مەرگەندەر مەرەيى

«UAE SWAT Challenge» – تاكتيكالىق وپەراتسيالار, عيمارات پەن مۇنارانى باسىپ الۋ, كەپىلگە الىنعانداردى جانە وفيتسەرلەردى قۇتقارۋ, سونداي-اق كەشەندى كەدەرگىلەر جولاعىنان ءوتۋ سەكىلدى بەس كۇردەلى كەزەڭنەن تۇراتىن حالىقارالىق جارىس. بۇل سىن الاڭىندا كۇش پەن شاپشاڭدىق قانا ەمەس, كوماندالىق رۋح پەن ستراتەگيالىق شەشىم قابىلداۋ دا قاجەت. ەلدىڭ نامىسىن قورعاعان ارنايى جاساق الەمنىڭ نازارىن وزىنە وسىلاي قاراتتى. بۇل – ارينە, وبلىستىق پوليتسيا دەپارتامەنتىنىڭ جىلدام قيمىلدايتىن ارنايى جاساعىنىڭ اعا ينسپەكتورى, پوليتسيا كاپيتانى, مەرگەن ءامىرحان ماحاتوۆ پەن قاراعاندى قالاسىنداعى 5450 اسكەري ءبولىم كاپيتانى, مەرگەن ەرداۋلەت جانعالي سەكىلدى جىگىتتەردىڭ مىعىم دايىندىعىمەن, قايسار رۋحىمەن كەلگەن جەڭىس.

اعا ينسپەكتور ءامىرحان ەرسايىن ۇلى­نىڭ بۇل – العاشقى اۋقىمدى دوداسى ەمەس. ول – تاجىريبەلىك اتۋدان سپورت شەبەر­لى­گىنە ۇمىتكەر, رەسپۋبليكالىق جانە حا­لىق­ارالىق تۋرنيرلەردىڭ جەڭىمپازى. مۇ­نىمەن قوسا جاستايىنان دزيۋدومەن جات­تىعىپ, بۇل سپورت تۇرىنەن دە تالاي باسە­كەدە توپ جاردى.

 «ارنايى بولىمشەلەر اراسىنداعى بۇل جارىس – مەرگەندىك پەن جىلدامدىقتىڭ عانا ەمەس, تەمىردەي ءتارتىپ پەن ءمىنسىز كو­ماندالىق ۇيلەسىمنىڭ سىناعى. باع­دار­لاما بەس كۇردەلى كەزەڭنەن تۇرادى, ارقايسىسى شىنايى وپەراتسياعا بارىنشا جاقىنداتىلعان. العاشقى جاتتىعۋدا ءبىر مەرگەن مەن ءتورت شابۋىلداۋشى كولىكتەن ءتۇسىپ, كەدەرگىلەردەن ءوتىپ, عيماراتقا شابۋىل جاسايدى. مەرگەن مىلتىقپەن جانە تاپانشامەن اتىپ, توپقا بەلگى بەرەدى. سوڭىندا نىسانالاردى ءار قالىپتا كوزدەپ, شارتتى تۇردە جارالانعانداردى تاسىمالداۋمەن اياقتالادى», دەيدى مەرگەن ءامىرحان ەرسايىن ۇلى.

ەكىنشى كەزەڭ – كەپىلگە الىنعان ادامدى بوساتۋ. مەرگەن 60 مەتر قاشىقتىقتاعى نىسانانى ءبىر وقپەن قۇلاتۋعا ءتيىس. سول ساتتەن باستاپ شا­بۋىل توبى عيماراتقا كىرىپ, بولمەلەردەگى تەك نەگىزگى نىسانالاردى جويادى. ءۇشىنشى جاتتىعۋدا مەرگەن 2 سانتيمەترلىك شاعىن نىسانالاردى ءدال ورتاسىنان اتۋى كەرەك, ال توپ كەدەرگىلەردەن ءوتىپ, بىرنەشە پوزيتسيادان نىسانالاردى كوزدەيدى. كەيىن «جارالانعان» مەرگەندى قۇتقارىپ, اۋىر جۇكتi بىرگە تاسىمالدايدى. ءتورتىنشى كەزەڭدە ەكى مەرگەن مەن ءۇش شابۋىلداۋشى الىس قاشىقتىقتا اتىپ, كوپقاباتتى عيماراتتا ارەكەت ەتەدى. بيىكتىك پەن شارشاۋعا قاراماستان, تاپسىرمانى ورىنداپ, ورتاق مارەگە جەتۋگە ءتيىس. بەسىنشى جاتتىعۋ – قارۋسىز كەدەرگىلەر جولاعى. 21 كەدەرگىنى بۇكىل كوماندا بىرگە وتەدى, سوڭعى ادام جەتكەندە عانا ۋاقىت توقتايدى.

بۇل بەس سىناق دالدىك, توزىمدىلىك, تاكتي­كا­لىق ويلاۋ مەن كوماندالىق بىرلىكتى قاتار تەكسەرەدى. وسىنداي كۇردەلى تاپسىر­ما­لار­­­دى شەبەر ورىنداپ شىققانداردىڭ ءبىرى قاراعاندىلىق مەرگەن ەرداۋلەت جانعالي ەدى. اسكەري سالا – ونىڭ بالا كۇن­گى ارمانى. تەلەديداردان اسكەري باع­دار­لامالاردى كورىپ, «وسىنداي فورما كيىپ, ەلگە قىزمەت ەتەمىن», دەپ وزىنە سەرت بەرىپ وسكەن كورىنەدى. بۇگىندە سول ارمانى شىندىققا اينالىپ, ول وتان الدىنداعى جاۋاپتى مىندەتىن ادال ورىنداپ ءجۇر.

