پالاتا سپيكەرى قابيبوللا جاقىپوۆتىڭ توراعالىعىمەن ءماجىلىس بيۋروسى ءوتىپ, جالپى وتىرىستىڭ كۇن ءتارتىبى ناقتىلاندى, دەپ حابارلادى ءماجىلىستىڭ ءباسپاسوز قىزمەتى.
دەپۋتاتتار قاراۋىنا وزبەكستان مەملەكەتىمەن ادامداردىڭ رەادميسسياسى تۋرالى كەلىسىمدى جانە ىسكە اسىرۋ ءتارتىبى تۋرالى اتقارۋ حاتتاماسىن, سونداي-اق, قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى «قازاقستاندا ەنەرگيا تيىمدىلىگىن ارتتىرۋ» جوباسى بويىنشا گرانت تۋرالى كەلىسىمدى, سونىمەن قاتار, حالىقارالىق ۆاليۋتا قورى كەلىسىمىنىڭ باپتارىنا تۇزەتۋلەردى راتيفيكاتسيالاۋعا قاتىستى ءۇش بىردەي راتيفيكاتسيالىق قۇجات ەنگىزىلمەك.
ال, پالاتاعا قازاقستان رەسپۋبليكاسىنىڭ ۇكىمەتى مەن ۆەتنام سوتسياليستىك رەسپۋبليكاسىنىڭ ۇكىمەتى اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ, تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ ينتەگراتسيالانعان ۆاليۋتا نارىعىن ۇيىمداستىرۋ سالاسىنداعى ىنتىماقتاستىق تۋرالى كەلىسىمدەردى راتيفيكاتسيالاۋعا بايلانىستى قورىتىندى ازىرلەۋ مەرزىمىن تاعايىنداۋ ۇسىنىلىپ وتىر.