استانا. 31 قاڭتار. استانالىق «بارىس» ءوز ايدىنىندا ماسكەۋدىڭ تسسكا-سىن قابىلداپ, 1:5 ەسەبىمەن ەسە جىبەردى. بۇل تۋرالى egemen.kz حابارلادى.
بۇگىندە تسسكا قۇرلىقتىق حوككەي ليگاسىنىڭ باتىس كونفەرەنتسياسىندا جەكە دارا كوش باستاپ تۇر. ءتىپتى شىعىس كونفەرەنتسياسىنىڭ كوشباسشىسى قازاندىق «اق بارستىڭ» تسسكا-دان 12 ۇپايى كەم. ازىرگە قحل-داماسكەۋلىكتەرگە تەڭ كەلەر كوماندا تابىلار ەمەس. سول سەبەپتى دە استاناداعى كەزدەسۋدە ويىن تىزگىنىتولىعىمەن قوناقتاردىڭ قولىندا بولدى. بۇل ويىنعا تسسكا-نىڭ كوشباسشى ويىنشىسى الەكساندر رادۋلوۆ قاتىسپاعانىن ايتا كەتەيىك. باس باپكەر دميتري كۆارتالنوۆ بۇل جولى وعان دەمالىس بەرگەن ەكەن.
تارتىستىڭ نەبارى 6-مينۋتىندا ماسكەۋلىكتەر ويىنشى باسىمدىعىنا يە بولدى. قاقپا ماڭىنداعى قاربالاستا «بارىس» قاقپاشىسى پاۆەل پولۋەكتوۆ قارسىلاسىن ويىن ەرەجەسىنەن تىس ادىسپەن توقتاتقانى ءۇشىن ەكى مينۋتتىق ايىپ ۋاقىتىمەن جازالاندى. سوعان سايكەس ءبىزدىڭ كوماندا ساپىنداعى ءبىر ويىنشى ايدىننان قۋىلدى. دەسەك تە, بۇل باسىمدىقتى تسسكا ويىنشىلارى پايدالانا المادى. ءتىپتى, ارادا ءبىر مينۋت ۋاقىت وتكەندە وزدەرى دە 4 ويىنشىمەن قالۋعا ءماجبۇر بولدى. قارسىلاسىن قولىنداعى تاياعىمەن ۇرعانى ءۇشىن تسسكا حوككەيشىسى بوگدانكيسەلەۆيچ ايىبىن وتەيتىن ورىنعا اتتاندى.
ويىننىڭ 11-مينۋتىندا قوناقتار ەسەپ اشتى. رومان ليۋبيموۆتان پاس العان ماكسيم ءمامينبىزدىڭ قاقپانى ءدال كوزدەدى. گول جىبەرىپ العاننان كەيىن اندرەي نازاروۆ قاقپاشىنى الماستارىپ, پولۋەكتوۆتىڭ ورنىنا يانلاتسونى شىعاردى. باسەكەنىڭ 13 جانە 14-مينۋتتارىندا «بارىس» ساپىنان نيكولاي انتروپوۆ پەن ماكسيم سەمەنوۆ بىردەي ايدىننان قۋىلىپ, قوناقتار ەكى ويىنشى باسىمدىعىنا يە بولدى. ءۇش ويىنشىمەن قالعان استانالىقتار تسسكا-نىڭ شابۋىلىنا 22 سەكۋند قانا شىداپ تۇرا الدى. لاتسو قورعاعان قاقپا ماڭىندا ۇرىمتال ءساتتى ىزدەگەن تسسكا ويىنشىلارى 15-مينۋتتا ەكىنشى شايبالارىن سوعىپ, ەسەپتى ەسەلەدى. بۇل جولى مەرگەندىگىمەن كوزگە تۇسكەن سەرگەي اندرونوۆ.
