى مەدياقۇرىلىم اراسىنداعى ارىپتەستىك بايلانىس ساپالى مامان دايارلاۋعا ىقپال ەتەتىنىن ايتادى.
«فاكۋلتەت ستۋدەنتتەرىنىڭ تاجىريبەلىك ساباعىن گازەت رەداكتسياسىندا وتكىزۋگە قولداۋ كورسەتكەن «قازاق گازەتتەرى» جشس باسشىلىعىنا العىس بىلدىرەمىز. ستۋدەنتتەرىمىز ءۇشىن 105 جىلدىق تاريحى بار باسىلىمنىڭ رەداكتسياسىندا تاجىريبەدەن ءوتىپ, ءتالىم الۋى – زور بەدەل, ۇمىتىلماس مەكتەپ», دەيدى ق.ساق.
رەداكتسياداعى تاجىريبەلىك ساباقتاردى جۇرگىزگەن باس رەداكتوردىڭ ورىنباسارى, پراكتيك-اعا وقىتۋشى قۋات اۋەسبايدىڭ ايتۋىنشا, بيىلعى وقۋ سەمەسترىندە «ەگەمەن» رەداكتسياسىندا 1-كۋرس ستۋدەنتتەرىنە «جۋرناليستيكاعا كىرىسپە», 4-كۋرس ستۋدەنتتەرىنە «مەدياداعى مەنەدجمەنت پەن ماركەتينگ» پاندەرى بويىنشا تاجىريبەلىك ساباقتار ءوتتى.
ء«جۇز ەستىگەننەن ءبىر كورگەن ارتىق» دەگەن قاعيداعا سالساق, بولاشاق جۋرناليستەردىڭ تاجىريبەلىك ساباقتارىن ءسوز زەرگەرلەرىنىڭ قۇتحاناسىندا وتكىزۋدىڭ تيىمدىلىگى كوپ. قانشا جەردەن مۋلتيمەديالىق جۋرناليستيكا زامانى دەسەك تە, ءجۋرناليستىڭ ەڭ ءبىرىنشى مىندەتى – ساۋاتتى جازۋ. سوندىقتان رەداكتسيادا وتكەن دارىستە ەڭ الدىمەن ستۋدەنتتەردىڭ جازۋ قابىلەتىن, سىني ويلاۋ, ساراپتاي ءبىلۋ داعدىسىن شىڭداۋعا تىرىستىق», دەيدى ق.اۋەسباي.
«جۋرناليستيكاعا كىرىسپە» ءپانى – بىزگە, 1-كۋرس ستۋدەنتتەرىنە قىزىقتى ءارى اسەرلى ساباقتاردىڭ ءبىرى بولدى. جۋرناليستيكا الەمىنە العاشقى قادامىمىزدى نىق باسىپ, ونىڭ قىر-سىرىنا تەرەڭ بويلادىق. ساباقتىڭ ەرەكشەلىگى «Egemen Qazaqstan» گازەتىنىڭ رەداكتسياسىندا ءوتۋى ەدى. رەداكتسيادا تاجىريبە جيناپ, شىنايى جۋرناليستيكانىڭ اۋراسىن سەزىندىك. ونىڭ اسەرى ەرەكشە بولدى. تەوريالىق ءبىلىمدى تاجىريبەمەن ۇشتاستىرۋ ءبىز ءۇشىن كەرەمەت مۇمكىندىك سىيلادى. ويىڭدى اشىق جەتكىزە الاتىن ەركىن ورتا جانە جاڭاشا يدەيالاردىڭ تۋىنداۋىنا ىقپال ەتەتىن جايلى اتموسفەرا – وسىنىڭ ءبارى ساباقتىڭ قۇندىلىعىن ارتتىرا ءتۇستى. وسىنداي مۇمكىندىك جاساعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن ديحان قامزابەك ۇلى باستاعان مەدياقۇرىلىم ۇجىمىنا العىسىمىز شەكسىز», دەيدى 1-كۋرس ستۋدەنتى ەلدارا ساعاديقىزى.
«عاسىرلىق تاريحى بار باسىلىمدا, جۋرناليستيكانىڭ قارا شاڭىراعىندا ءبىلىم العان ءبىر سەمەستردە ويعا توقىپ, ساناعا تۇيگەنىمىز از ەمەس. گازەتتەگى ماركەتينگ مەن مەنەدجمەنتتەن باستاپ, باسىلىم مەن وقىرمان بايلانىسىنا قاتىستى سۇراقتارعا جاۋاپ الدىق. اقش, ۇلىبريتانيا, تۇركيا سىندى ەلدەردىڭ باسپا تاريحى مەن ەلىمىزدىڭ گازەتتەرىن سالىستىرا تالداپ, جاڭاشىلدىقتى باعامدادىق. گازەت جۇمىسىن ۇيىمداستىرۋ ەرەكشەلىكتەرى, رەداكتسيالىق ساياسات, مەدياداعى زاماناۋي ترەندتەر, كونۆەرگەنتتى جۋرناليستيكا تاقىرىبى توڭىرەگىندە پىكىر الماسىپ, ويىمىزدى ورتاعا سالدىق. ءسوز ونەرىنىڭ الىپتارى ەڭبەك ەتكەن «Egemen Qazaqstan» گازەتىنىڭ رەداكتسياسىندا وزەكتى دە وتكىر, ەندى بىردە ەركىن تاقىرىپتاردى تولعانا تارقاتقانىمىز ۇلكەن تاجىريبە بولاتىنى ءسوزسىز», دەيدى 4-كۋرس ستۋدەنتى راشيد كەمەلبەك.
ءبىلىم ورداسى مەن باق اراسىندا ستۋدەنتتەردىڭ وندىرىستىك تاجىريبەدەن ءوتۋ ءۇردىسى بۇرىننان بار بولعانىمەن, ساباقتىڭ رەداكتسيادا ءوتۋى العاش قولعا الىنعان ىلكىمدى جوبا ەكەنىن ايتقان ءلازىم.