پەتروپاۆل. 30 ءساۋىر. قازاقستاننىڭ ەڭبەك ەرى, «زەنچەنكو جانە ك» كومانديتتىك سەرىكتەستىگىنىڭ باس ديرەكتورى گەننادي يۆانوۆيچ زەنچەنكو تاۋەلسىز ەلىمىزدىڭ تاريحىنداعى بارلىق ۇلىقتاۋ راسىمدەرىنە قاتىسقانىن ەرەكشە ماقتانىش ەتەدى. ونىڭ ەسىندە 1991 جىلى 10 جەلتوقساندا الماتىداعى رەسپۋبليكا سارايىندا وتكەن قازاقستان پرەزيدەنتىنىڭ تۇڭعىش انت بەرۋ ءراسىمى ۇمىتىلماستاي قالىپتى. بۇل تۋرالى egemen.kz ءتىلشىسى حابارلادى.
«ول ۋاقىتتا مەملەكەت باسشىسى سايلاۋشىلاردىڭ 98,7 داۋىسىن جيناپ, جالپىحالىقتىق قولداۋعا يە بولعان ەدى. بۇل جولعى يناۋگۋراتسيا–تاۋەلسىز قازاقستان تاريحىنداعى بەسىنشى ۇلىقتاۋ ءراسىمى. بارىندە دە نۇرسۇلتان ءابىش ۇلىنىڭ سىرالعى سەرىگى, ۇزەڭگىلەس دوسى رەتىندە سەنىمدى وكىلى بولۋ باقىتى بۇيىردى».–دەيدى داڭعايىر ديقان, تاجىريبەلى باسشى اعىنان جارىلىپ.
استاناداعى تاۋەلسىزدىك سارايىندا سايلاۋشىلاردىڭ 97,75 پايىز داۋىسىن جيناپ, قايتا سايلانعان ەلباسىنىڭ قازاقستان حالقىنا انت بەرۋ ەل ومىرىندەگى ايرىقشا وقيعا ەكەنىن اتاپ كورسەتتى.
وسى ساتتەن باستاپ رەسمي قىزمەتىنە كىرىسكەن پرەزيدەنتتىڭ حالقىما بۇرىنعىداي ادال قىزمەت ەتىپ, ەلىم مەن ۇلتتىق مۇددەمىزدى قورعايمىن دەگەن مالىمدەمەسى بارىمىزگە قانات ءبىتىرىپ, ەرەكشە جىگەر بەردى. قازاقستاننىڭ دامۋىن قامتاماسىز ەتەتىن, تۇراقتىلىعىمىزدىڭ دىڭگەگى سانالاتىن بەس قاعيداتتى جاريالاپ, سىرتتان تونەتىن قاۋىپ-قاتەرلەرگە قارسى ساقتىق شارالارىن كۇشەيتۋدى مىندەتتەدى. ىشكى جاعدايىمىز جاقسارىپ, حالىقتىڭ ءال-اۋقاتى مەن تۇرمىس-تىرشىلىگى ارتاتىن بولسا, مەمملەكەتتىگىمىز دە كەمەلدەنە تۇسەرى داۋسىز,–دەيدى گەننادي يۆانوۆيچ.
ونىڭ مالىمدەۋىنشە, الداعى جىلدار تاۋەلسىزدىگىمىزدىڭ تاماشا تابىستارىن ودان ءارى ەسەلەي ءتۇسىپ, وزگەرىستەر داۋىرىنە جول اشاتىن بولادى.
ءومىر ەسقالي.
دەرەك: egemen.kz
سۋرەت: تالعات تانىباەۆ.