قازاق گۋمانيتارلىق زاڭ ۋنيۆەرسيتەتىندە قازاقستان حالقى اسسامبلەياسىنىڭ قامقورلىعىمەن ەلىمىزدىڭ ءار ايماعىنان مىڭنان استام مەكتەپ تۇلەگى قاتىسقان «ءبىر ەل – ءبىر تاعدىر» اتتى رەسپۋبليكالىق ينتەللەكتۋالدى شىعارمالار بايقاۋى ءوتتى. بۇل بايقاۋ قحا-نىڭ 20 جىلدىعىنا ورايلاستىرىلدى.
بايقاۋ ءۇش كەزەڭنەن تۇردى. العاشقى كەزەڭدە مەكتەپ وقۋشىسى «ءبىر ەل – ءبىر تاعدىر» تاقىرىبىندا ءوزى قالاعان ورىس نەمەسە قازاق تىلىندە ەسسە جازىپ جىبەرۋى ءتيىس ەدى. بۇل رەتتە, اتالعان تاقىرىپ قازاقستان حالقى اسسامبلەياسى تاراپىنان ۇسىنىلعانىن ايتا كەتۋ كەرەك. جالپى, بايقاۋعا ۇسىنىلاتىن تاقىرىپتار مەملەكەت جانە ونى باسقارىپ وتىرعان ەلباسى تاراپىنان جۇرگىزىلىپ كەلە جاتقان ساياساتپەن تىعىز بايلانىستى. قازاق گۋمانيتارلىق زاڭ ۋنيۆەرسيتەتىنىڭ پرەزيدەنتى ماقسۇت نارىكباەۆ جىل سايىن وتكىزىلىپ تۇراتىن شاراعا بىلتىر 600-دەن استام مەكتەپ تۇلەگى قاتىسسا, بيىل ولاردىڭ سانى مىڭنان اسقانىن جەتكىزدى. سونىڭ ىشىنەن 250 جۇمىس تاڭداپ الىنىپ, كەلەسى كەزەڭدەرگە جىبەرىلگەن.
اسسامبلەيا ۇسىنعان تاقىرىپتا ەسسە جازۋدان جەڭىمپاز اتانعان ماحاببات ەسىمدى قىز بالامەن سويلەسكەنىمىزدە ول بىلاي دەدى: «مەنىڭ ويىمشا, بۇل ەل جاسوسپىرىمدەرىنىڭ ءوز دارىنىن كورسەتۋىنە جانە ۇزدىك وقۋ ورنىنا تۇسۋىنە ۇلكەن مۇمكىندىك». ال ءوزىن ۆالەريا دەپ تانىستىرعان قاراعاندىلىق ستۋدەنت بىلتىر جەڭىمپاز اتانىپ, گرانتقا يە بولعانىن العا تارتتى.
ءبىرىنشى سىناقتان سۇرىنبەي وتكەندەر «قازگزۋ» اق كورپۋسىندا قازاقستان تاريحى پانىنەن كومپيۋتەرلىك تەستىلەۋ نىسانىندا ەمتيحان تاپسىردى. ءۇشىنشى شەشۋشى كەزەڭدە مەكتەپ تۇلەكتەرى كوميسسيا مۇشەلەرىمەن سۇحباتتاستى. كوميسسيا مۇشەلەرى قۇرامىندا قازاقستان حالقى اسسامبلەياسىنىڭ وكىلدەرى – پارلامەنت ءماجىلىسىنىڭ دەپۋتاتى زۋحرا ساياپوۆا, «قوعامدىق كەلىسىم» مم قىزمەتىنىڭ باسشىسى نۇربەك شاياحمەتوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وكىلدەرى جانداربەك مالىبەكوۆ, زيابەك قابىلدينوۆ جانە دە قازاق گۋمانيتارلىق زاڭ ۋنيۆەرسيتەتىنىڭ قازاقستان تاريحى جانە جالپى ءبىلىم بەرۋ كافەدراسىنىڭ پروفەسسورلارى ءجانيا قۇسايىنوۆا مەن لەپۋدا مۇقاتاەۆا بولدى.
م.نارىكباەۆ ءسوز رەتى كەلگەندە كوميسسيا مۇشەلەرىنىڭ, بالالار ەڭبەگىن باعالاۋدا اشىقتىق پەن ادىلدىككە جۇگىنەتىنىنە سەنىم ءبىلدىردى. جىل سايىن مۇنداي شارالاردى وتكىزۋدەگى باستى ماقسات اۋىلداعى تالانتتى بالالاردى ىرىكتەپ, تەگىن ءبىلىم بەرۋگە تارتۋ ەكەنىن دە اتاپ كورسەتتى. بىراق بالالار دا سول تەگىن ءبىلىمدى وزدەرىنىڭ كورسەتكىشتەرىمەن اقتاۋى ءتيىس, ەگەر ولاي بولماعان جاعدايدا, ولاردىڭ ورنىن باسقالارى باساتىن بولادى, دەدى رەكتور. بۇل رەتتە, ۋنيۆەرسيتەت 100 ميلليون تەڭگە كولەمىندە گرانتتار مەن جەڭىلدىكتەر تۇرىندە ستۋدەنتتەرگە قارجىلىق كومەك كورسەتىپ كەلە جاتقاندىعىن ايتا كەتۋ كەرەك.
سونىمەن, بەلگىلەنگەن ءۇش كەزەڭنەن سۇرىنبەي وتكەن ينتەللەكتۋالدى بايقاۋدىڭ 10 جەڭىمپازىنا سالتاناتتى تۇردە قازاق گۋمانيتارلىق زاڭ ۋنيۆەرسيتەتىندە تەگىن ءبىلىم الۋ گرانتى تاپسىرىلدى. بۇدان باسقا, بايقاۋدىڭ ەرەجەسى بويىنشا بارلىق قاتىسۋشىعا 10 پايىزدىق جانە ەكىنشى كەزەڭگە وتكەندەرگە 20 پايىزدىق جەڭىلدىكتەر بەرىلەتىن بولدى.
اسقار تۇراپباي ۇلى,
«ەگەمەن قازاقستان».