ەكىنشى كەزەڭدە ويىن ورنەگى وزگەرىسسىز قالدى. ۋاقىت وتكەن سايىن ماسكەۋلىكتەر قارقىندارىن كۇشەيتىپ, كەلەسى ۇزىلىسكە دەيىن ءۇش شايبا سوعۋعا مۇمكىندىك تاپتى. الدىمەن 25-مينۋتتا ستەفان دا كوستا ەسەپتى 0:3-كە جەتكىزسە, ارادا 7 مينۋت ۋاقىت وتكەن كەزدە نيكيتا زايتسەۆتىڭ قانجىعاسى مايلاندى. بۇل كەزدە تسسكا-نىڭ ءبىر ويىنشىسى ارتىق بولعانىن ايتا كەتەيىك. ن.انتروپوۆ تاعى دا ەكى مينۋتتىق ايىپ ۋاقىتىمەن جازالانعان ەدى. ال كەزەڭ اياقتالار تۇستا ر.ليۋبيموۆ كومانداسىنىڭ بەسىنشى شايباسىن سوعىپ, ماسكەۋلىكتەر ايقىن باسىمدىققا يە بولدى.
وسىلايشا العاشقى ەكى كەزەڭدە ويىن تاعدىرى شەشىلىپ قويدى. الايدا, «بارىس» ءۇشىنشى كەزەڭنىڭ باسىندا ەسەپتى قىسقارتار تاماشا مۇمكىندىككە يە بولعان ەدى. كەزەڭ باستالعان بەتتە تسسكا ساپىنان ەكى بىردەي ويىنشى ايدىننان قۋىلدى. وكىنىشكە قاراي, 5ح3 فورماتىندا ويناسا دا ايدىن يەلەرى بۇل مۇمكىندىكتەن ەش ناتيجە شىعارعان جوق. تەك 44-مينۋتتا «بارىس» ويىنشىلارى جالعىز شايبا سوعۋدىڭ جولىن تاپتى. نايدجەل دوۋس پەن برەندون بوچەنسكي ۇيىمداستىرعان شابۋىلعا ناتيجەلى نۇكتە قويعان مايك لاندين تسسكا قاقپاسىنان ساڭىلاۋ تاپتى. قالعان ۋاقىتتا ەسەپ وزگەرمەي, قوناقتار كەزەكتى ءۇش ۇپايىن قورجىندارىنا سالدى.
تسسكا-نىڭ قانشالىقتى باسىمدىققا يە بولعانىن مىنا ءبىر جايتتان دا بىلۋگە بولادى. قوناقتار 60 مينۋتتىڭ ىشىندە 53 مارتە ءبىزدىڭ قاقپاعا ءدال سوققى جاساعان. سونىڭ 5-ءۋى گولعا اينالسا, 48-ءىن قاقپاشىلار پولۋەكتوۆ پەن لاتسو قايتارا بىلگەن. ال ءوز كەزەگىندە, «بارىس» ويىنشىلارى 26 ءدال سوققى جاساپ, سونىڭ بىرەۋىنەن عانا ناتيجە شىعارا ءبىلدى.
سونىمەن قاتار, جانكۇيەرلەر بۇل كەزدەسۋدە «بارىس جولبارىسى» اتانىپ جۇرگەن دامير رىسپاەۆ پەن تسسكا الىبى ەۆگەنيارتيۋحيننىڭ اراسىنداعى تەكە-تىرەستى كۇتكەن ەدى. قحل-دا ءارتيۋحيننىڭ جۇدىرىعىنا توتەپ بەرەر حوككەيشى جوقتىڭ قاسى. ال 19 جاستاعى رىسپاەۆ جانكۇيەرلەرگە ەندى تانىلا باستاعان «جاس ءبورى». سوندىقتان قوس تافگايدىڭ توبەلەسىن كۇتكەندەر كوپ بولدى. دەگەنمەن, ويىن بارىسىندا ونداي قاقتىعىس تىركەلمەدى.
«بارىس» بۇل جەڭىلىسكە قاراماستان, باتىس كونفەرەنتسياسىنداعى 6-ورنىن ساقتاپ قالدى. كەلەسى قارسىلاسىمىز «سوچي» كومانداسى. 4 اقپان كۇنى بولاتىن اتالمىش ويىندى استانالىقتار سىرت ايدىندا وتكىزەدى.
ايتا كەتەيىك, «بارىس» ەندى 6 كەزدەسۋ قاتارىنان قوناقتا وينايدى. تەك 20 اقپان كۇنى ءوز ايدىنىنا ورالىپ, نوۆوكۋزنەتسكىنىڭ «مەتالۋرگىن» قابىلدايدى.
ەلامان قوڭىر.
دەرەك: egemen.kz.
سۋرەت: hcbarys.kz.