بەلگىلى اۋەسقوي ۆەلوشاباندوز ەرنات راحمەتوللا اتى اڭىزعا اينالعان تاەكۆوندوشى مۇستافا وزتۇرىكتىڭ تۋعانىنا 70 جىل تولۋىنا وراي ۆەلوشەرۋ وتكىزدى. ۆەلوشەرۋدىڭ ماقساتى - دارا تۇلعا مۇستافا كابەن ۇلى وزتۇرىكتى ەسكە الۋ, رۋحىنا تاعزىم ەتۋ, ونەگەلى ءومىرى مەن ەڭبەگىن دارىپتەۋگە ۇلەس قوسۋ.
42 جاستاعى اۋەسقوي سپورتشى سورە ءۇشىن بايتەرەك مونۋمەنتىن تاڭداعان. ەرنات راحمەتوللانى وتباسى مەن جاقىندارى, سونداي-اق بەلگىلى ابايتانۋشى اسان وماروۆ اق باتاسىمەن شىعارىپ سالدى.
ەرنات راحمەتوللا ەلوردانىڭ ىزعارلى قىسىنا قاراماي جالعىز ءوزى 5 ساعاتتا 70 شاقىرىمدى ءجۇرىپ ءوتتى. شەرۋ بايتەرەك مونۋمەنتىنەن باستالىپ, تۇركىستان كوشەسى > دوستىق كوشەسى > قابانباي باتىر داڭعىلى > انادولى (بۇرىنعى 28/1) كوشەسى > قابانباي باتىر داڭعىلى > قارقارالى تاس جولى > قابانباي باتىر كەسەنەسى بويىمەن جالعاسىپ, قايتا بايتەرەك مونۋمەنتى الدىنان اياقتالدى.
مارەگە ويداعىداي جەتكەن ۆەلومارافونشى جولدىڭ جاقسى بولعانىن, سونداي-اق ءبىر رەت قۇلاپ قالعانىن تىلگە تيەك ەتتى. سونىمەن قاتار مۇستافا وزتۇرىكتىڭ ەڭبەگىن دارىپتەپ, وسىنداي يگى ءىس جاساعان ۆەلوسپورتشىنىڭ يىعىنا اقتوعايلىقتار شاپان جاۋىپ, ەستەلىككە سىيلىق تارتۋ ەتتى.
«جاستارعا قار, مۇز, ىزعاردا ۆەلوسيپەدپەن ءجۇرۋ ارقىلى ادامنىڭ مۇمكىندىكتەرىن كورسەتۋ, ءتوزىم, شىدام, سالاۋاتتى ءومىر سالتى, تاباندىلىق, ىستىق قايراتتى ناسيحاتتاۋ, ۇلگى ەتۋ. قازاق پەن تۇرىككە ورتاق ۇل مۇستافا وزتۇرىك ارقىلى قازاقستان مەن تۇركيانىڭ باۋىرلاستىعىن, دوستىعىن ناسيحاتتاۋ. ولاردى وتانسۇيگىشتىككە, ەل ءۇشىن ەرەن ەڭبەك ەتۋگە, قايسار بولۋعا ۇندەۋ», دەيدى ە.راحمەتوللا.
ايتا كەتەيىك, ۆەلوشاباندوز بۇعان دەيىن رەسپۋبليكالىق جانە حالىقارالىق دەڭگەيدە 14 ۆەلوشەرۋ وتكىزگەن.