قر وقۋ-اعارتۋ مينيسترلىگى قاۋىپسىز جانە قولداۋشى ءبىلىم بەرۋ ورتاسىن قۇرۋعا باعىتتالعان «100 مەدياتيۆتى مەكتەپ» جوباسىن ىسكە قوسىپ جاتىر. باستاما شەڭبەرىندە ەلىمىزدىڭ بارلىق مەكتەبىندە قاقتىعىستاردى ءتيىمدى شەشۋگە جانە وقۋشىلار, پەداگوگتەر مەن اتا-انالار ءۇشىن جاعىمسىز سالداردىڭ الدىن الۋعا ىقپال ەتەتىن مەكتەپ مەدياتسياسى قىزمەتتەرى جۇمىس ىستەي باستايدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
وسى قىزمەتتەردىڭ جۇمىسىنا بىرىڭعاي ءتاسىلدى قامتاماسىز ەتۋ ءۇشىن ى.التىنسارين اتىنداعى كەاق ازىرلەگەن ادىستەمەلىك ۇسىنىمدار بەكىتىلگەن. ولار مەكتەپتەگى مەدياتسيا قىزمەتتەرىن قۇرۋ جانە ولاردىڭ تابىستى جۇمىس ىستەۋى ءۇشىن قاجەتتى تەوريالىق جانە پراكتيكالىق ماتەريالداردى قامتيدى. بۇل ۇسىنىمدار ءبىلىم بەرۋ ۇيىمدارىندا مەدياتيۆتىك پراكتيكالاردى ەنگىزۋ ءۇشىن نەگىز بولادى.
«نەگىزگى ماقسات - قيىن ومىرلىك جاعدايلاردا قولداۋ كورسەتۋ, بالالاردى دامىتۋ جانە الەۋمەتتەندىرۋ ءۇشىن قولايلى جانە قاۋىپسىز ورتا قۇرۋ. بۇدان بولەك, مۇندا وتباسىلىق-قۇقىقتىق داۋلاردى شەشۋگە جاردەم كورسەتىلەدى. مەكتەپ قىزمەتتەرى قاقتىعىستاردى رەتتەۋدىڭ ماڭىزدى قۇرالى بولىپ تابىلادى, ال مەدياتيۆتىك پراكتيكالاردى پايدالانۋ داۋلى جاعدايلاردىڭ سانىن قىسقارتۋعا جانە وقۋ ورىندارىنداعى پسيحولوگيالىق احۋالدى جاقسارتۋعا مۇمكىندىك بەرەدى», دەدى قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا.ايتا كەتەيىك, مەدياتسيا قىزمەتىنە جوعارى سىنىپ وقۋشىلارى, پەداگوگتەر, پەداگوگ-پسيحولوگتار, الەۋمەتتىك پەداگوگتەر, اتا-انالار, سونداي-اق ۇكىمەتتىك ەمەس ۇيىمداردىڭ, قامقورشىلىق كەڭەستەردىڭ جانە اعا ۇرپاقتىڭ وكىلدەرى كىرەدى.