استانا. 1 اقپان. تەننيستەن اۆستراليا اشىق بىرىنشىلىگىن الەمنىڭ ءبىرىنشى راكەتكاسى, سەربيالىق نوۆاك دجوكوۆيچ بەسىنشى مارتە جەڭىپ الدى. بۇل تۋرالى egemen.kz حابارلادى.
نوۆاك بيىلعى سايىستىڭ فينالىندا ۇلىبريتانيالىق ەندي ماررەيمەن كەزدەستى. ءتورت سەتكە سوزىلعان تارتىستا سەرب تەننيسشىسى 3:1 ەسەبىمەن باسىم ءتۇستى.
العاشقى ەكى كەزەڭدە قارسىلاستار جەڭىمپازدى تاي-برەيك ارقىلى انىقتادى. ءبىرىنشى سەتتە دجوكوۆيچتىڭ جولى بولىپ 7:6 (7:5) ەسەبىمەن كەزەڭدى ءوز پايداسىنا شەشتى. ال كەلەسى ساتتە ماررەي 6:7 (4:7) ەسەبىمەن جەڭىسكە جەتىپ, تارازى باسىن تەڭەستىردى. دەسەك تە, سوڭعى ەكى سەتتە بريتانيالىق بار بىلگەنىنەن جاڭىلىپ, بىرنەشە ورەسكەل قاتەلىكتەرگە جول بەردى. ناتيجەسىندە, ءۇشىنشى سەت 6:3 ەسەبىمەن سەربتىڭ پايداسىنا اياقتالدى. بۇل كەزەڭ نەبارى جارتى ساعاتقا سوزىلعانىن ايتا كەتەيىك. ويىن تاعدىرىن دا شەشكەن ءسات وسى كەزەڭ بولدى. سەبەبى, ءتورتىنشى سەتتە ماررەي مۇلدەم قارسىلىق كورسەتە المادى. ءتىپتى, ءوز دوبىنان دا ۇپاي الا الماعان ول قارسىلاسىنا 6:0 ەسەبىمەن ەسە جىبەرۋگە ءماجبۇر بولدى.
وسىمەن ماررەي دجوكوۆيچتەن 16-رەت جەڭىلىپ وتىر. قوس تەننيسشى بۇگىنگە دەيىن كورتتا 24 مارتە كەزدەسسە, سونىڭ 8-ىندە عانا ماررەي جەڭىس تويىن تويلاعان. ءتىپتى سوڭعى 9 كەزدەسۋدە بريتانيالىق ءبىر مارتە عانا دجوكوۆيچتىڭ وسال تۇسىن تاپقان ەكەن. تاعى ءبىر قىزىقتى جايت, بۇل قوس قارسىلاستىڭ اۆستراليا اشىق بىرىنشىلىگىندەگى 3-فينالى. ماررەيدىڭ وكىنىشىنە قاراي, بارلىعىندا سەربتىڭ باعى باسىم بولدى. سونداي-اق, ۇلىبريتانيا تەننيسشىسى ءۇشىن بۇل مەلبۋرندەگى 4-فينال ەكەنىن دە ايتا كەتەيىك. ۇشەۋىندە جولىنا دجوكوۆيچ توسقاۋىل بولسا, ءبىر مارتە شۆەيتساريالىق رودجەر فەدەرەردەن جەڭىلگەن.
ال نوۆاك دجوكوۆيچتىڭ بۇل اۆستراليا اشىق بىرىنشىلىگىندەگى 5-جەڭىسى. ول بۇعان دەيىن 2008, 2011, 2012 جانە 2013 جىلدارى مەلبۋرن تورىندە توپ جارعان ەدى. بۇرىن-سوڭدى اتالمىش تۋرنيردە مۇنداي جەتىستىككە ەشكىم جەتىپ كورمەگەن.
سونىمەن قاتار, اتالمىش جەڭىسپەن دجوكوۆيچ «ۇلكەن دۋلىعا» سايىستارىنىڭ 10 دۇركىن جەڭىمپازى اتاندى. ال ماررەيدىڭ ەنشىسىندەگى مۇنداي جەڭىستىڭ ازىرگە ەكەۋى عانا بار.
ەلامان قوڭىر.
دەرەك: egemen.kz.
سۋرەت: ausopen.com.