«اۋىل» پارتياسىنىڭ ۇيىمداستىرۋىمەن استاناداعى ۇلتتىق مۋزەيدىڭ ءماجىلىس زالىندا «باتامەنەن ەل كوگەرەر» اتتى رەسپۋبليكالىق باتاگويلەر بايقاۋى قورىتىندىلاندى. سالتاناتتى جيىندا ءماجىلىس دەپۋتاتتارى جيگۋلي دايراباەۆ, ەربولات ساۋرىقوۆ, سونداي-اق «اۋىل» پارتياسى توراعاسىنىڭ ورىنباسارى قۋانىش سەيىتجانوۆ ءسوز الىپ, بايقاۋ جەڭىمپازدارىن ماراپاتتادى.
قۋانىش سەيىتجانوۆ بايقاۋ ادىلەتتى قازاقستان, ادال ازامات سەكىلدى قۇندىلىقتاردى دارىپتەۋ, قازاق حالقىنىڭ رۋحاني مۇراسى – باتا بەرۋ ءداستۇرىن جاڭعىرتۋ جانە جاس ۇرپاقتىڭ بويىنا تاربيەلىك ءمانى جوعارى ءسوز ونەرىن ءسىڭىرۋ ماقساتىندا ۇيىمداستىرىلعانىن اتاپ ءوتتى. ول اۋىل مەن استانا اراسىنداعى رۋحاني كوپىر, ءداستۇر دانەكەرى بولىپ اۋىل-اۋىلدان كەلگەن باتاگويلەرگە العىس ايتىپ: «باتا – اعايىننىڭ اراسىنداعى اق تىلەك قانا ەمەس, ەلدىك مۇراتتىڭ جارشىسى. سول سەبەپتى 2024 جىلى پارتيامىزدىڭ باستاماسىمەن «باتامەنەن ەل كوگەرەر» بايقاۋىن باستادىق. العاشقى كەزدە قالاي بولادى ەكەن, باتاگويلەر بار ما ەكەن دەگەن كۇمان بولدى. قۇدايعا شۇكىر, «ەل ءىشى – ونەر كەنىشى» ەكەن. وسى كۇنگە دەيىن, ءۇش جىلدىڭ ىشىندە 900-دەن استام باتا پارتيامىزدىڭ قورىنا كەلىپ ءتۇستى», دەي كەلىپ, بيىل دا قازىلار القاسىنىڭ شەشىمىمەن جۇزدەن جۇيرىك, مىڭنان تۇلپار شىققان بايقاۋ جەڭىمپازدارى انىقتالعانىن اتاپ ءوتتى.
ەربولات ساۋرىقوۆ بايقاۋدا ارناۋلى جۇلدەلەرگە يە بولعان جەتىسۋ وبلىسى قاراتال اۋدانى كالپە اۋىلىنىڭ تۇرعىنى الماحان شاكيەۆاعا, شىعىس قازاقستان وبلىسى سامار اۋدانى كوكجوتا اۋىلىنىڭ تۇرعىنى ايان قالىمبەككە جانە استانا قالاسىنىڭ تۇرعىنى نۇرىمجان الدابەرگەنوۆكە دەمەۋشىلەر اتىنان سىي-سياپاتتار تابىستادى. ال بايقاۋدا ءبىرىنشى ورىن يەلەنگەن قوناەۆ قالاسىنىڭ تۇرعىنى بەرىك بايلوۆ, ەكىنشى ورىنعا يە بولعان اقتوبە وبلىسى بايعانين اۋدانى قاراۋىلكەلدى اۋىلىنىڭ تۇرعىنى جەكسەنباي العازين جانە ءۇشىنشى ورىندى قاناعات تۇتقان جامبىل وبلىسى جۋالى اۋدانى ب.مومىش ۇلى اۋىلىنىڭ تۇرعىنى سەيىتقازى مەدەتبەكتى ءماجىلىس دەپۋتاتى جيگۋلي دايراباەۆ ماراپاتتاپ, قارجىلاي سەرتيفيكاتتار ۇسىندى.
«ۇلتتىق مۋزەي تورىندە ۇلتتىق ءداستۇرىمىزدى دارىپتەگەن باتاگويلەر بايقاۋىنىڭ قورىتىندىسى شىعارىلىپ وتىر. بايقاۋ ەكى-ءۇش جىلدان بەرى ءوزىنىڭ ومىرشەڭدىگىن تانىتىپ جاتىر. باتاگويلەر بايقاۋى ۇلتتىق رۋحانياتتى جاڭعىرتۋعا, حالىقتىق داستۇرلەردى كەڭىنەن ناسيحاتتاۋعا, سونداي-اق باتاگويلەر ونەرىن دارىپتەۋگە مول ۇلەس قوسىپ كەلەدى. سول سەبەپتى بولاشاقتا بايقاۋدى بۇدان دا بايىتىپ, جۇلدە قورىن كوبەيتۋدى جوسپارلاپ وتىرمىز», دەگەن جيگۋلي دايراباەۆ ءىس-شاراعا اتسالىسقان بارشا باتاگويگە ريزاشىلىعىن ءبىلدىردى. سالتاناتتى ماراپاتتاۋدىڭ سوڭى جىرشى-تەرمەشىلەردىڭ «اتالار ءسوزى – اسىل مۇرامىز» اتتى كونتسەرتتىك باعدارلاماسىنا ۇلاستى.