باكۋدە بۇۇ-نىڭ COP29 كليماتتىڭ وزگەرۋى جونىندەگى كونفەرەنتسياسى اياسىندا قازاقستان رەسپۋبليكاسىنىڭ ەنەرگەتيكا ۆيتسە-ءمينيسترى سۇڭعات ەسىمحانوۆ اتوم ەنەرگياسىن پايدالانۋدى ءۇش ەسە ارتتىرۋ بويىنشا كۇش-جىگەردى ىلگەرىلەتۋ جونىندەگى حالىقارالىق ءىس-شاراعا قاتىستى, دەپ حابارلايدى Egemen.kz.
ۆيتسە-مينيستر پاريج كەلىسىمىنىڭ ماقساتتارىن ورىنداۋ ءۇشىن الەمدىك ەكونوميكانى دەكاربونيزاتسيالاۋدى جەدەلدەتۋگە جانە پارنيكتىك گازدار شىعارىندىلارىن ازايتۋعا باعىتتالعان 2050 جىلعا قاراي اتوم ەنەرگەتيكاسىن ءۇش ەسە ۇلعايتۋ جونىندەگى دەكلاراتسياعا قازاقستاننىڭ قوسىلاتىنىن جاريالادى.
«قازاقستاننىڭ 2050 جىلعا قاراي اتوم ەنەرگياسىن ءۇش ەسە ۇلعايتۋ تۋرالى دەكلاراتسياعا قوسىلۋى –تۇراقتى جانە ەكولوگيالىق تازا بولاشاققا جاسالعان ماڭىزدى قادامىمىز. ءبىز ەنەرگەتيكالىق قاۋىپسىزدىكتى نىعايتىپ قانا قويماي, ورتاق ماقساتقا جەتۋ ءۇشىن الەمدىك قوعامداستىقپەن ىنتىماقتاسا وتىرىپ, كومىرتەگى شىعارىندىلارىنىڭ جاھاندىق تومەندەۋىنە ەلەۋلى ۇلەس قوسۋعا تىرىسامىز», دەدى ەنەرگەتيكا ۆيتسە-ءمينيسترى.
ايتا كەتەيىك, پاريج كەلىسىمىنىڭ العاشقى جاھاندىق شولۋى اياسىندا اتوم ەنەرگەتيكاسى تەمپەراتۋرانىڭ 1,5°س ءوسۋىن شەكتەۋ ماقساتىنا جەتۋدىڭ نەگىزگى شەشىمدەرىنىڭ ءبىرى رەتىندە تانىلعان.
بۇگىندە دەكلاراتسياعا 26 مەملەكەت قوسىلدى: ارمەنيا, بولگاريا, كانادا, حورۆاتيا, چەحيا, فينليانديا, فرانتسيا, گانا, ماجارستان, يامايكا, وڭتۇستىك كورەيا, مولدوۆا, موڭعوليا, ماروككو, نيدەرلاندى, پولشا, رۋمىنيا, سلوۆاكيا, سلوۆەنيا, شۆەتسيا, ۋكراينا, ءباا, ۇلىبريتانيا, امەريكا قۇراما شتاتتارى جانە ونىڭ ىشىندە قازاقستان.
قازاقستاننىڭ اتوم ەنەرگەتيكاسىن ءۇش ەسە ۇلعايتۋ تۋرالى دەكلاراتسياعا قوسىلۋى ەلدىڭ ورنىقتى دامۋ ماقساتتارىنا بەيىلدىلىگىن جانە كليماتتىڭ وزگەرۋىنە قارسى كۇرەسكە ەلەۋلى ۇلەس قوسۋعا دايىن ەكەندىگىن بىلدىرەدى. قازاقستان اتوم ەنەرگەتيكاسىن 2060 جىلعا قاراي كومىرتەگى بەيتاراپتىعىنا قول جەتكىزۋگە, تازا ەنەرگيا كوزدەرىنىڭ ۇلەسىن ۇلعايتۋعا جانە سەنىمدى ەنەرگيامەن جابدىقتاۋدى قامتاماسىز ەتۋگە مۇمكىندىك بەرەتىن ءوزىنىڭ بولاشاق ەنەرگيا تەڭگەرىمىنىڭ ماڭىزدى كومپونەنتتەرىنىڭ ءبىرى رەتىندە قاراستىرادى.
قازاقستان بەيبىت اتومدى دامىتۋ جونىندەگى حالىقارالىق باستامالارعا بەلسەندى قاتىسۋعا جانە وسى سالاداعى جەتەكشى مەملەكەتتەرمەن جانە حالىقارالىق ۇيىمدارمەن ىنتىماقتاستىقتى كەڭەيتۋگە نيەتتى.