بۇگىن سەناتتىڭ جالپى وتىرىسىندا «ەۋرازيالىق ەكونوميكالىق وداق شەڭبەرىندە اۋىل شارۋاشىلىعى ونىمىنە ارنالعان قويمالىق كۋالىكتەردى شىعارۋ (بەرۋ), ولاردىڭ اينالىسى جانە وتەلۋ قاعيدالارى تۋرالى كەلىسىمدى راتيفيكاتسيالاۋ تۋرالى» قر زاڭى ماقۇلداندى, دەپ حابارلايدى Egemen.kz.
ماسكەۋدە 2023 جىلعى 31 شىلدەدە قول قويىلعان كەلىسىم ەۋرازيالىق ەكونوميكالىق وداق اياسىندا اۋىل شارۋاشىلىعى سالاسىنداعى ىنتىماقتاستىقتى جانە اۋىل شارۋاشىلىعى ونىمدەرىنىڭ ءوزارا ساۋداسىن دامىتۋعا باعىتتالعان.
«قۇجات قويما كۋالىكتەرىن بەرۋ, اينالىمعا شىعارۋ جانە ەاەو شەڭبەرىندە ولاردى وتەلۋىن رەتتەيدى, ولارعا قويىلاتىن تالاپتاردى ايقىندايدى. كەلىسىمگە بويىنشا قويما كۋالىكتەرى شىعارىلاتىن اۋىل شارۋاشىلىعى ونىمدەرىنىڭ تۇرلەرى مۇشە ەلدەردىڭ ۇلتتىق زاڭناماسىنا سايكەس انىقتالادى. ودان بولەك, ەاەو-عا مۇشە مەملەكەتتەر قاتىسۋشى ەلدىڭ قويما كۋالىكتەرى تۋرالى مالىمەتتەردى بىرىڭعاي ينتەرنەت-رەسۋرس ارقىلى الۋعا مۇمكىندىك بەرەتىن جۇيەنى قامتاماسىز ەتۋگە مىندەتتەنەدى», دەدى سەناتور زاكىرجان كۋزيەۆ.
ەۋرازيالىق ەكونوميكالىق وداق مەملەكەتتەرى اراسىندا كەلىسىمدى جۇزەگە اسىرۋ:
قويما كۋالىكتەرىنىڭ تۇراقتى اينالىمىن قامتاماسىز ەتۋگە, سونداي-اق ولاردىڭ يەلەرىنە قارجىلىق رەسۋرستارعا قول جەتكىزۋىن ارتتىرۋعا; اۋىل شارۋاشىلىعى تاۋارلارىنىڭ ەلەكتروندى ساۋداسىن دامىتۋعا; قازاقستاننىڭ قويما كۋالىكتەرىن ەۋرازيالىق ەكونوميكالىق وداق نارىعىندا ىلگەرىلەتۋگە, قويما كۋالىكتەرى كەپىلىمەن نەسيە الۋ مۇمكىندىگىن جاساۋعا جانە نارىقتىڭ قولايلى جاعدايىندا تاۋاردى ساتۋ ارقىلى ەلدىڭ اگرارلىق سەكتورىنىڭ تابىسىن ارتتىرۋعا ىقپال ەتەدى.«قازاقستانداعى استىق قولحاتتارى اينالىمىن زاڭنامالىق رەتتەۋ تاجىريبەسى - كەلىسىمنىڭ نەگىزى ەكەنىن اتاپ وتكەن ءجون. جالپى, كەلىسىمدى جۇزەگە اسىرۋ مەملەكەتتىك بيۋدجەتتەن قارجىلىق شىعىنداردى تالاپ ەتپەيدى, سونداي-اق, جاعىمسىز الەۋمەتتىك-ەكونوميكالىق جانە قۇقىقتىق سالدارلارعا اكەپ سوقتىرمايدى», دەپ تۇيىندەدى ءسوزىن دەپۋتات.