ءماجىلىس دەپۋتاتى ەدىل جاڭبىرشين اكىمشىلىك قۇقىقبۇزۋشىلىق تۋرالى كودەكسكە وزگەرىستەر ەنگىزۋ تۋرالى زاڭ جوباسىن تالقىلاۋ بارىسىندا ايىپپۇلداردىڭ قولدانىستاعى نورماسىن ازايتۋعا قاتىستى پىكىر ءبىلدىردى, دەپ حابارلايدى Egemen.kz.
دەپۋتات وتكەن جولى بيۋرو وتىرىسىندا قولدانىستاعى ايىپپۇلداردىڭ نورماسىن ازايتۋ ماسەلەسى تالقىلانعاننان كەيىن, ءوزى زەرتتەۋ جۇرگىزگەنىن ايتتى.
«2023 جىلى ءساۋىر ايىندا جەرگىلىكتى اتقارۋشى ورگانداردان مەملەكەتتىك قاداعالاۋ ۇكىمەتكە بەرىلگەن. وسى ۋاقىتتان بۇگىنگە دەيىن كاسىپكەرلەرگە ءبىرىنشى رەت زاڭدى بۇزعانى ءۇشىن 1059 اكىمشىلىك شارالار قولدانىلعان. بۇل قانداي زاڭدى بۇزۋشىلار؟ وزدەرىڭىز جاقسى بىلەسىزدەر, كوبىڭىز جەرگىلىكتى جەردە جۇمىس جاسادىڭىزدار. بۇل - باعانى دۇرىس قويماۋ, باعانى ءتىپتى قويماۋ نەمەسە سورەلەردەگى تاۋارلاردىڭ باعاسىن ازايتاتىن اكتسيالار جازىپ قويۋ. مىسالى 50 پايىزعا دەپ جازادى, بىراق كاسساعا كەلگەن ۋاقىتتا باسقا باعانى الادى. بۇعان قوسا مەرزىمى ءوتىپ كەتكەن تاۋارلاردى ساتۋ, نەمەسە تەحنيكالىق رەگلامەنتكە سايكەس كەلمەيتىن تاۋارلاردى ساتۋ ارەكەتتەرى ءبىزدىڭ تۇتىنۋشىلاردىڭ بىرىنشىدەن قۇقىن بۇزادى, ەكىنشىدەن ساۋدا ەرەجەسىن بۇزىپ وتىر. وسىنداي كاسىپكەرلەر ءبىزدىڭ ارامىزدا بار. مىنە بۇل نورما سولارعا ارنالعان. ەگەردە ول ەكىنشى رەت قايتالاناتىن بولسا, ونىڭ ايىپپ ۇلى ۇلكەيەدى. سول 1059 ايىپپۇلدان كەيىن ەكىنشى رەت زاڭ بۇزعانداردىڭ سانى كۇرت ازايىپ كەتكەن. بار بولعانى 47 فاكت تىركەلگەن. ياعني, بۇل نورما جۇمىس جاساپ جاتىر دەگەن ءسوز», دەدى ەدىل جاڭبىرشين.
ونىڭ ايتۋىنشا قازاقستاندا عانا ەمەس, بۇكىل ەۋروپادا, بۇكىل وزىق مەملەكەتتەردە تۇتىنۋشىنىڭ قۇقىعىن شەكتەگەن نەمەسە ونىڭ قۇقىعىن بۇزعان كومپانيالاردىڭ بارىنە, كاسىپكەرلەرگە ۇلكەن ايىپپۇلدار سالادى.
«بريتانيادا بيرمينگەم قالاسىندا TESCO دەگەن كومپانيا 400 گرامم كلۋبنيكانىڭ باعاسىن دۇرىس قويماي 500 مىڭ دوللارعا شترافتالعان. چەحيادا پيۆو ساتاتىن بيلل دەگەن كومپانياعا سورەدە باسقا باعا, كاسسادا باسقا باعا قويعانى ءۇشىن 280 مىڭ كرونعا شتراف سالادى. بۇل ءبىزدىڭ باعامەن قازىرگى كۋرسپەن ەسەپتەگەندە 6 ملن-نىڭ ۇستىندەگى اقشا. ءبىز ەڭ ءبىرىنشى كەزەكتە ءادىل قوعام دەيتىن بولساق, وندا تۇتىنۋشىنى قورعاۋىمىز كەرەك. ۇلكەن سۋپەر, گيپەر ماركەتتەردە كاسىپكەرلەر الەۋمەتتىك ماڭىزى بار, كارتوپ بولسىن, ۇن بولسىن, شەكەر بولسىن, كۇرىش بولسىن سوعان 20 تەڭگە, 30 تەڭگەدەن قوسادى نەمەسە 20, 30 پايىزعا باعاسىن كوتەرەدى. ولاردىڭ قۋلىعىنا الەۋمەتتىك جاعىنان قورعالماعان ءبىزدىڭ ازاماتتارىمىز زەينەتكەرلەر, مۇگەدەكتەر, كوپ بالالى انالار ءبىرىنشى الدانادى. كاسىپكەرلەر وسىلاي ميلليونداعان نەگىزسىز پايدا تاۋىپ وتىر. ءبىز ول جاعىن دا قاراۋىمىز كەرەك» دەدى دەپۋتات.
ەدىل جاڭبىرشين بۇل نورما قازىرگى تاڭدا ءوزىنىڭ ناتيجەسىن بەرىپ تۇرعاندىقتان اسىعىستىققا بارۋدىڭ قاجەتى جوقتىعىن ايتتى.
«سەبەبى, مىناداي ءبىر ماسەلە بار, كاسىپكەر جاقسى جۇمىس جاسايتىن بولسا, ول زاڭدى بۇزبايتىن بولسا, ول نەدەن قورقادى؟ ەشتەڭەنى بۇزباسا, باعانى دۇرىس قويسا, ءادىل, اشىق جۇمىس جاساسا, ساپالى زاتتاردى ساتسا سوندا ەشكىم ايىپپۇل سالمايدى. ال ەگەردە زاڭ بۇزدى ما, وندا مەملەكەت الدىندا, حالىقتىڭ الدىندا جاۋاپ بەرۋ كەرەك», دەدى ول.