مەملەكەت باسشىسىنىڭ تاپسىرماسىمەن ءماجىلىس توراعاسى ەرلان قوشانوۆ بىرىككەن اراب امىرلىكتەرىنىڭ ۇلتتىق كۇنىنە وراي ۇيىمداستىرىلعان سالتاناتتى جيىنعا قاتىستى. سپيكەر جينالعان قاۋىمدى مەرەكەمەن قۇتتىقتاپ, دوستاس امىرلىكتەر حالقىنا باق-بەرەكە تىلەدى.
ەرلان قوشانوۆ ءوز سوزىندە بىرىككەن اراب امىرلىكتەرى حالىقارالىق قاۋىمداستىقتا بەدەلى زور, ەكونوميكاسى قارىشتاپ دامىعان مەملەكەتتەردىڭ كوش باسىندا تۇرعانىن اتاپ ءوتتى.
كەيىنگى جىلدارى بالامالى ەنەرگەتيكا, جاساندى ينتەللەكت, تۋريزم مەن قارجى سالاسىندا اۋقىمدى رەفورمالاردى جۇزەگە اسىرىپ, دۇنيە جۇزىندەگى وزىق تەحنولوگيالاردىڭ ورتالىعىنا اينالعانىنا ەرەكشە نازار اۋداردى. وسى تۇرعىدا امىرلىكتەردىڭ اتوم ەنەرگەتيكاسىنداعى تاريحي جەڭىسىمەن, اتاپ ايتقاندا, «باراكا» اتوم ەلەكتر ستانساسىنىڭ تولىق ىسكە قوسىلۋىمەن قۇتتىقتادى.
– بۇگىندە امىرلىكتەر – قازاقستاننىڭ يسلام جانە اراب الەمىندەگى اسا ماڭىزدى سەرىكتەسى. ءبىز – رۋحتاس, قاناتتاس ەلدەرمىز. كوشباسشىلارىمىزدىڭ اراسىنداعى بەرىك بايلانىس, مىزعىماس دوستىق ارقىلى ەكىجاقتى قارىم-قاتىناسىمىز جاڭا ساپالى دەڭگەيگە كوتەرىلدى. بىلتىر قازاقستان پرەزيدەنتى قاسىم-جومارت توقاەۆ بىرىككەن اراب امىرلىكتەرىنە رەسمي جانە جۇمىس ساپارمەن ەكى رەت باردى. قازىرگى كۇردەلى گەوساياسي جاعدايدا ىنتىماقتاستىققا تىڭ سەرپىلىس بەرۋ تۇرعىسىنان بۇل ساپارلاردىڭ تاريحي ءمانى زور, – دەدى پالاتا توراعاسى.
ءماجىلىس سپيكەرى ەكىجاقتى ىنتىماقتاستىقتى تەرەڭدەتۋدىڭ الەۋەتى زور ەكەنىن ايتىپ, پارلامەنتارالىق بايلانىستى ودان ءارى نىعايتۋعا شاقىردى.
– قازىرگى ۋاقىتتا جاڭارتىلاتىن ەنەرگەتيكا, كولىك-لوگيستيكا, جاساندى ينتەللەكت پەن اقپاراتتىق تەحنولوگيالار, جىلجىمايتىن م ۇلىك, ءبىلىم بەرۋ جانە تاعى دا باسقا باعىتتاردا بىرلەسكەن سەرپىندى جوبالار ىسكە اسىرىلىپ جاتىر. سونىڭ ءبىرى دە بىرەگەيى – الىستان كوز تارتىپ تۇرعان «ابۋ دابي پلازا» كەشەنى ورتالىق ازيا اۋماعىنداعى ەڭ بيىك عيمارات رەتىندە ەلوردا ماقتانىشىنا اينالدى. بۇل – قازاقستان مەن امىرلىكتەر اراسىنداعى دوستىقتىڭ ءرامىزى ىسپەتتى, – دەدى ءماجىلىس توراعاسى.