اتىراۋ وبلىسىندا اۋىز سۋمەن قامتۋ جانە سۋ بۇرۋ جۇيەسىن جاقسارتۋ باعىتىندا اۋقىمدى جۇمىس ءجۇرىپ جاتىر. ايماق باسشىسى سەرىك شاپكەنوۆ تۇرعىنداردى ساپالى اۋىز سۋمەن قامتۋ ماقساتىندا ىسكە اسىپ جاتقان جوبالار تۋرالى ايتتى, دەپ حابارلايدى Egemen.kz.
جالپى ءوڭىر حالقىنىڭ 99,8%-ى تازا اۋىز سۋمەن قامتىلعان. بيىل قىزىلقوعا اۋدانىنىڭ قوڭىراۋلى, اققورا اۋىلى مەن ماحامبەت اۋدانىنىڭ بالا وراز ەلدى مەكەنىنە 18,9 شاقىرىم سۋ قۇبىرى جۇرگىزىلگەن.
سونىمەن قاتار ماحامبەت اۋدانىنا قاراستى اتامباەۆ, كوزدىقارا, ەسماحان ەلدى مەكەندەرىنە جالپى ۇزىندىعى 61,7 كم بولاتىن سۋ قۇبىرىن تارتۋ جۇمىستارى اياقتالۋعا جاقىن. قوس جوبانىڭ ناتيجەسىندە 600 ادام تازا اۋىز سۋمەن قامتىلادى. سونداي-اق ماحامبەت, يساتاي, قۇرمانعازى اۋدانىندا 16 سۋ تازارتۋ ستانتسياسى جاڭعىرتىلىپ جاتىر.
«تاسقىننىڭ سالدارىنا قاراماستان حالىقتى ساپالى اۋىز سۋمەن قامتۋ باعىتىندا جۇمىستار جۇيەلى ءجۇرىپ جاتىر. ماسەلەن, قالادا تاۋلىگىنە 50 مىڭ تەكشە مەتر سۋ تازالايتىن №5 سۇزگى ستانتسياسىن جاڭعىرتۋ جۇمىسىن جىل سوڭىنا دەيىن اياقتاپ, ىسكە قوسامىز. سونداي-اق كەلەر جىلى تاۋلىگىنە 60 مىڭ تەكشە مەتر سۋ تازالايتىن №6 سۇزگى ستانتسياسىنىڭ قۇرىلىسى باستالادى. بيىل قالا اۋماعىندا 60 شاقىرىم سۋ جەلىسىنىڭ جاڭعىرتۋ جۇمىسىن باستادىق. ونىڭ 30 شاقىرىم سۋ قۇبىرى تەمىردەن پلاستيككە اۋىستىرىلدى. قالعان 30 شاقىرىمداعى جۇمىستى كەلەر جىلى اياقتايمىز. بۇعان قوسا قالاداعى 1950 جىلدان بەرى جوندەۋ كورمەگەن, ۇزىندىعى 40 كم بولاتىن كارىز جەلىسىن جاڭارتىپ جاتىرمىز. بۇگىندە بۇل جۇمىستىڭ 17 شاقىرىمىندا جۇمىس اياقتالدى», دەدى س.شاپكەنوۆ.
سونداي-اق اتىراۋدا 1945 جىلدان بەرى جوندەلمەگەن كارىز سورعى ستانتسيالارىن جاڭعىرتۋ, كۇردەلى جوندەۋ جۇمىسى باستالعان. 9 كارىز سورعى ستانتسياسى جاڭعىرتىلىپ جاتىر. جىل سوڭىنا دەيىن بەسەۋىندەگى جۇمىس اياقتالادى. وعان قوسا 36 ستانتسيانى رەكونسترۋكتسيالاۋ ءۇشىن جوبالىق سمەتالىق قۇجات دايىندالىپ جاتىر. ال قۇلسارى قالاسىندا 14 كارىز سورعى ستانتسياسى كۇردەلى جوندەۋدەن وتكەن.
«اتىراۋ حالقىن الاڭداتقان باستى ماسەلەنىڭ ءبىرى – ىقشام اۋداندارداعى كارىز جۇيەسى. جاۋىن-شاشىن كەزىندە تۇرعىنداردان تۇسەتىن شاعىم كوبەيەدى. جەردىڭ تۇزدىلىعى تاعى بار. ماسەلەنى شەشىپ, اتىراۋ قالاسىنداعى بىرنەشە ىقشام اۋداندى ورتالىقتاندىرىلعان كارىز جۇيەسىنە قوسۋ ءۇشىن بۇگىندە 22 ۋچاسكەگە جۇرگىزىلەتىن كارىز جەلىسىنىڭ جوبالىق سمەتالىق قۇجاتى جاساقتالدى. 2026 جىلدان باستاپ جۇرگىزىلگەن كارىز جەلىسى قالانىڭ وڭ جاعالاۋىنداعى كارىزدىك-تازارتۋ عيماراتىنا قوسىلاتىن بولادى. جالپى بۇل جۇمىس 5 جىلدى الاتىندىقتان, كەزەڭ-كەزەڭىمەن ىستەلەدى, دەدى ءوڭىر باسشىسى سەرىك شاپكەنوۆ.