بيىل وبلىستىق ءماسليحاتتىڭ قۇرىلعانىنا – 30 جىل. حالىقپەن قاتار جاساپ كەلە جاتقان جەرگىلىكتى اتقارۋشى بيلىكتىڭ وسى كۇنگە دەيىن ىستەگەن جۇمىسى كول-كوسىر. وسىعان وراي تالدىقورعاندا ۇلكەن شارا ءوتىپ, حالىق قالاۋلىلارى ءبىر شاڭىراق استىندا باس قوستى.
اۋەلى قوعام الدىندا جۇرگەن ەل ازاماتتارى ءماسليحاتتىڭ 30 جىلدىعىنا وراي 30 ءتۇپ اعاش وتىرعىزدى. ودان كەيىن تالدىقورعان قالاسىنداعى سالتانات سارايىندا وتكەن كونفەرەنتسيا جەتىسۋ وبلىسى ءماسليحاتىنىڭ تاريحى تۋرالى بەينەفيلممەن باستاۋ الدى. وندا تاۋەلسىزدىك جىلىندا قالىپتاسقان ءماسليحاتتىڭ تاريحي ورنى مەن ماڭىزى, مازمۇندى جۇمىستارى مەن ءار جىلدارى ءماسليحات حاتشىسى, توراعاسى بولعان تۇلعالاردىڭ پىكىرى, وزدەرى اتقارعان ءىس پەن ەل ءۇشىن جاساعان ەڭبەكتەرى باياندالدى.
جيىننىڭ العاشقى ءسوزىن العان وبلىس اكىمىنىڭ مىندەتىن اتقارۋشى الىبەك جاقانباەۆ كوپشىلىكتى مەرەيلى ساتپەن قۇتتىقتاپ, وبلىستاعى اتقارىلعان ىستەرگە, ايماق ەكونوميكاسى مەن ءال-اۋقاتى جايلى باياندادى.
سونىمەن قاتار الىبەك اسكەربەك ۇلى, جومارتقالي باياسىل ۇلى, ەرمەك ءابىلماجىن ۇلى مەن وبلىستىق ءماسليحاتتىڭ توراعاسى گۇلنار تويلىباەۆا «قازاقستان رەسپۋبليكاسى ءماسليحاتتارىنىڭ قۇرىلعانىنا 30 جىل» تولۋىنا ارنالعان كىتاپتىڭ تۇساۋكەسۋ ءراسىمىن اتقاردى.
تاريح پەن تانىم ساباقتاسقان شارا بارىسىندا ارداگەر دەپۋتاتتار مەن ءماسليحات دەپۋتاتتارى ماراپاتتالدى. اتاپ ايتقاندا, ەرمەك كەلەمسەيىت قر ەڭبەك جانە حالىقتى الەۋمەتتىك قورعاۋ مينيسترلىگىنىڭ «ەڭبەك ارداگەرى» مەدالىمەن, ريمما سالىقوۆا قر ونەركاسىپ جانە قۇرىلىس مينيسترلىگىنىڭ «ەڭبەك ارداگەرى» مەدالىمەن ماراپاتتالسا, رۋسلان ۆاليشانوۆ «قۇرمەتتى قۇرىلىسشى» توسبەلگىسىن وڭىرىنە تاقتى. ال, سەكەنباي شەنگەلباەۆ پەن قامباربەك سايرانبەكوۆ «اۋىل شارۋاشىلىعى سالاسىنىڭ ۇزدىگى» توسبەلگىسىمەن, ارىستانعالي ارىن, ەرمەك ەگىنباەۆ, قانات ساتانوۆ وبلىس اكىمىنىڭ قۇرمەت گراموتاسىمەن, بەكەت بلاسوۆ وبلىس اكىمىنىڭ العىس حاتىمەن مەرەيلەندى.
ءوز كەزەگىندە جەتىسۋ وبلىستىق ءماسليحاتىنىڭ توراعاسى گۇلنار تويلىباەۆا, قازاقستان رەسپۋبليكاسى پارلامەنتى سەناتىنىڭ دەپۋتاتى سۇلتان دۇيسەمبينوۆ, «مەملەكەتتىك جانە جەرگىلىكتى باسقارۋ ينستيتۋتى» كوممەرتسيالىق ەمەس ءبىلىم بەرەتىن مەكەمە رەكتورى ابىكەن توقتىبەكوۆ, ارداگەر دەپۋتات ەرمەك كەلەمسەيىت ءسوز الىپ, ءماسليحاتتىڭ 30 جىلدىعىمەن كوپشىلىكتى قۇتتىقتادى.
ءوڭىردىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن بەلسەندى دەپۋتاتتار مەن مەملەكەتتىك قىزمەتشىلەردى قازاقستان رەسپۋبليكاسى پارلامەنتى سەناتىنىڭ توراعاسى ماۋلەن اشىمباەۆتىڭ قۇرمەت گراموتاسى, العىس حاتتارىمەن قر رەسپۋبليكاسى پارلامەنتى سەناتىنىڭ دەپۋتاتى سۇلتان مىرزابەك ۇلى ماراپاتتادى.