«ەركىن ءسوزدىڭ» جەڭىمپازدارى

حالىقارالىق فورۋم تۇركى ەلدەرىنىڭ مەديا كەڭىستىگىندەگى سالالىق جۋرناليستيكانىڭ ساپاسىن ارتتىرۋدى كوزدەيدى. كوپشىلىك ساناسىندا جۋرناليستيكا كەز كەلگەن سالانى قامتي بەرۋگە ءتيىس دەگەن جالپى جانە جاداعاي تۇسىنىك بار. الايدا دۇنيە ديدارىنا دۇربىمەن ۇڭىلسەك, ونىڭ كۇن وتكەن سايىن كۇردەلەنىپ بارا جاتقانىن بايقايمىز. بۇل ۇدەرىستىڭ نەگىزىندە بىلىكتىلىگى جوعارى ماماندى تالاپ ەتەتىن سالالار دامىپ كەلەدى. جالپىلاما تاقىرىپپەن جۇمىس ىستەيتىن ءتىلشىنىڭ داعدىسى ەندى ازدىق ەتەدى. سوندىقتان دۇنيەگە سالالىق جۋرناليستيكا كەلگەنى بەلگىلى. ولار ما­ماندانعان سالاسىن اۋدي­تورياعا تۇسىنىكتى تىلمەن جەتكىزۋگە ءتيىس.

اقپارات ايدىنىنداعى وسىنداي سالانىڭ ءبىرى – ەكونوميكالىق جۋرناليستيكا. الماتىداعى مەديا فورۋمنىڭ باستى جاڭالىعى – قارجى تاقىرىبىندا حالىقتى اقپا­راتتاندىرىپ جۇرگەن جۋرناليستەر اراسىندا وتكەن «ەركىن ءسوز-2024» شىعار­ماشىلىق بايقاۋى. بايقاۋ «تۇركىتىلدەس جۋرناليستەر قورى» مەن «حالىق بانك» اكتسيونەرلىك قوعامنىڭ ىجداعات-قول­داۋىمەن ءوتتى.

سونىمەن مەديا-بايگە قورىتىندىسى بويىنشا «ۇزدىك تەلەسيۋجەت» اتالىمى كتك ارناسىنىڭ ءتىلشىسى ۇلان نۇراحمەتكە بۇيىردى. ال «سايتتاعى ۇزدىك ماقالا» اتا­لىمىنا «atrpress.kz» سايتىنىڭ ءتىل­شىسى اماندىق ساعىنتاي ۇلى لايىق دەپ تانىلدى. «باسىلىم بەتىندە جارىق كورگەن ۇزدىك ماقالا» جۇلدەسىن ارىپتەسىمىز, «Egemen Qazaqstan» گازەتىنىڭ ءتىلشىسى ەلىگىماي توڭكەر جەڭىپ الدى. جۋرناليست «جەكە تۇلعا بانكروتتىعى: ماسەلەنىڭ ءمانىسى» تاقىرىبىندا زەرتتەۋ جاساپ, الاياقتىق جولمەن نەسيە راسىمدەيتىن كريمينالدى نارىقتىڭ كىلتيپانىن انىقتاپ, قارجىلىق قاۋىپسىزدىك جولدارىن ايقىنداعان.

فورۋمنىڭ قورىتىندى بولىمىندە تۇركى ەلدەرىنە ورتاق مەديا پلاتفورما جاساقتاۋ قاجەتتىگى تالقىلانىپ, تا­­راپ­­تار ءوزارا ءتيىمدى جوبا ازىرلەۋگە ۋاعدا­لاستى.