پرەزيدەنت قاسىم-جومارت توقاەۆ One Water سامميتىندە سۋ تاپشىلىعى ازىق-ت ۇلىك جانە ەنەرگەتيكا قاۋىپسىزدىگىنە, ونەركاسىپ وسىمىنە قاۋىپ توندىرەتىنىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ونىڭ پىكىرىنشە, اۋىل شارۋاشىلىعىنداعى سۋ ۇنەمدەۋگە جانە ەنەرگيانىڭ جاڭارتىلاتىن كوزدەرىن دامىتۋعا سالعان ستراتەگيالىق ينۆەستيتسيالار ەكونوميكا تۇراقتىلىعىن ارتتىرىپ قانا قويماي, قورشاعان ورتاعا قىسىمدى تومەندەتەدى.
«سۋدا شەكارا بولمايدى. ول قوعامداستىقتار مەن ەكوجۇيەلەردى بايلانىستىرادى. قازاقستان حالىقارالىق ارالدى قۇتقارۋ قورىنىڭ توراعاسى رەتىندە ايماقتىق ىنتىماقتاستىق پەن بىرلەسكەن ءىس-قيمىلدىڭ ىلگەرىلەۋىنە قولداۋ كورسەتەدى. ءبىزدىڭ ويىمىزشا, كليماتتىڭ وزگەرۋىمەن كۇرەستىڭ الدىڭعى شەبىندە جۇرگەن مەملەكەتتەردىڭ ديالوگتى جانداندىرىپ, حالىقارالىق ىقپالداستىقتى دامىتۋى جانە سۋعا قاتىستى جوبالاردى جۇزەگە اسىرۋ ءۇشىن رەسۋرستارىن جۇمىلدىرۋى وتە وزەكتى. وسى ماقساتقا سايكەس, قازاقستان بۇگىن جاھاندىق سۋ داعدارىسىن شەشۋگە مۇددەلى تاراپتاردى بىرىكتىرەتىن جانە سۋ رەسۋرستارىن باسقارۋ ىسىندە جاڭاشىلدىقتى جاقتايتىن One Water Vision كواليتسياسىنا ەرەكشە ىقىلاسپەن قوسىلدى. ەلىمىز 2026 جىلى بىرىككەن ۇلتتار ۇيىمىنىڭ قولداۋىمەن وڭىرلىك كليمات كونفەرەنتسياسىن وتكىزەدى», دەدى پرەزيدەنت.
مەملەكەت باسشىسى 2030 جىلعا دەيىنگى ورنىقتى دامۋ سالاسىنداعى جاھاندىق باسىمدىقتاردىڭ ءبىرى سۋ رەسۋرستارى ەكەنىن ەسكە سالدى.
«سۋ قاۋىپسىزدىگى – جاي عانا تەحنيكالىق نەمەسە ەكولوگيالىق ماسەلە ەمەس, بۇل مورالدىق يمپەراتيۆ. سۋ قاۋىپسىزدىگى پروبلەماسىن شەشۋ One Water قاعيداتى اياسىنداعى كوپجاقتى ديالوگتى دامىتۋدى تالاپ ەتەدى. قازاقستان سۋ رەسۋرستارىن جاھاندىق اۋقىمدا باسقارۋ ءىسىن نىعايتۋدى كوزدەيتىن وسى ۇجىمدىق ارەكەتكە ءوز ۇلەسىن قوسۋعا دايىن», دەدى قاسىم-جومارت توقاەۆ.
سامميتتە ساۋد ارابياسىنىڭ تاق مۇراگەرى, پرەمەر-ءمينيسترى مۇحاممەد بەن سالمان ءال ساۋد, فرانتسيا پرەزيدەنتى ەممانيۋەل ماكرون, دۇنيەجۇزىلىك بانك توبىنىڭ پرەزيدەنتى ادجاي بانگا, سۋ رەسۋرستارى ەكونوميكاسى جونىندەگى جاھاندىق كوميسسيانىڭ تەڭ توراعاسى (GCEW) يوحان روكسترەم, سونداي-اق باسقا دا ەلدەردىڭ باسشىلارى, حالىقارالىق ۇيىمداردىڭ, قاۋىمداستىقتار مەن كومپانيالاردىڭ جەتەكشىلەرى ءسوز سويلەدى.