«قازاقستان اۆتورلارى قوعامى» (قازاق) وكىلدەرى ۇيىمنىڭ سايتىندا جاريالانعان «ىزدەۋدەگى ارتىستەر تىزىمىنە» قاتىستى مالىمدەمە جاسادى, دەپ حابارلايدى Egemen.kz.
ۇيىمنىڭ سايتىندا «ىزدەۋدەگى اۆتورلار ءتىزىمى» جاريالانعان بولاتىن. تىزىمدە ءالي وقاپوۆ, ديماش قۇدايبەرگەن, دارحان دجۋز, يمانبەك, قايرات نۇرتاس, Raim & Artur, RinGo, Sadraddin, Say Mo, Son Pascal, M'Dee, V $ X V PRiNCE, عالىمجان مولدانازار سياقتى تانىمال انشىلەر بار.
ۇيىم جالپى سانى 421 ورىنداۋشىعا «ىزدەۋ» جاريالاعان. بەلگىلى بولعانداي, تىزىمدە پايدالانىلعان تۋىندىلارى ءۇشىن اقى تولەنۋگە ءتيىس ونەر ادامدارى كورسەتىلگەن. ەندى ولار وسى تىزىمنەن وزدەرىن تاۋىپ, قازاق-قا حابارلاسۋى كەرەك.
- ءبىز بارلىق جەردە ولاردى ىزدەۋگە مىندەتتىمىز, قوڭىراۋ شالامىز. بۇل ادامدار سايتتا ءىلىنىپ تۇر. نەلىكتەن ول ادامنىڭ ءوزى قالاماقىسىنىڭ قايدا ەكەنىن ىزدەمەيدى؟ كەلىڭىزدەر, ءبىز بارلىق اۆتورلاردىڭ قالاماقىسىن تولەۋگە دايىنبىز. كەيبىر اۆتورلىق قۇقىق يەلەرى «مەن اقشا المايمىن, ەشقاشان العان ەمەسپىن» دەيدى. ءسىزدىڭ رەكۆيزيتتەرىڭىزدىڭ قانداي ەكەنىن ءبىز قايدان بىلەمىز؟ – دەيدى قازاق ۇيىمى باس ديرەكتورىنىڭ ورىنباسارى ءانۋار ەرسۇلتان.
وسى ورايدا ول قازاقستانداعى ونەردە, مۋزىكادا, ۆيرتۋالدى سالادا ونەرمەن اينالىساتىن بۇكىل جاس بۋىننىڭ ديرەكتورلارى, مەنەدجەرلەرى بار ەكەنىن ەسكە سالدى. ايتۋىنشا, سولار جۇمىس ىستەۋى كەرەك. اۆتورلىق جانە ساباقتاس قۇقىقتاردىڭ نە ەكەنىن, اۆتورلىق سىياقى قاي جەردە ەكەنىن بىلۋلەرى قاجەت.
- ولار بىزگە كەز كەلگەن ۋاقىتتا حابارلاسا الادى. ءبىز اشىق ۇيىم رەتىندە اقشانى تولەيمىز. 5, 10 جىلدىڭ بارلىق اقشاسى قازاقستاندىق اۆتورلار قوعامىندا جاتىر, – دەدى ءانۋار ەرسۇلتان.
ادىلەت مينيسترلىگىنىڭ سايتىندا قازاق ۇيىمىنىڭ اۆتورلار تۋىندىسىنىڭ تەك كوپشىلىك الدىندا ورىندالعانى نەمەسە كابەل ارقىلى جانە ەفيردە جاريالانعانى ءۇشىن سىياقى الۋ قۇقىعىن ىسكە اسىرۋ بويىنشا اككرەديتتەلگەنى كورسەتىلگەن.
جۋرناليستەر ۇيىم وكىلدەرىنەن ءتيىستى اككرەديتاتسياسىز, Meta-مەن كەلىسسوزدەر جۇرگىزىپ, اۆتورلاردىڭ تۋىندىلارىن ساندىق سەگمەنتتە پايدالانۋ ءۇشىن قاراجات جيناي الاتىنى راس پا دەپ سۇرادى. ال ۇيىم وكىلدەرى اۆتورلىق قۇقىقتى قورعاۋعا قاجەتتى قۇجاتتار مەن وكىلەتتىكتەردىڭ بارلىعىنا يە ەكەندەرىن مالىمدەدى.
- بىزدە ساندىق سەگمەنتتە, اۆتورلىق قۇقىقتى قورعاۋ بويىنشا كەز كەلگەن سەگمەنتتە اككرەديتاتسيا بار, - دەدى قازاقستان اۆتورلار قوعامىنىڭ باس ديرەكتورى اينۇر ەسەندىكوۆا.
ەسكە سالا كەتسەك, بۇعان دەيىن Instagram جەلىسىنەن قازاقستاندىق ارتىستەردىڭ اندەرى جوعالىپ كەتكەن ەدى. وعان قازاقستان اۆتورلار قوعامىنىڭ تالاپتارى سەبەپ بولعانى انىقتالدى.
ۇيىم Meta كومپانياسىنان اۆتورلىق قۇقىقتى پايدالانعانى ءۇشىن نەمەسە ونى پايدالانۋ قۇقىعىن بەرۋ ءۇشىن تولەنەتىن اقىنى ارتتىرۋدى سۇراعان. قازاقستاندىق اۆتورلار قوعامى تولەمدەردىڭ جەتكىلىكتى تۇردە تۇسپەيتىنىن ايتىپ, شاعىمدانىپ وتىر.
بۇل شەكتەۋلەر قازاقستاندىق ارتىستەردىڭ نارازىلىعىن تۋدىرىپ, الەۋمەتتىك جەلىلەردە قىزۋ پىكىرتالاس بولدى. انشىلەر مەن كومپوزيتورلار قازاقستان اۆتورلار قوعامىنىڭ قارجىلىق ەسەپ بەرۋى مەن اۆتورلارعا تولەم جۇرگىزۋ مەحانيزمدەرىنە كۇمان كەلتىردى.