بالا قۇقىقتارى جونىندەگى ۋاكىل دينارا زاكيەۆا اتا-انالارعا 12 جاسقا دەيىنگى بالالاردى ۇيدە جالعىز قالدىرۋعا تىيىم سالۋدى ۇسىندى, دەپ حابارلايدى Egemen.kz.
بۇل ۇسىنىسقا بالالاردىڭ قاتىسۋىمەن بولعان قايعىلى ءورت وقيعالارى سەبەپ بولعان. زاكيەۆانىڭ مالىمەتىنشە, جىل باسىنان بەرى قازاقستاندا 15 ءورت بولىپ, بالالار كوز جۇمعان. كوپ جاعدايدا قايعىلى وقيعالار بالالار ۇيدە جالعىز قالعان كەزدە بولعان.
«وسى فاكتىلەردى تالداي وتىرىپ, 12 جاسقا دەيىنگى بالالاردى كامەلەتكە تولعان ادامداردىڭ قاراۋىنسىز قالدىرۋعا تىيىم سالۋ بويىنشا زاڭنامالىق شارالاردى پىسىقتاۋ قاجەت دەپ سانايمىن. ارينە, سونىمەن بىرگە قولداۋعا مۇقتاج وتباسىلار مەملەكەت تاراپىنان كومەك باعدارلامالارىمەن قامتاماسىز ەتىلۋى قاجەت», دەپ جازدى دينارا زاكيەۆا Instagram جەلىسىندە.