جامبىل وبلىسىندا قاتەرلى ىسىكتى انىقتاۋ ءۇشىن جاساندى ينتەللەكت ەنگىزىلەدى

وبلىس اكىمدىگىنىڭ حابارلاۋىنشا, وڭىردە الەۋمەتتىك ينفراقۇرىلىمدى دامىتۋ اياسىندا 36 ءبىلىم بەرۋ نىسانىن سالۋ (10 600 ورىن) جوسپارلانعان. بيىلعى 10 ايدىڭ قورىتىندىسىنا سايكەس 13 ءبىلىم وشاعى پايدالانۋعا بەرىلگەن, ونىڭ ۇشەۋى «جايلى» مەكتەپ. جىل سوڭىنا دەيىن تاعى 2 نىساندى قولدانىسقا بەرۋ جوسپارلانعان (1 مەكتەپ, 1 مەكتەپكە قوسىمشا عيمارات).

ناتيجەسىندە 7 وقۋ ورنى تاپشىلىعى بار, 3 ءۇش اۋىسىمدى, 3 توزىعى جەتكەن جانە 2 اپاتتى مەكتەپتىڭ ماسەلەسى شەشىلمەك.

«2025 جىلى جاساندى ينتەللەكت ارقىلى قاتەرلى ىسىكتى انىقتاۋدىڭ مامانداندىرىلعان جۇيەسىن ەنگىزۋ جوباسىن جۇزەگە اسىرۋ جوسپارلانعان. وبلىستا 15 دەنە شىنىقتىرۋ-ساۋىقتىرۋ كەشەنى سالىنىپ جاتىر, بۇگىنگە دەيىن ونىڭ تورتەۋى جانە 103 سپورت الاڭى اشىلدى. جىل سوڭىنا دەيىن تاعى 6 سپورت كەشەنى قولدانىسقا بەرىلەدى دەپ كۇتىلىپ جاتىر. بيۋدجەتتەن تىس 880 ملن. تەڭگەگە 4 سپورت نىسانى بوي كوتەردى, «قازاقستان حالقىنا» قوعامدىق قورى ەسەبىنەن 2 مودۋلدىك سپورت زالىن اشۋ جوسپاردا بار. 5 مادەنيەت نىسانى ەسىگىن ايقارا اشتى (4 مادەنيەت ءۇيى مەن 1 مۋزەي), جىل سوڭىنا دەيىن تاعى 3 نىسان ەل يگىلىگىنە تاپسىرىلادى. اسقار توقپانوۆ اتىنداعى وبلىستىق قازاق دراما تەاترىنىڭ عيماراتىنا, كەنەن ازىرباەۆ اتىنداعى وبلىستىق فيلارمونيانىڭ كورەرمەندەر زالىنا اعىمداعى جوندەۋ جۇمىستارى جۇرگىزىلدى», دەدى ەربول قاراشوكەەۆ.

سونىمەن قاتار وبلىس اكىمى بيىل مەملەكەتتىك شىعارماشىلىق تاپسىرىسپەن 1,3 ملرد. تەڭگەگە 224 ۇيىرمەدە 9,1 مىڭ بالا قامتىلعانىن اتاپ ءوتتى.

ءباسپاسوز الاڭىندا ءوڭىردىڭ تۋريستىك الەۋەتىنىڭ دامۋىنا دا توقتالعان. اتالعان سالادا 16,4 ملرد. تەڭگەنىڭ 13 ينۆەستيتسيالىق جوباسى جۇزەگە اسىرىلىپ جاتىر. وتاندىق جانە شەتەلدىك تۋريستەر ءۇشىن 6 نىسان اشىلدى, ونىڭ ىشىندە قوناق ۇيلەر, دەمالىس ورىندارى, جول بويىنداعى قىزمەت كورسەتۋ نىساندارى بار. تۋريستىك ورىندارعا باراتىن جولدار جوندەلىپ, گازداندىرۋ ماسەلەسى شەشىلدى.