9-سىنىپ وقۋشىسى نۇرالي امانگەلديەۆ عارىش كەڭىستىگىندە لازەرلىك ساۋلەلەنۋ ارقىلى ەنەرگيا جەتكىزەتىن يننوۆاتسيالىق قۇرىلعى جاساپ شىعاردى.
اباي وبلىسىنىڭ جەزكەنت كەنتىندەگى مەكتەپ-ليتسەيى وقۋشىسىنىڭ جوباسى عارىشتاعى جەرسەرىكتەر مەن عارىش ستانسالارىن ەنەرگيامەن قامتاماسىز ەتۋ ماسەلەسىن شەشۋگە باعىتتالعان. ءنۇراليدىڭ ونەرتابىسى ەكى بولىكتەن تۇرادى. ءبىرىنشى بولىگى – لازەر ساۋلەسىن باعىتتايتىن فوكۋس جۇيەسى بار عارىش كەمەسى, ال ەكىنشى بولىگى – لازەر ساۋلەسىن ەلەكتر ەنەرگياسىنا اينالدىراتىن فوتورەزيستور ورناتىلعان قۇرىلعى. لازەر ساۋلەسى فوتورەزيستورعا ءتۇسىپ, ونى تۇرلەندىرگىش ارقىلى ەلەكتر ەنەرگياسىنا اينالدىرادى. بۇل ەنەرگيا شامىن جاعۋعا نەمەسە ۇيالى تەلەفوندى قۋاتتاۋعا جەتەدى.
جاس ونەرتاپقىش قۇرىلعىنى 10 مەتر قاشىقتىقتا سىناپ, ونى جاڭبىر, قار, تۇمان سياقتى ءتۇرلى اۋا رايى جاعدايىندا سىناقتان وتكىزگەن. سىناق ناتيجەلەرى ونەرتابىستىڭ تۇراقتى ءارى سەنىمدى ەكەنىن كورسەتتى. «عارىشتا ەنەرگيا تاپشىلىعى ماسەلەسى بار. جەرسەرىكتەر مەن عارىش كەمەلەرى ەنەرگيانىڭ ازدىعىنان ىستەن شىعۋى مۇمكىن. مەن عارىشكەرلەرگە كومەك رەتىندە وسى قۇرىلعىنى جاسادىم. جوبانى جاساۋعا ەكى جىلدان اسا ۋاقىت جۇمسادىم, قولجەتىمدى ماتەريالداردى پايدالانىپ, عارىشتا ەنەرگيا جەتكىزۋ مۇمكىندىگىن جانە عارىشتا لازەرمەن ەنەرگيا جەتكىزۋ الدەقايدا ءتيىمدى بولاتىنىن دالەلدەدىم», دەيدى جاس ونەرتاپقىش.
2019 جىلى نۇرالي جوباسىن ماسكەۋ فيزيكا-تەحنيكالىق ينستيتۋتىنىڭ بايقاۋىندا تانىستىرىپ, جوعارى باعاعا يە بولعان. كەيىننەن قۇرىلعىعا قۋاتى مىقتى لازەر ورناتىپ, باعدارلامالىق كودىن جەتىلدىرە تۇسكەن. جاس ونەرتاپقىش جوباسىن ودان ءارى دامىتىپ, بايقوڭىردا وتەتىن حالىقارالىق بايقاۋعا قاتىسۋدى جوسپارلاپ وتىر. بولاشاقتا قۇرىلعىعا كۇن باتارەيالارىن قوسىپ, ونى تۇرمىستىق قاجەتتىلىكتەرگە, ونىڭ ىشىندە لازەرلىك زاريادتاۋ قۇرىلعىلارى ارقىلى ۇيالى تەلەفونداردى قۋاتتاۋعا قولدانىپ كورمەك.