پسيحولوگتاردىڭ ايتۋىنشا, قۇرمەتتى دەمالىستان كەيىنگى ۋاقىت – ادامنىڭ ءوزى ءۇشىن ءومىر سۇرەتىن ەڭ ادەمى كەزەڭى. قىزمەت بابىمەن ءجۇرىپ ەكىنشى, بالكىم ءۇشىنشى, ءتورتىنشى ورىنعا ىسىرىلىپ قالعان ارمان-قيالدارىن ادام زەينەتكە شىققاننان كەيىن جوعالتپاي جۇزەگە اسىرا السا – ول ءومىرى ماعىنالى ناعىز باقىتتى ادام. سوزىمىزگە دالەل رەتىندە استانا قالاسىندا ورنالاسقان «بەلسەندى ۇزاق ءومىر ءسۇرۋ ورتالىعىنىڭ» اتالارى مەن اجەلەرىن ايتۋعا بولادى. كۇنى كەشە وسى قازىنالى قاريالار «ەگەمەن قازاقستان» گازەتى رەداكتسياسىنا قوناققا كەلىپ, جۋرناليستەرمەن كەزدەسىپ, جۇمىس بارىسىمەن تانىستى. كەزدەسۋدى «قازاق گازەتتەرى» جشس ديرەكتورىنىڭ ورىنباسارى قامبار احمەت جۇرگىزدى, دەپ حابارلايدى Egemen.kz.
ورتالىق زەينەتكەرلەردى مادەني, سپورتتىق جانە ىسكەرلىك ومىرگە الەۋمەتتەندىرۋ ماقساتىندا قۇرىلعان. ونىڭ ىشىندە ءتۇرلى باعىتتاعى ۇيىرمەلەر مەن سەكتسيالار بار. اتاپ ايتساق, جاتتىعۋ زالى, كومپيۋتەرلىك سىنىپ, ۆوكال, شىعارماشىلىق شەبەرلىكپەن اينالىسۋعا ارنالعان بولمەلەر جابدىقتالعان. قاريالار قابىلەتىنە قاراي مۋزىكامەن, ءتىل ۇيرەنۋمەن, بيمەن جانە قولونەرمەن اينالىسادى. سونىمەن قاتار ورتالىق مۇشەلەرىنە كومپيۋتەرلىك ساۋاتتىلىقتى وقىتۋ كۋرستارى دا قاراستىرىلعان.
بۇل تۋرالى ورتالىقتىڭ «ۇلاعات» اتتى ادەبي-مادەني ۇيىرمەسىنىڭ جەتەكشىسى ءلاززات دۇيسەنبايقىزى بايانداپ بەردى.
«ورتالىقتا زەينەتكەرلەردىڭ جان-جاقتى دامۋىنا بارلىق جاعداي قاراستىرىلعان. قاريالارىمىز ءبىلىم الىپ, ونەر ۇيرەنىپ قوعامدىق ومىرگە بەلسەنە اتسالىسىپ جاتىر. ءتىپتى زامان مەن تۇرمىستىڭ ىقپالىنان دامىتۋعا مۇمكىن بولماعان كەي قابىلەتتەرىن وسىندا كەلىپ شىڭداپ, ءبىرشاما ناتيجەگە جەتىپ-تە قالدى. ماسەلەن, دومبىرانى ورتالىققا كەلىپ ۇيرەنگەن زەينەتكەرلەر «اسىل مۇرا» وركەسترى بولىپ ۇيىمداسىپ, كۇنى كەشە الماتىدا وتكەن «ونەرلى ەلدىڭ ءورىسى بيىك» رەسپۋبليكالىق اتا-اپالار اراسىنداعى ونەر سايىسىندا باس جۇلدەنى جەڭىپ الدى», دەدى ل. دۇيسەنبايقىزى.
سونىمەن قاتار قاريالار «ەگەمەن قازاقستان» گازەتىنىڭ وقىرماندارى ەكەنىن ايتىپ, جۋرناليستەرگە ىزگى ءىلتيپاتىن جەتكىزدى. باس رەداكتوردىڭ ورىنباسارى تالعات باتىرحان ادامعا ءومىردىڭ ءار ءساتى ساۋلەلى, وزىنشە قىمبات ەكەنىن ايتىپ, جازۋشى تولەن ابدىكتىڭ ءسوزىن مىسال ەتتى.
«مەن ءبىر نارسەنى تۇسىنبەيمىن. كەي زامانداستارىم قازىرگى كۇنىمدى جيىرما بەسىمە ويلانباستان ايىرباستار ەدىم دەپ قيالداپ وتىرادى. ال مەن ولاي ايتا المايمىن. مەن جيىرما بەسىمە قايتا ورالسام, بۇل دەگەن قازىرگى بالداي ءتاتتى نەمەرەلەرىمنەن باس تارتۋ دەگەن ءسوز عوي», دەيدى ەكەن اقساقال اعامىز. سوندىقتان تورىمىزگە قوناق بولىپ كەلىپ وتىرعان قۇرمەتتى قاريالار, سىزدەر وتە ادەمى ۋاقىتتى باستان كەشىرىپ جاتسىزدار. وسى جاستاعى قىزىقتارىڭىز قازىرگە دەيىن كورگەن قىزىقتارىڭىزدان كوپ بولسىن», دەپ تىلەك ءبىلدىردى ت. باتىرحان.
كەزدەسۋ سوڭىندا ديرەكتوردىڭ ورىنباسارى قامبار احمەت قاريالارعا العىسىن ايتىپ, رەداكتسيانىڭ اتىنان ارناۋلى سىيلىقتار تابىس ەتتى.