ينتەرنەت-الاياقتارعا الدانىپ قالعان جەتىسۋ وبلىسىنىڭ تۇرعىندارى 516 ميلليون تەڭگەدەن استام سوماعا شىعىنعا باتقان, دەپ حابارلايدى Egemen.kz Polisia.kz-كە سىلتەمە جاساپ.
وبلىستىق پوليتسيا دەپارتامەنتىنىڭ كريمينالدىق پوليتسيا باسقارماسى كيبەر-الاياقتىققا قاتىستى دەرەكتەردى جاريالادى.
بيىل ينتەرنەت-الاياقتاردىڭ ارەكەتىنەن كەلگەن جالپى ماتەريالدىق شىعىن 516 ميلليون تەڭگەدەن اسىپ وتىر. قىلمىسكەرلەر ازاماتتاردى الداۋدىڭ ءتۇرلى ايلا-تاسىلدەرىن جەتىلدىرىپ وتىر, بۇل رەتتە قۇربانداردىڭ قاتارى كۇن ساناپ كوبەيىپ كەلەدى. اسىرەسە شەتەلدەن ارەكەت ەتەتىن الاياقتار ەرەكشە قاۋىپ توندىرەدى, سەبەبى ولاردىڭ باسقا مەملەكەتتەردە ورنالاسۋى قۇقىق قورعاۋ ورگاندارىنىڭ ولاردى انىقتاپ, جاۋاپقا تارتۋىن كۇردەلەندىرەدى.
ەڭ كوپ تارالعان الاياقتىق ادىستەرىنىڭ قاتارىندا جالعان ينتەرنەت-دۇكەندەر, جەڭىل تابىسقا شاقىراتىن ۇسىنىستار, فيشينگتىك سايتتار مەن «بانك قىزمەتكەرلەرىنىڭ» اتىن جامىلىپ جاسالاتىن قوڭىراۋلار بار. قاسكۇنەمدەر پسيحولوگيالىق قىسىم كورسەتىپ, مانيپۋلياتسيا ارقىلى ازاماتتاردى جەكە دەرەكتەرىن نەمەسە قاراجاتىن ءوز ەركىمەن بەرۋگە ءماجبۇر ەتەدى. قۇقىق قورعاۋ ورگاندارى تۇرعىندارعا قىراعىلىق تانىتىپ, بانك كارتالارىنىڭ مالىمەتتەرىن بوگدە ادامدارعا بەرمەۋگە, تولەم جاساماس نەمەسە كەلىسىمشارتتارعا قول قويماس بۇرىن اقپاراتتىڭ دۇرىستىعىن مۇقيات تەكسەرۋگە كەڭەس بەرەدى», دەلىنگەن حابارلامادا.
ايتا كەتەيىك, شەتەلدەگى الاياقتىق ارەكەتتەردى انىقتاپ, زالالسىزداندىرۋ ماقساتىندا پوليتسيا حالىقارالىق ۇيىمدارمەن تىعىز بايلانىس ورناتىپ وتىر.