قىزدار ۋنيۆەرسيتەتىنىڭ 80 جىلدىق مەرەيتويى اياسىندا جاڭا وقۋ عيماراتى پايدالانۋعا بەرىلىپ, پانارالىق عىلىمي زەرتحانالاردىڭ اشىلۋ ءراسىمى ءوتتى. سونىمەن قاتار شەتەلدىك وقۋ ورىندارىمەن ىنتىماقتاستىق كەلىسىمدەرىنە قول قويىلدى.
سالتاناتتى ءىس-شاراعا قازاقستاننىڭ ەڭبەك سىڭىرگەن قايراتكەرى, ۋنيۆەرسيتەت تۇلەگى ورىنشا قارابالينا, عىلىم جانە جوعارى ءبىلىم ءمينيسترى ساياسات نۇربەك جانە ۋنيۆەرسيتەتتىڭ ديرەكتورلار كەڭەسىنىڭ كوراعاسى ومارحان وكسىكباەۆ, حيميا عىلىمدارىنىڭ دوكتورى, پروفەسسور مۇحامەدقالي ماتاەۆ قاتىستى.
«ۋنيۆەرسيتەت جاس مامانداردى تاربيەلەپ قانا قويماي, عىلىم سالاسىن دامىتۋعا دا دەن قويىپ وتىر. ۇلكەن عىلىمي ورداعا اينالۋىنا كوڭىل ءبولىپ, زەرتحانالار اشىپ جاتىرمىز. رەسپۋبليكادا جوق قۇرىلعىلار الدىندى. زەرتحاناداعى وقۋدىڭ 30 پايىزى وقۋ-ادىستەمەلىك بولسا, 70 پايىزى عىلىمي تاجىريبە جيناقتاۋعا باعىتتالعان. عالىمداردىڭ وسى زەرتحانالارداعى تاجىريبەسىنىڭ ارقاسىندا ەلىمىزدە عىلىمي جاڭالىقتار بولادى سەنىمدەمىن. سوندىقتان بۇل ۋنيۆەرسيتەت تەك مۇعالىم دايارلاۋعا عانا ەمەس, عىلىمدى دامىتۋعا دا ۇلەس قوسادى», دەدى ومارحان وكسىكباەۆ.
«حيميا-بيولوگيا-فيزيكا» باعىتىنداعى ىرگەلى جانە قولدانبالى عىلىمي زەرتتەۋلەر جۇرگىزۋگە لايىقتالىپ جاسالعان زەرتحانا ورتالىعى بولاشاقتا وزگە دە باعىتتاردا داميتىن بولادى.
ورتالىقتا سپەكترلىك تالداۋ, رەنتگەندىك فازالىق تالداۋ زەرتحاناسى, جاڭا ماتەريالداردى سينتەزدەۋ, كۆانتتىق ماگنيتومەتريالىق زەرتتەۋلەر, ەلەكتروندىق قۇرىلىمدىق زەرتتەۋلەر, تابيعي قوسىلىستار حيمياسى, كرەاتيۆتى يدەيالار جانە ىنتىماقتاستىق زەرتحاناسى, بيومەديتسينالىق زەرتتەۋلەرمەن اينالىساتىن بيومەديتسينالىق زەرتتەۋلەر جانە جاڭا بيولوگيالىق ونىمدەر مەن تەحنولوگيالاردى جاساۋ ءۇشىن بيوتەحنولوگيا, گەندىك ينجەنەريا بويىنشا زەرتتەۋلەر جۇرگىزىلەتىن بيوتەحنولوگيالىق زەرتتەۋلەر جاسايتىن ءارتۇرلى باعىتتاعى زەرتحانالار بار.
مەرەيتويلىق ءىس-شارا اياسىندا جاڭادان اشىلعان جاڭا عيماراتتا QyzPU Michigan State University, Sussex University اراسىندا ىنتىماقتاستىق تۋرالى كەلىسىمگە قول قويىلدى. سونىمەن قاتار QyzPU, Education University of Hong Kong جانە اباي اتىنداعى قازاق ۇلتتىق پەداگوگيكالىق ۋنيۆەرسيتەتى اراسىندا ۇستازدار بىلىكتىلىگىن ارتتىرۋ اكادەمياسىن قۇرۋ تۋرالى شارتقا قول قويدى. ەلىمىزدىڭ ءبىلىم سالاسى ءۇشىن ماڭىزدى تاعى ءبىر جاڭالىق – ءبىلىم بەرۋ مەن عىلىمي زەرتتەۋلەردى جاڭا دەڭگەيگە كوتەرۋگە جول اشاتىن Education University of Hong Kong پەن قازاقستاننىڭ جوعارى وقۋ ورىندارىنىڭ رەكتورلارى اراسىندا اليانس قۇرۋ تۋرالى كەىسىمگە كەلۋى.
Michigan State University ءبىلىم كوللەدجىنىڭ حالىقارالىق زەرتتەۋلەر جونىندەگى ۆيتسە-دەكانى, پروفەسسور اميتا چۋدگار كەلىسىمنىڭ ماڭىزدىلىعىن اتاپ ءوتىپ, ەكى تاراپتىڭ ءوزارا ىنتىماقتاستىعى ءبىلىم بەرۋ جۇيەسىن جەتىلدىرىپ, عىلىمي ىزدەنىستەر مەن يننوۆاتسيالىق شەشىمدەردى جۇزەگە اسىرۋعا زور ۇلەس قوساتىنىن ءبىلدىردى. Sussex University ءبىلىم جانە الەۋمەتتىك عىلىمدار مەكتەبىنىڭ جەتەكشىسى, ۆيتسە-پرەزيدەنتى پروفەسسور سايمون تومپسون QyzPU-مەن ەكى جىلدان بەرى سەرىكتەستىك ورناتىپ كەلە جاتقانىن, وسى ۋاقىتقا دەيىن وقىتۋشىلاردىڭ عىلىمي زەرتتەۋ پوتەنتسيالىن كوتەرۋ بويىنشا بىرلەسكەن جۇمىستار اتقارعانىن ايتتى. پروفەسسور بۇل كەلىسىمنىڭ نەگىزگى ماقساتى مۇعالىم دايارلاۋدى عانا ەمەس, ءبىلىم بەرۋدەگى زەرتتەۋلەردى دامىتۋ بويىنشا دا بىرلەسكەن جوبالاردى جۇزەگە اسىرۋ ەكەنىن اتاپ ءوتتى. گونكونگ ءبىلىم بەرۋ ۋنيۆەرسيتەتى ۆيتسە-پرەزيدەنتى پروفەسسور لو سينگ كاي ۋنيۆەرسيتەتپەن بىرلەسە مۇعالىمدەردىڭ بىلىكتىلىگىن ارتتىرۋعا ارنالعان كاسىبي وقىتۋ باعدارلامالارىن ازىرلەۋگە دايىن ەكەنىن جەتكىزدى.
مەرەيتوي اياسىندا وتكەن ماڭىزدى شارالاردىڭ ءبىرى – ۋنيۆەرسيتەتتە «Mazmundama» باسپاسىمەن بىرلەسە جاڭا يدەيالار مەن كرەاتيۆتى باستامالارعا ارنالعان «QyzPU Unispace» كوۆوركينگ ورتالىعىنىڭ سالتاناتتى اشىلۋى ءوتتى. «Mazmundama» باسپاسىنىڭ نەگىزىن قالاۋشى شىڭعىس مۇقان جوبانى كوپشىلىككە تانىستىرىپ, ورتالىقتىڭ ماڭىزدىلىعى مەن بولاشاعى جايلى پىكىرىمەن ءبولىستى.
الماتى