تاياۋدا كيەۆتە ۋكراينانى قولداۋ جونىندە حالىقارالىق كونفەرەنتسيا ءوتتى.
وندا قازاقستاندىق دەلەگاتسيانى ەكونوميكالىق ينتەگراتسيا ىستەرى ءمينيسترى جانار ايتجانوۆا باسقاردى. ول ورتاق سەسسيادا سويلەگەن سوزىندە «قازاقستان رەسپۋبليكاسى جانە ۋكراينا اراسىنداعى ەكىجاقتى قاتىناستار ءداستۇرلى دوستاس جانە ءوزارا قۇرمەتپەن, ىزگى نيەتتىلىگىمەن ەرەكشەلەنەدى. ەكى ەل اراسىنداعى ىقپالداستىقتىڭ نىعايۋى مەن دامۋىنا پرەزيدەنتتەر نۇرسۇلتان نازارباەۆ جانە پەتر پوروشەنكو كەزدەسۋلەرى مەن كەلىسسوزدەرى زور ىقپال ەتتى. 2014 جىلى 22 جەلتوقساندا كيەۆكە ساپارىنىڭ ناتيجەلەرى بويىنشا, ەلباسى ۋكراينالىق تاراپپەن ساۋدا-ەكونوميكالىق ىقپالداستىقتى بەلسەندىرۋ مىندەتىن قويدى. سول سەبەپتى بۇگىن ءبىز قازاقستان-ۋكراينا ەكونوميكالىق ىنتىماقتاستىعى جونىندەگى مەملەكەتارالىق كوميسسيا شەڭبەرىندە جوبالاردى جۇزەگە اسىرۋعا نيەتتىمىز. ماك وتىرىستارى بارىسىندا 2015-2016 جىلدارعا قازاقستان-ۋكراينا ءىس-قيمىلدار جوسپارىنىڭ جوباسىن تالقىلاۋ كوزدەلگەن, وندا ەكى ەل اراسىندا وتىن-ەنەرگەتيكالىق, اگروونەركاسىپتىك كەشەندەردە, كولىك, عىلىم, ءبىلىم جانە باسقا سالالاردا ىنتىماقتاستىقتىڭ نەگىزگى باعىتتارى قاراستىرىلعان», دەدى.
ۋكراينادا قالىپتاسقان جاعدايعا بايلانىستى قازاقستان گۋمانيتارلىق كومەك كورسەتۋگە ۋادە بەرىپ, ايتقان سوزىندە تۇردى. بيىلعى 10 قاڭتاردا سەۆەرودونەتسك قالاسىندا قازاقستاندىق گۋمانيتارلىق كومەك ۋكراينالىق تاراپقا 70 ملن. تەڭگەگە ازىق-ت ۇلىك تۇرىندە تابىستالعان بولاتىن. سونىمەن قاتار, ۋكراينا وڭتۇستىك-شىعىس ءوڭىرىنىڭ گۋمانيتارلىق قاجەتتىلىكتەرىنە حالىقارالىق قىزىل كرەست كوميتەتى ارقىلى 30 000 اقش دوللارى شاماسىندا قارجىلىق كومەك جىبەرىلدى. قازىرگى ۋاقىتتا گۋمانيتارلىق كومەكتىڭ جاڭا جوباسىن جاساعالى جاتىرمىز. قازاقستان ۇكىمەتى «ۋكرىتيە» چەرنوبىل قورىنا قارجىلاي قولداۋ كورسەتۋگە جانە چەرنوبىل اتوم ەلەكتر ستانساسىنداعى حالىقارالىق جوبالاردىڭ تولىق اياقتالۋىنا ميلليون ەۋرو سوماسىندا ۇلەسىن بەرۋگە شەشىم قابىلدادى, دەدى ج.ايتجانوۆا.