مەملەكەت باسشىسى قاسىم-جومارت توقاەۆ پەن فرانتسيا پرەزيدەنتى ەممانيۋەل ماكروننىڭ قاتىسۋىمەن ساۋد ارابياسىندا وتكەن One Water Summit حالىقارالىق سامميتىندە ۋاعدالاستىققا قول جەتكىزىلدى. ەكى ەل اتالعان سامميت شەڭبەرىندە بالقاش كولىن ساقتاۋ بويىنشا ىنتىماقتاستىق تۋرالى كەلىسىمگە قول قويدى, دەپ حابارلايدى Egemen.kz.
سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنىڭ ءمالىم ەتۋىنشە اتالعان ۆەدومستۆو مەن فرانتسيا دامۋ اگەنتتىگى (AFD) جانە فرانتسيانىڭ گەولوگيالىق جانە تاۋ-كەن بيۋروسى (BRGM) ىنتىماقتاستىق تۋرالى ۇشجاقتى كەلىسىمگە قول قويدى. مينيسترلىك تاراپىنان كەلىسىمگە قول قويۋ راسىمىنە ءبىرىنشى ۆيتسە-مينيستر بولات بەكنياز قاتىستى. قۇجاتتىڭ نەگىزگى ماقساتى – بالقاش كولىن ساقتاۋ باعىتىندا ىنتىماقتاستىقتى دامىتۋ.
كەلىسىم سۋ رەسۋرستارى جانە يرريگاتسيا مينيسترلىگىنە بالقاش كولىنىڭ سۋ رەسۋرستارىن باسقارۋدى دامىتۋعا 1,35 ملن ەۋرو كولەمىندە گرانت ءبولۋدى كوزدەيدى. فرانتسۋز تاراپى كول باسسەينىنە اۋقىمدى زەرتتەۋ جۇرگىزەدى, ونىڭ ناتيجەسى بويىنشا 2040 جىلعا دەيىن ۇزاق مەرزىمدى باس جوسپار ازىرلەنەدى. قۇجاتتا سۋ ايدىنىنىڭ ىشكى سۋلارىن ساقتاۋ ءىس-شارالارى جازىلادى.
سونىمەن قاتار مينيسترلىك BRGM-مەن سۋ رەسۋرستارى تۋرالى ءوزارا تۇسىنىستىك تۋرالى مەموراندۋمعا قول قويدى. قۇجات وسى سالاداعى ەكىجاقتى ىنتىماقتاستىقتى دامىتۋدى كوزدەيدى.
«AFD جانە BRGM-مەن ۇشجاقتى كەلىسىم بالقاش كولى باسسەينىندەگى سۋدى تۇراقتى باسقارۋعا جانە زەرتتەۋگە باعىتتالعان. قۇجات سۋدىڭ جاي-كۇيىن ولشەۋ, تالداۋ, كليماتتىق-انتروپوگەندىك اسەرلەردى مودەلدەۋ, سونداي-اق 2040 جىلعا دەيىن سۋ بالانسىن بولجاۋدى قاراستىرادى. جوبانىڭ ماقساتتارىنىڭ ءبىرى – بالقاش كولىنىڭ دەڭگەيىن تۇراقتاندىرۋ ءۇشىن قاپشاعاي سۋ قويماسىنىڭ جۇمىس ءتارتىبىن وڭتايلاندىرۋ. زەرتتەۋ ناتيجەسى بويىنشا وزەندەردى تازارتۋ, توپىراقتىڭ توزۋىن جانە سۋدىڭ لاستانۋىن بولدىرماۋ, بالىق شارۋاشىلىعى مەن ەكولوگيالىق ءتۋريزمدى دامىتۋ, سونداي-اق كولدى قورعاۋ ءۇشىن نورماتيۆتىك-قۇقىقتىق بازا قۇرۋ جونىندەگى ءىس-شارالار جۇرگىزىلەدى», دەدى سالا ءمينيسترى نۇرجان نۇرجىگىتوۆ.