ەلىمىزدەگى تەحنيكالىق جانە كاسىپتىك ءبىلىم جۇيەسىنە تۇبەگەيلى رەفورمالىق وزگەرىس ەنگىزىپ, ونى ترانسفورماتسيالاۋ كەيىنگى جىلدارى انىق سەزىلدى. وسى ورايدا مەملەكەت باسشىسى 2025 جىلدى «جۇمىسشى ماماندىقتار جىلى» دەپ جاريالاۋى – وسى سالاعا ناقتى وزگەرىس ەنگىزىپ, ەل ەكونوميكاسىن دامىتۋعا باعىتتالعان قادام.
ەندى تەحنيكالىق جانە كاسىپتىك ءبىلىم (تجكب) جۇيەسىن رەفورمالاۋ بويىنشا ەلىمىزدەگى جۇمىسشى كادرلاردى دايارلاۋ جۇيەسىندە قالىپتاسقان ءۇردىستى تۇبەگەيلى قايتا قاراۋ مۇمكىندىگى تۋىپ وتىر. تەحنيكالىق جانە كاسىپتىك ءبىلىم بەرۋ وقۋ ورىندارىندا ساپالى ءبىلىم مەن سانالى تاربيە بەرۋ وركەنيەتتى ەلدەردىڭ ماڭىزدى ماسەلەسى سانالادى. ياعني جۇمىسشى ماماندارىن دايارلاۋ – سان باعىتتى قامتيتىن اسا جاۋاپتى سالا.
وسى تۇرعىدا ەلىمىزدەگى كوللەدجدەر جوعارى وقۋ ورىندارى مەن نەگىزگى جانە ورتا ءبىلىم بەرۋ ۇيىمدارىمەن تىعىز بايلانىسىپ, وسى ءۇش بۋىن اراسىنداعى ىنتىماقتاستىقتى باستى ستراتەگيالىق باعىت دەپ قابىلداۋى قاجەت. دالىرەك ايتقاندا, ءبىلىم الۋشىنىڭ مانسابىن ودان ءارى دامىتىپ, ۇگىت-ناسيحات جۇمىستارى مەن پايدالى كەڭەس بەرۋدىڭ ورتاق ۇلگىسىن جاساپ, ونى ءبىلىم بەرۋ جۇيەسىنە ەنگىزۋ, ءتيىمدى جولعا قويۋ نەگىزگى نىسانامىزعا اينالماق. وسى ماقساتتا جوعارىدا ايتقان ءۇش بۋىن, ياعني ءبىلىم سالاسىنىڭ ورتاق ءارى بىرەگەي جۇيەسىنە بەت بۇرۋى كەرەك.
كەلەسى نازار اۋداراتىن ماسەلە: ايماقتارداعى كوللەدجدەر ءوز ماماندىقتارى بويىنشا ۇگىت-ناسيحات ورتالىقتارىن قۇرۋ. بۇل جۇمىسقا جاڭاشا سەرپىن بەرەدى. مەملەكەت باسشىسىنىڭ ءوز جولداۋىندا «كاسىپتىك ءبىلىم بەرۋ رەفورماسى ەكونوميكانىڭ ءوسۋىن قامتاماسىز ەتۋ جانە ونىڭ ينۆەستيتسيالىق الەۋەتى تۇرعىسىنان وتە ماڭىزدى بولىپ وتىر», دەگەنى دە وسى ماسەلەنىڭ وزەكتىلىگىن بىلدىرەدى.
مەملەكەت باسشىسى جاريالاعان «جۇمىسشى ماماندىقتار جىلىنداعى» تاعى ءبىر يگى باستاما – ول ايماقتاعى تەحنيكالىق جانە كاسىپتىك ءبىلىم بەرۋ وشاقتارىنىڭ يننوۆاتسيالىق جانە رەنتابەلدى ماماندىقتار اشۋىندا.
جۋىردا ۇكىمەت وتىرىسىندا وقۋ-اعارتۋ مينيسترلىگىنە سالالىق مينيسترلىكتەرمەن بىرلەسىپ, تەحنيكالىق جانە كاسىپتىك ءبىلىم بەرۋدى رەفورمالاۋ جونىندەگى كەشەندى جوسپار ازىرلەۋ تاپسىرىلدى. بۇگىنگى كوللەدجدەر بۇل ماقساتتى ورىنداۋ ءۇشىن مەملەكەت تاراپىنان بىرنەشە شارتتى ىسكە اسىرۋ قاجەت. ماسەلەن:
– جان باسىنا شاققانداعى ءاربىر ستۋدەنتكە بولىنەتىن قاراجاتتى كەمىندە ەكى-ءۇش ەسە كوبەيتۋ;
– ايماقتاعى نەمەسە اۋىلداعى كوللەدجدەردىڭ كاسىبي ءبىلىم بەرۋ بازاسىن نىعايتا وتىرىپ, ءبىلىم ءۇردىسى جاقسى جولعا قويىلعان كوللەدجدەردى سول ءوڭىردىڭ نەگىزگى تىرەۋىش ورتالىعىنا اينالدىرۋ. وعان باسقا دا وقۋ ورىندارىن تارتىپ, جان-جاقتى ساپاسىن ارتتىرۋ;
– كوللەدجدەردە جاڭا ماماندىقتار اشۋداعى ليتسەنزيالاردى يەمدەنۋ مۇمكىندىگىن بارىنشا جەڭىلدەتۋ;
– استانا نەمەسە الماتى قالاسىندا «World Skills» اكادەمياسىن قۇرۋ;
– تەحنيكالىق جانە كاسىپتىك ءبىلىم بەرۋ ۇيىمدارىن ۇزدىك تامامداعان تۇلەكتەرگە مەملەكەتتىك قىزمەتكە ورنالاسۋىن وڭتايلاندىرىپ, جەڭىلدەتۋ;
– ءپروفيلدى جوعارى وقۋ ورىندارى كوللەدجدەردى ءوز قامقورلىعىنا الا وتىرىپ, ادىستەمەلىك باعىت بويىنشا ىنتىماقتاستىعىن ارتتىرۋ;
– تەحنيكالىق-كاسىپتىك ءبىلىم بەرۋ ۇيىمدارى ستۋدەنتتەر مەن پەداگوگتەرگە ارنالعان ءوزارا اكادەميالىق ۇتقىرلىق ەنگىزۋ;
– پەداگوگتەردى الەمدىك دەڭگەيدەگى ۇزدىك كوللەدجدەردەن تاعىلىمدامادان ءوتۋدى ۇيىمداستىرۋ;
– شەتەلدىك ۇزدىك مەنەدجەر جانە وقىتۋشىلارىمەن تاجىريبە الماسۋ;
– تەحنيكالىق كوللەدجدەر بازاسىندا ارنايى اسكەري كافەدرا مەن زاپاستاعى سەرجانتتار دايارلايتىن اسكەري ورتالىق اشۋ;
– تەحنيكالىق كوللەدجدەر نىسانىندا جاساندى ينتەللەكت ورتالىعىن قۇرۋ.
مىنە, پرەزيدەنت جولداۋىنان وسىنداي پاراساتتى وي تۇيدىك. بۇل جۇمىسشى ماماندىق يەلەرىنىڭ ءبىلىم-بىلىكتىگىن ارتتىرۋداعى تىڭ يدەيا, يگى باستاماعا العى-شارت رەتىندە ىقپال ەتەرى انىق.
دينار نوكەتاەۆا,
سەناتورلار كەڭەسىنىڭ مۇشەسى,
پەداگوگيكا عىلىمدارىنىڭ كانديداتى