«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 101-بابى 4-تارماعىنا سايكەس ۇستىمىزدەگى جىلدىڭ 29 ناۋرىزىندا رەسپۋبليكانىڭ 14 وڭىرىندە 60 سايلاۋ وكرۋگىندە ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋ وتەدى.
ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋدى وبلىستىق سايلاۋ كوميسسيالارى تاعايىندايدى.
بارلىعى – استانا قالاسى ءماسليحاتىنىڭ 1 دەپۋتاتى, 9 وبلىستىق دەپۋتات, 10 قالالىق جانە 40 اۋداندىق ءماسليحاتتار دەپۋتاتتارى سايلانادى.
«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا سايكەس ءماسليحات دەپۋتاتتىعىنا كانديداتتاردى بەلگىلەنگەن تارتىپتە تىركەلگەن رەسپۋبليكالىق نەمەسە جەرگىلىكتى قوعامدىق بىرلەستىكتەر, سونداي-اق, ولاردىڭ قۇرىلىمدىق بولىمشەلەرى مەن ازاماتتار ءوزىن ءوزى ۇسىنۋ جولىمەن ۇسىنادى.
ءماسليحات دەپۋتاتتىعىنا سايلانۋ ءۇشىن ازامات كونستيتۋتسيانىڭ 86-بابىنىڭ 3-تارماعىندا بەلگىلەنگەن تالاپتارعا سايكەس كەلۋى, سونداي-اق, كونستيتۋتسيانىڭ 33-بابىنىڭ 2 جانە 3-تارماقتارىنا جانە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا سايكەس سايلاۋ قۇقىعىنا يە بولۋى كەرەك.
وسىلايشا, 20 جاسقا تولعان قازاقستان رەسپۋبليكاسىنىڭ ازاماتى ءماسليحات دەپۋتاتى بولىپ سايلانا الادى. سوت ءىس-ارەكەتكە جارامسىز دەپ تانىعان, سونداي-اق, سوت شەشىمى بويىنشا بوستاندىعىنان ايىرۋ ورىندارىندا وتىرعان ازاماتتار سايلاۋ جانە سايلانۋ قۇقىعىنا يە بولا المايدى.
رەسپۋبليكالىق نەمەسە جەرگىلىكتى قوعامدىق بىرلەستىكتەردىڭ, ولاردىڭ قۇرىلىمدىق ءبولىمشەلەرىنىڭ ءماسليحات دەپۋتاتتىعىنا كانديداتتاردى ۇسىنۋىن ولاردىڭ جوعارى ورگاندارى ءاربىر كانديدات داۋىسقا تۇسەتىن سايلاۋ وكرۋگىن كورسەتە وتىرىپ جۇرگىزەدى.
ءماسليحات دەپۋتاتتىعىنا كانديداتتاردى ازاماتتاردىڭ ءوزىن ءوزى تارتىبىمەن ۇسىنۋى ءتيىستى وكرۋگتىك سايلاۋ كوميسسياسىنا وسى اۋماقتىق سايلاۋ وكرۋگى بويىنشا ءماسليحات دەپۋتاتتىعىنا كانديدات بولىپ داۋىسقا ءتۇسۋ نيەتى تۋرالى ءوتىنىش بەرۋى ارقىلى جاسالادى.
قازاقستان رەسپۋبليكاسىنىڭ
ورتالىق سايلاۋ كوميسسياسى.