ارمانى اسقاق ول ۇلتتىق ۇلان اكادەمياسىنا وقۋعا تۇسەدى. جاس وفيتسەر ەڭبەك جولىن استانا قالاسىنداعى 5573 اسكەري بولىمىندە كوماندير قىزمەتىنەن باستايدى. بىلتىر قاراعاندى قالاسىنداعى 5450 اسكەري بولىمىنە اۋىسىپ كەلىپ, ابى­رويلى قىزمەت اتقارىپ كەلەدى. سپورت – ونىڭ ءومىرىنىڭ اجىراماس بولىگى. ەرداۋلەت نەگىزىنەن شاڭعى جارىسىمەن اينالىسادى. قىسقى پرەزيدەنتتىك كوپ­سايىس جارىستارىنا تۇراق­تى قاتىسىپ, جۇلدەلى ورىن­دار الىپ ءجۇر. سونىمەن قاتار جەڭىل اتلەتيكا بويىنشا قاراعاندى وب­لى­سىنىڭ چەمپيونى اتاندى. قازىرگى تاڭدا مەرگەن رەتىندە قىزمەت اتقارادى. بۇل باعىتتا دا ءوزىنىڭ كاسىبي دەڭگەيىن حالىقارالىق جارىستاردا دالەلدەپ, جوعارى ناتيجەلەر كورسەتىپ كەلەدى.

 «جارىستىڭ اتموسفەراسى ەرەكشە. ەرەجەلەر قاتاڭ, تالاپتار بۇرىنعىدان دا كۇردەلى بولا ءتۇستى. بەس كۇن بويى ءار كۇننىڭ ءوز شارتى, ءوز سىناعى بەكىتىلدى. مەرگەن رەتىندە مەن ءۇش قالىپتا – جاتىپ, وتىرىپ جانە تۇرىپ اتتىم. ءار قالىپ دالدىك پەن تۇراقتىلىقتى تالاپ ەتەدى. نىسانالاردى ورىنداعان سوڭ بىردەن جۇگىرىپ كەلىپ, 80 كيلولىق مانەكەندەردى كوتەرىپ, مارەگە جەتكىزۋ كەرەك. ياعني مەرگەن تەك نىسانا كوزدەۋمەن ەمەس, كۇش پەن توزىمدىلىكپەن دە سىنالدى. ەكىنشى كۇنى بەس قاباتتى عيماراتقا كوتەرىلىپ, 60 مەتر قاشىق­تىقتاعى نىسانانى ءبىر وقپەن قۇلاتۋ تاپسىرىلدى. سول ءبىر وق بۇكىل كومان­دانىڭ قوزعالىسىن شەشەدى – نىسانا قۇلامايىنشا توپ العا جىلجىمايدى. بۇل ۇلكەن جاۋاپكەرشىلىك جۇكتەيدى. ءۇشىنشى كۇن ەڭ قيىن كەزەڭدەردىڭ ءبىرى بولدى: 60 مەتر قاشىقتىقتا ديامەترى 3 سانتيمەترلىك قارا شەڭبەردىڭ ءدال ورتاسىنا ءتورت رەت تيگىزۋ كەرەك. از عانا قاتەلىك – ناتيجە ەسەپتەلمەيدى. ءتورتىنشى كۇنى قاشىقتىق ۇزاردى: الدىمەن 100 مەتردەن ءۇش نىسانا, كەيىن بەسىنشى قاباتقا كوتەرىلىپ, 300 مەتر­­دەن ەكى نىسانانى اتۋىمىز كەرەك. شارشاعان كۇيدە دالدىك ساقتاۋ وڭاي ەمەس. بەسىنشى كۇن – كۇش پەن نامىستىڭ سىناعى. قارۋسىز كەدەرگىلەر جولاعى, جوعارى جۇكتەمە, تەك كوماندالىق رۋحقا سۇيەنەسىڭ. وسى بەس كۇندە ءبىز جوعارى ناتيجە كورسەتىپ, بارلىق قيىندىققا توتەپ بەردىك. سونىڭ ارقاسىندا جەڭىسكە جەتتىك. بۇل – تاباندىلىق پەن بىرلىكتىڭ جەڭىسى», دەيدى ەرداۋلەت جانعالي.

جەڭىسپەن ورالعان قازاقستان قۇرا­ما­سىن ەل ايرىقشا قۇرمەتپەن قارسى الدى. كوماندير ەرداۋلەت پرەزيدەنت قاسىم-جومارت توقاەۆتىڭ قولىنان «جاۋىنگەرلىك ەرلىگى ءۇشىن» مەدالىمەن,  ال ءامىرحان ەرسايىن ۇلى مەملەكەت باس­شىسىنىڭ العىسحاتى مەن ىشكى ىستەر مينيسترلىگىنىڭ «قۇقىق ءتارتىبىن قام­تاماسىز ەتۋگە قوسقان ۇلەسى ءۇشىن» مەدا­لى­مەن ماراپاتتالدى.

ەل كومانداسىنىڭ جەڭىسكە جەتۋىنە ۇلەستەرىن قوسقان قوس قاراعاندىلىق جاۋىنگەر «كوك تۋ بيىككە كوتەرىلگەندە, كوزگە ەرىكسىز جاس كەلدى» دەيدى. ەلگە دەگەن ماحابباتىڭ ەڭ بيىك كورىنىسى – وسى. جىگەرلى جىگىتتەر مەن قايراتتى قازاق قىزدارى – نامىستىڭ ناركەسكەنىندەي, رۋحتىڭ بايراعىنداي. جاسا, قازاق جاۋىنگەرى!

قاراعاندى وبلىسى