قازاق پوەزياسىنىڭ كورنەكتى وكىلى, اقىن, حالىق جازۋشىسى فاريزا وڭعارسىنوۆانىڭ مۇراسىن پەرزەنتى الماس ونعارسىنوۆ ەلوردا تورىندەگى ۇلتتىق ءارحيۆتىڭ قورىنا تاپسىردى.
«مۇنداي ءۇردىس سوڭعى جىلدارى داستۇرگە اينالدى. حالقىمىزدىڭ تانىمال تۇلعالارى قۇجاتتارى مەن جەكە قورىندا ساقتالعان قۇندى جادىگەرلەرىن ارحيۆكە اكەلىپ تاپسىرادى. بۇل, ءبىر جاعىنان, مەكەمە قورىن تولىقتىرسا, ەكىنشىدەن – بولاشاق ۇرپاقتىڭ عىلىمي-قوعامدىق زەرتتەۋىنە قاجەت بولارى انىق», دەيدى مەكەمە باسشىسى ساعيلا ەسىمسەيىتقىزى.
ەندىگى كەزەكتە بۇل قاتارعا قازاقتىڭ اقىن قىزى فاريزا وڭعارسىنوۆانىڭ مۇراسى قوسىلدى.
اربىرىنە جەكە-جەكە توقتالار بولساق, كەزىندە «جالىن», «جازۋشى» باسپاسىمەن جاساعان كەلىسىمشارتتارى, ءوز قولىمەن جازعان ءومىربايانى, قىزمەتتىك حاتتارى, وتباسى شەجىرەسى, وقىرماندارى مەن دوستارىنان كەلگەن حاتتار, ءار جىلدارى تۇسكەن فوتو-سۋرەتتەرى, ءوز قالامىنان تۋعان «باقىت پەن مۇڭ» دراماسى, «كامشات» دەرەكتى حيكاياتى, «جەر استىنداعى تەڭىز», «اكە ءۇمىتى», «قىز عۇمىرى», ت.ب. تۋىندىلارىنىڭ قولجازبا نۇسقالارى بار ەكەن.
سونىمەن قاتار اۋدارمالارى, اقىن اپامىزدىڭ شىعارماشىلىعى حاقىندا پىكىر بىلدىرگەن: ع.مۇسىرەپوۆ, ءا.تاجىباەۆ, ك.احمەتوۆا قاتارلى قالامگەرلەر قولتاڭباسى, ت.ب. مۇرالار سورەدەن ورىن الدى.
«الداعى ۋاقىتتا اقىن اپامىزدىڭ تىزىمگە الىنعان مۇرالارىنىڭ ۋاقىتى انىقتالادى ءھام قۇجاتتار سيپاتىنا (تۇپنۇسقا ما, الدە كوشىرمە مە) عىلىمي-ساراپتاما جاسالادى» دەيدى ارحيۆ ماماندارى.