قوستاناي وبلىسىنىڭ پروكۋرورلارى پوليتسەيگە قاتىستى جاسالعان قىلمىستىڭ ءمان-جايىن انىقتادى, دەپ حابارلايدى Egemen.kz.
ۆەدومستۆو مالىمەتىنشە, ۇزىنكول اۋدانىنىڭ تۇرعىنى دەمالىستا جۇرگەن اۋىلداسىن – پوليتسيا قىزمەتكەرىن توناۋ جانە ءولتىرۋ ءىسى بويىنشا ايىپتالعان.
الايدا سوتتا زاتتاي دالەلدەردى زەرتتەۋ كەزىندە مەملەكەتتىك ايىپتاۋشى الدىن الا جوسپارلانعان, ايرىقشا قاتىگەزدىكپەن جانە جابىرلەنۋشىنىڭ كاسىبي قىزمەتىنە كەك قايتارۋ ماقساتىندا جاسالعان كىسى ءولتىرۋ ارەكەتىن راستايتىن ايعاقتاردى تاپقان.
«سوت وتىرىسىندا مەملەكەتتىك ايىپتاۋشىنىڭ ءوتىنىشى بويىنشا سوتتالعان ادام 2021 جىلى ۇرلىق جانە پوليتسيا قىزمەتكەرىنىڭ ومىرىنە قاستاندىق جاساۋ بويىنشا سوتتالعان بۇرىنعى قىلمىستىق ءىس ماتەريالدارىنىڭ كوشىرمەلەرى زەرتتەلدى. بۇل ماتەريالداردى سوتتالۋشى ۇكىم شىعارىلعاننان كەيىن وزىمەن بىرگە ساقتاپ كەلگەن. اتاپ ايتقاندا, زەرتتەۋ بارىسىندا ءاربىر قۇجاتتاعى لاۋازىمدى تۇلعالاردىڭ اتى-جوندەرى تۇسىندا سوتتالۋشىنىڭ قولجازبا تۇرىندە جازبالار قالدىرعانى انىقتالدى. تەرگەۋشى مەن ساراپشىنىڭ اتى-جوندەرىنىڭ تۇسىنا «پىشاقتايمىن» دەگەن جازبالار جازىلعان. جابىرلەنۋشى, ۇزىنكول اۋدانى پوليتسيا ءبولىمىنىڭ كريميناليسىنىڭ ەسىمى دوڭگەلەكپەن قورشالىپ, «پىشاقتايمىن» دەگەن سوزدەر جازىلعان (ورفوگرافيا مەن پۋنكتۋاتسيا ساقتالعان)», دەلىنگەن حابارلامادا.
سوتتا سوتتالۋشى بۇل جازبالاردى پەنيتەنتسيارلىق مەكەمەدە بولعاندا پوليتسيا قىزمەتكەرلەرىنە رەنجىگەندىكتەن جاساعانىن تۇسىندىرگەن.
«قىلمىستىڭ ەرەكشە سەبەبى, قاتىگەزدىگى, الدىڭعى جازاسىن وتەگەننەن كەيىن ءتيىستى قورىتىندى جاساماۋى, شارتتى تۇردە مەرزىمىنەن بۇرىن بوساتىلۋى, باسقا تۇلعالارعا زيان كەلتىرۋگە دەگەن تۇراقتى نيەتىنىڭ بولۋى جانە زاڭعا باعىنۋشىلىق مىنەز-قۇلقىنىڭ قالىپتاسپاۋى ەسكەرىلىپ, مەملەكەتتىك ايىپتاۋشى ونى قوعام ءۇشىن قاۋىپتى دەپ ساناپ, ونى ءومىر بويىنا وقشاۋلاۋدى قاجەت دەپ تاپتى», دەپ حابارلادى وبلىستىق پروكۋراتۋرانىڭ ءباسپاسوز قىزمەتى.
سوت تالقىلاۋىندا پروكۋرور سوتتالۋشىعا ءومىر بويىنا باس بوستاندىعىنان ايىرۋ جازاسىن تاعايىنداۋدى ۇسىنعان.