قوستاناي. 17 ماۋسىم. قوستانايدا «دۋسلىق» تاتار-باشقۇرت ەتنومادەني ورتالىعى سابانتۋي مەرەكەسىن اتاپ ءوتتى. وندا تاتارستاننىڭ پرەزيدەنتى رۋستام ميننيحانوۆتىڭ قوستانايلىق قانداستارىن سابانتۋي مەرەكەسىنە جولداعان قۇتتىقتاۋ ءسوزىن تاتارستان رەسپۋبليكاسىنىڭ حالىق ءارتىسى, بايانيست, ءانشى راميل قۇرامشين اكەلىپ وقىپ بەردى. بۇل تۋرالى egemen.kz ءتىلشىسى حابارلادى.
تاتار-باشقۇرت ەتنومادەني ورتالىعىنىڭ توراعاسى رەنات بەكتەمىروۆ: «سابانتۋي تاتار مەن باشقۇرت حالىقتارىنىڭ ەجەلگى مەرەكەسىنىڭ ءبىرى. ءبىزدىڭ اتالارىمىز قازاقستاندا 200 جىلدان ارتىق تۇرىپ كەلەدى. مىسالى ءحىح عاسىردىڭ اياعى مەن حح عاسىردىڭ باسىندا ۋفا مەن قازاننان تاتار ساۋداگەرلەرى قوستاناي دالاسىنا كەلگەن. وبلىستىق «دوستىق ءۇيى» اعايىندى تاتار ساۋداگەرلەرى, كاسىپكەرلەرى ياۋشەۆتەردىڭ پاسساجىنا ورنالاسقان. بۇل تاتار ساۋداگەرلەرى باسقا دا مەتسەناتتارمەن بىرلەسىپ, وسى وڭىردەگى العاشقى مۇسىلمان مەشىتىن سالعان بولاتىن. ول دا ءالى كۇنگە قوستانايلىق مۇسىلمان جۇرتىنا قىزمەت ەتىپ كەلەدى, ءۇش جىلدان كەيىن ونىڭ 125 جىلدىعىن تويلايتىن بولامىز. ال بيىل قوستانايدا تاتار-باشقۇرت ەتنومادەني ورتالىعىنىڭ اشىلعانىنا 20 جىل تولادى. بۇل قاۋىمداستىقتىڭ بۇلاق باستاۋىندا زاكيا مۋحسينوۆا, ءتانزيلا حاكيموۆالار تۇردى. قازىر ەكەۋى دە ارامىزدا جوق. يماندى بولسىن, ولار ءبىزدىڭ جۇرەگىمىزدە ساقتالادى», دەدى.
سابانتۋي بۇگىندە بارشا قازاقستاندىقتاردىڭ ورتاق, حالىقتىق مەرەكەسىنە اينالدى. مەرەكەگە جينالعاندار تاتار, باشقۇرت تىلدەرىندە شىرقالعان اندەردى تىڭدادى, بيلەردى تاماشالادى. ال جاستار حالىقتىق سپورتتىق جارىستاردى قىزدىردى. قول كۇرەستىرۋدەن,گىر كوتەرۋ مەن باعاناعا ورمەلەۋدەن وزىپ شىققانعا تاتار حالقىنىڭ داستۇرىمەن قوي سىيعا تارتىلدى. مەرەكەگە جينالعانداردى, اسىرەسە بالالاردى تاتار-باشقۇرت داستارحانى كۇتىپ تۇردى. ولار تاتاردىڭ مەرەكەلىك تاعامدارىن, ساماۋرىندا قايناتىلعان ءيىسى بۇرقىراعان ءشايىن ءىشىپ ءماز بولدى.
وبلىستىق دوستىق ءۇيىنىڭ ديرەكتورى ابدىبەك بوجاقوۆ: «سابانتۋي» قوستانايلىقتار ءۇشىن تانىس, سۇيىكتى مەرەكە. ەكى حالىقتىڭ ديقاندارى دا ەگىن ەگىپ, جيناپ بولعاننان كەيىن قۋانعان, ونى اتاپ وتكەن. مىنە, بۇل سولاي حالىقتىق مەرەكەگە اينالعان. مەرەكەنى بىرگە تويلاعان قاتار تۇركى حالقىنىڭ دوستىعى دا عاسىرلار بويى بىرگە ءورىلىپ كەلگەن», دەدى.
ءنازيرا جارىمبەتوۆا.
دەرەك, سۋرەت: egemen.kz