الماتىدا پوليتسيا جەراستى وتكەلدەرىندە ەسىرتكى زاتتارىن جارنامالاپ سۋرەت سالعان ەكى جىگىتتى ۇستادى, دەپ حابارلايدى Egemen.kz.
اۋەزوۆ اۋدانىنىڭ ءتارتىپ ساقشىلارى جاستار تۇنگى ۋاقىتتا ارەكەت ەتكەنىن انىقتاعان. ولار كەڭ كولەمدى پلاتفورمالار, كوبىنەسە وتكەلدەردەگى بەتون قابىرعالارعا سۋرەت سالعان. كۇدىكتىلەر ۇستالىپ, پروكۋراتۋرانىڭ ۇيلەستىرۋىمەن قاماۋعا الىندى. ەسىرتكىلەردى ناسيحاتتاۋ جانە جارنامالاۋ دەرەگى بويىنشا قىلمىستىق ءىس تەرگەلىپ جاتىر.
«كۇدىكتىلەردىڭ ءبىرى – 18 جاستا, ەكىنشىسى – 22 جاستا. ەكەۋى دە باسقا قالادان كەلگەندەر, الماتىدا تۇراقتى جۇمىسى جوق. ۇستالعانداردىڭ ايتۋىنشا, ولار «وڭاي اقشا تابۋدى» كوزدەگەن. ولاردىڭ «جۇمىس بەرۋشىلەرى» مىندەتتى تۇردە انىقتالىپ, جاۋاپقا تارتىلادى», دەيدى اۋەزوۆ اۋداندىق پوليتسيا باسقارماسىنىڭ باستىعى دانيار مەڭدەباەۆ.
الماتى پد ەسىرتكى قىلمىسىنا قارسى كۇرەس باسقارماسىنىڭ مالىمەتىنشە, جىل باسىنان بەرى پوليتسەيلەر 37 ەسىرتكى ساتۋشىنى ۇستاعان. ەسىرتكى ساتۋدى ناسيحاتتاعان 451 ينتەرنەت-رەسۋرس بۇعاتتالدى.