قر پرەمەر-ءمينيسترى ولجاس بەكتەنوۆ ەكونوميكانى دەمونوپوليزاتسيالاۋ جونىندەگى كوميسسيا وتىرىسىن وتكىزدى, ونىڭ شەڭبەرىندە پرەزيدەنتتىڭ «ەكونوميكانى ىرىقتاندىرۋ جونىندەگى شارالار تۋرالى» جارلىعىن ىسكە اسىرۋ ماسەلەلەرى قارالدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
اتقارىلىپ جاتقان جۇمىستار تۋرالى پرەمەر-ءمينيستردىڭ ورىنباسارى نۇرلان بايبازاروۆ, باسەكەلەستىكتى قورعاۋ جانە دامىتۋ اگەنتتىگىنىڭ توراعاسى مارات وماروۆ, مۇددەلى مەملەكەتتىك ورگاندار مەن ۆەدومستۆولار باسشىلارى بايانداما جاسادى.
كوميسسياعا «شار ستانساسى – وسكەمەن» تەمىرجول جەلىسى بويىنشا تاسىمالداۋ پروتسەسىن قامتاماسىز ەتەتىن «Dosjan Temir Joly» اق كومپانياسىنىڭ قىزمەتى تۋرالى اقپارات بەرىلدى. ۋاكىلەتتى ورگاندار كومپانيانىڭ مونوپوليالىق ەرەجەنى پايدالانا وتىرىپ, قىزمەتتەرگە تاريفتەردى بىرنەشە رەت نەگىزسىز كوتەرگەنىن انىقتادى, وسىعان بايلانىستى كوميسسيا مونوپولياعا قارسى زاڭنامانى ەسكەرە وتىرىپ, ءتيىستى تاريفتىك رەتتەۋدى ەنگىزۋ تۋرالى شەشىم قابىلدادى.سونىمەن قاتار كوميسسيا «شەت-ەنەرگو» جشس ەلەكتر ەنەرگەتيكاسىن تاراتۋ كومپانياسىنىڭ قىزمەتىن تالداۋ ناتيجەلەرىمەن تانىستى. اتالعان كومپانيانىڭ تۇراقتى اپاتتى جاعدايلارعا جول بەرۋىنە بايلانىستى, سونداي-اق ءوڭىر تۇرعىندارىنىڭ ءومىرى مەن دەنساۋلىعىنا زيان كەلتىرمەۋ ءۇشىن كومپانيانىڭ مۇلكىن مەملەكەت پايداسىنا رەكۆيزيتسيالاۋ ماقساتىندا سوتقا جۇگىنۋ تۋرالى شەشىم قابىلدانعان.سونداي-اق, كوميسسيا «قتج» ۇك» اق ەنشىلەس كومپانياسىنىڭ, سۋمەن جابدىقتاۋ جانە سۋ بۇرۋ ۇيىمدارىنىڭ, مۇناي-حيميا كەشەنى سۋبەكتىسىنىڭ قىزمەتىنە قاتىستى ماسەلەلەردى قارادى.