قازاقستان مەن وزبەكستان اراسىندا «Jibek joly» اتتى جاڭا تەمىرجول تۋرى ىسكە قوسىلادى. «الماتى – تۇركىستان – تاشكەنت – الماتى» باعىتىنداعى العاشقى رەيس ەرتەڭ, 16 قاراشا كۇنى جولعا شىعادى.
حالىقارالىق تەمىرجول تۋرى تۋريستەرگە بەس كۇن ىشىندە ەجەلگى قالالاردىڭ اتموسفەراسىنا ەنىپ, ۇلى جىبەك جولىنىڭ ىزىمەن ساياحاتتاۋعا مۇمكىندىك بەرەدى. مارشرۋت تۇركىستان مەن تاشكەنتتىڭ باستى كورىكتى جەرلەرىن قامتيدى. تۋريستەرگە ىڭعايلى بولۋ ءۇشىن تۋر باعدارلاماسىندا گيد قىزمەتى, تاماقتانۋ, كولىك قىزمەتى, كىرۋ بيلەتتەرى قاراستىرىلعان.
«بىرلەسكەن كۇش-جىگەردىڭ ناتيجەسىندە, ەكى ەلدى بايلانىستىراتىن ەرەكشە تەمىرجول تۋرى ىسكە قوسىلماق. اتالعان تۋر ءبىزدىڭ ازاماتتارىمىز بەن ەلدەرىمىزدىڭ مادەني بايلىعى مەن تاريحي مۇراسىنا قىزىعۋشىلىق تانىتاتىن شەتەلدىك تۋريستەر ءۇشىن ىڭعايلى ءارى قولجەتىمدى بولماق. بۇل ەلىمىز بەن وزبەكستان اراسىنداعى مادەني بايلانىستاردى نىعايتۋ مەن ءتۋريزمدى دامىتۋداعى ماڭىزدى قادام», دەپ اتاپ ءوتتى تۋريزم جانە سپورت ۆيتسە-ءمينيسترى ەرجان ەركىنباەۆ.
سونداي-اق ساياحاتشىلار ورتالىق ازيا اۋماعىنداعى ەڭ كونە قالالاردىڭ ءبىرى – وتىرار قالاسىمەن تانىسا الادى. تۋر باعدارلاماسىنا ارىستان باب كەسەنەسىنە, «ازىرەت سۇلتان» تاريحي-مادەني قورىق-مۋزەيىنە, ورتالىق ازياداعى ەڭ ۇلكەن «كەرۋەن ساراي» تۋريستىك كەشەنىنە بارۋ كىرەدى. تاشكەنتتەگى تۋر اياسىندا قالانىڭ تاريحي نىساندارىمەن عانا ەمەس, سونىمەن قاتار زاماناۋي دامۋىمەن دە تانىسۋعا بولادى. ايتالىق, تۋريستەر حازىرەت يمام كەشەنى, باراقحان مەدرەسەسى, ءابۋ باكر كاففالي شاشي, تولە بي كەسەنەسى سياقتى تاريحي ورىنداردى ارالاپ, وزبەكستان استاناسىنىڭ زاماناۋي كورىكتى جەرلەرىنىڭ ءبىرى «Magic City» ساياباعىنا ەكسكۋرسيا جاسايدى. بارلىق ەكسكۋرسيالار كاسىبي گيدتەردىڭ جەتەكشىلىگىمەن ۇيىمداستىرىلادى.
ساپار بارىسىندا پويىزدا ءتۇرلى ويىن-ساۋىق شارالارى: شاحمات, UNO سياقتى ۇستەل ويىندارى, سىيلىقتار ويناتىلاتىن ۇتىس ويىنى وتكىزىلەدى.
جولاۋشىلارعا پويىزدا فيلمدەر مەن دەرەكتى باعدارلامالاردى كورۋگە, مۋزىكا تىڭداۋعا, كىتاپ وقۋعا «Vputi.kz» مۋلتيمەديالىق جۇيەسى قولجەتىمدى بولادى. سونداي-اق تۋريستەرگە تۋردىڭ باعدارلاماسى مەن قالالاردىڭ كارتالارى بەينەلەنگەن بۋكلەتتەر ۇسىنىلادى. ايتا كەتەيىك, تۋرپاكەت بيلەتتەرى تۋريستىك اگەنتتىكتەر ارقىلى ساتىلدى.
حالىقارالىق تۋردى «Tau Komek Travel», «تۇران قازاقستان ترەۆەل», «Grand Soluxe Travel Company», «SkyWay Travel», «Kompas», «KhanTuran Travel» كومپانيالارىمەن بىرلەسىپ «جولاۋشىلار تاسىمالى» اق ىسكە اسىرادى. «Kazakh Tourism» ۇك» اق مارشرۋتتىڭ حالىقارالىق دەڭگەيدە ناسيحاتتالۋىنا قولداۋ كورسەتەدى.