قانات بوزىمباەۆ تجم, ءىىم جانە اكىمدىكتەردىڭ الداعى مەرەكە كۇندەرى قاۋىپسىزدىكتى قامتاماسىز ەتۋگە دايىندىعىن تەكسەردى. ۆيتسە-پرەمەر قابىلدانىپ جاتقان شارالار تۋرالى جاۋاپتى مينيسترلىكتەر مەن ءوڭىر اكىمدىكتەرىنىڭ ەسەپتەرىن تىڭدادى, دەپ حابارلايدى Egemen.kz.
«جەلتوقساندا ءورت قاۋىپسىزدىگى ايلىعى باستالدى. توتەنشە جاعدايلار مينيسترلىگى العاشقى اپتانىڭ ىشىندە ەلدى مەكەندەردەگى 2,5 مىڭنان استام ءۇيدى قامتيتىن پروفيلاكتيكالىق رەيدتەر وتكىزدى. پەشتەر مەن ەلەكتر جۇيەلەرى تەكسەرىلەدى. سونداي-اق پيروتەحنيكالىق بۇيىمداردى پايدالانۋ ەرەجەلەرى تۇسىندىرىلەدى», دەلىنگەن حابارلامادا.
ىشكى ىستەر مينيسترلىگىمەن بىرلەسىپ, «پيروتەحنيكا» جەدەل-پروفيلاكتيكالىق ءىس-شاراسى ءوتىپ جاتىر. 670 ءموبيلدى توپ قۇرىلىپ, پيروتەحنيكانى ساقتاۋ جانە تاراتۋ ورىندارى بويىنشا 78 رەيدتىك ءىس-شارا وتكىزىلگەن. رۇقسات ەتىلمەگەن ساۋدا ءۇشىن 21 ادام اكىمشىلىك جاۋاپكەرشىلىككە تارتىلعان. ەلگە پيروتەحنيكالىق ونىمدەردى زاڭسىز اكەلۋ فاكتىلەرىنىڭ جولىن كەسۋ بويىنشا جۇمىستار جۇرگىزىلىپ جاتىر. مەرەكە قارساڭىندا ءىىم مەن تجم قىزمەت كورسەتۋدىڭ كۇشەيتىلگەن جۇمىس رەجيمىنە كوشەدى.
«ويىن-ساۋىق جانە ادامدار كوپ جينالاتىن ورىنداردى الدىن الا تەكسەرۋ قاجەت. ءورت ءسوندىرۋ قۇرالدارىنسىز بۇقارالىق ءىس-شارالار وتكىزۋگە رۇقسات بەرمەۋ قاجەت. ادامداردى شۇعىل ەۆاكۋاتسيالاۋ بويىنشا قىزمەتكەرلەرمەن وقۋ-جاتتىعۋلارىن وتكىزۋ كەرەك. ساۋدا جانە ويىن-ساۋىق ورتالىقتارى, تەاترلار مەن سپورت كەشەندەرىنىڭ پاركينگتەرىنە گاز جابدىقتارى بار اۆتوكولىكتەردىڭ كىرۋىنە جول بەرمەۋگە ەرەكشە نازار اۋدارۋ قاجەت. ءبىز توتەنشە جاعدايلاردىڭ الدىن الۋ بويىنشا كەشەندى شارالار قابىلداۋىمىز كەرەك», دەپ تاپسىردى قانات بوزىمباەۆ.
ۆيتسە-پرەمەر وقۋ-اعارتۋ مينيسترلىگىنە مەن ءوڭىر اكىمدىكتەرىنە قىسقى دەمالىس جانە جاڭا جىلدىق مەرەكەلەر كەزىندە بالالار مەن جاسوسپىرىمدەردىڭ بوس ۋاقىتىن لايىقتى ۇيىمداستىرۋ تاپسىرىلدى. سونداي-اق مادەنيەت جانە اقپارات مينيسترلىگى حالىقتى مەرەكە كۇندەرىندەگى قاۋىپسىزدىك شارالارى تۋرالى كەڭىنەن حاباردار ەتۋى كەرەك.